Dibuku ya
ZAKALI
NKOTOLO
Dibuku yayi ya mumbikudi Zakali, ba lenda kubokila yawu mpe dibuku ya kivuvu. Yawu ke na kulakisa wapi mutindu na ntangu ya mumbikudi Zakali bantu ya Isayeli vwandaka sala kiminu ya bawu na Nzambi. Mambu yayi salamaka na bamvula 520 mpe 518 ntete nkwizulu ya Yesu klisto samu na ndambu ya ntete mpe samu na ndambu ya zole yawu salamaka na bamvula yina vwandaka landa.
Dibuku yayi kele ya kukabuka na bandambu zole mutindu yayi:
Ndambu ya ntete (Zli 1–8):
- Yave bokilaka Isayeli na kuvutuka na yandi (Zli 1.1-6)
- Balumoni nana mpe kidimbu (Zli 1.7–6.15)
- Mina nsoki mpe nsilulu ya kizunu (Zli 7.1–8.23)
Ndambu ya zole (Zli 9–14):
- Bantwadisi mpe mukangu ya bantu (Zli 9.1–11.17)
- Mpulusu ya Yelusalemi mpe lufundusu ya Yave (Zli 12.1–14.21)
1
Yave ke na kubokila bantu ya Isayeli
1 Na ngonda ya nana ya mvula ya zole ya kintinu ya Dalyuse, Yave zabisaka na mumbikudi Zakali, mwana ya Belekya, mutekolo ya Ido, mutindu yayi:
2 «Yave dasukilaka bankooko ya beno».
3 Na yina, zabisa na bantu ya Isayeli: «Yave, Nzambi ya binwani ke na kutuba na beno, beno vutuka na sika ya munu, ni Yave, Nzambi ya binwani me tuba yawu munu mpe ke vutuka na sika ya beno, ni munu Yave, Nzambi ya binwani ke na kutuba yawu.
4 Beno sala ve mutindu salaka bankooko ya beno. Na ntangu ya ntama, mimbikudi ya ntete vwandaka zabisa bawu: Yave, Nzambi ya Binwani ke na kutuba, beno bika banzila mpe mavanga ya beno nyonso ya yimbi, kasi bawu kuwaka ve mpe tumamaka ve. Ni Yave me tuba yawu.
5 Wapi bankooko ya beno? Mimbikudi mpe ke ntete moyo?
6 Na yina, mambu mpe misiku yina mu pesaka na bisyelo ya munu mimbikudi, yawu kumaka ve na bankooko ya beno? Bankooko ya beno sobaka nkadulu mpe ndimaka ti mu bakaka lukanu ya kusemba bawu mutindu vwandaka nkadulu mpe mavanga ya bawu.»
Lumoni ya ntete: Bampunda
7 Na kilumbu ya makumi zole na yiya ya ngonda ya kumi na mosi, ngonda yina ba ke bokilaka Sebate, na mvula ya zole ya kintinu ya Dalyuse, mambu ya Yave kuminaka na mumbikudi Zakali, mwana ya Belekya, mutekolo ya Ido. Mambu yango ni yayi:
8 Na mpimpa, mu talaka muntu mosi ya kuvwanda na zulu ya mpunda ya mbwaki, yandi vwandaka na kati ya dibenga na kati-kati ya bayinti yina ba ke bokilaka miite. Na manima ya yandi, ya vwandaka na bampunda ya mbwaki, ya mwa mbwaki mpe ya mpembe.
9 Mu yufulaka yandi: «Mfumu ya munu, bampunda yayi zola kutuba yinki?» Mbazi yina vwandaka zonza na munu vutulaka: «Mu ke zabisa nge yinki yawu zola kutuba.»
10 Muntu yango yina vwandaka na kati-kati ya bayinti ya miite tubaka: «Ni bantu yina Yave fidisaka samu na kutambula na yinza.»
11 Bayina vwandaka na zulu na bampunda ya nkaka vutulaka na mbazi ya Yave yina vwandaka na kati-kati ya bayinti ya miite: «Beto me tambula na yinza mpe beto me tala ti yinza nyonso kele swii mpe ata muvusu kele ve.»
12 Na yina, mbazi ya Yave tubaka dyaka: «Aa, Yave, Nzambi ya Binwani ya me kuma bamvula makumi nsambwadi katuka ntangu yina nge dasukilaka beto. Tii wapi ntangu nge ke manga na kutala Yelusalemi mpe bambanza ya Yuda kyadi?»
13 Yave pesaka mvutu ya mambu ya mbote mpe ya kukindisa na sika ya mbazi yina vwandaka zonza na munu.
Yave ke soola dyaka Yelusalemi
14 Mbazi yina vwandaka zonza na
munu, tumisaka munu samu ti
mu kwenda tuba mutindu yayi
«Yave, Nzambi ya Binwani ke na kutuba:
Mu ke na kimbanda ya kulutila
samu na Yelusalemi mpe Siyone.
15 Mu kumaka na nkele ya kulutila
na bayinsi yina ke tulaka kivuvu bawu
na ngolo ya bawu.
Nkele ya munu vwandaka fyoti,
kasi ni bayinsi yina salaka ti
mpasi ya bantu ya munu kulutila.
16 Ni yawu yina, munu Yave
ke na kutuba, mu ke vutuka na
Yelusalemi samu na kulakisa ti
mu me fwila beno kyadi.
Yinzo ya munu ke tungama
dyaka mpe ba ke teza
Yelusalemi na metele.
Ni Yave, Nzambi ya Binwani
me tuba yawu.»
17 Na manima, mbazi tumisaka munu
na kwenda tuba dyaka ti:
«Yave, Nzambi ya Binwani me tuba,
bambanza ya munu ke fuluka
dyaka na bimvwama,
Yave ke kindisa dyaka Siyone
mpe yandi ke soola dyaka Yelusalemi.»