7
Jisas kalivadidiy duw taakw nuwukadiy duw takwak kupwaraap waan wasapwun kwurdaba.
(Luk 6:37-38,41-42)
1 “Aw li gwur kupwaraap waan wasapwun kwurkigwura nuwukadiy duw takwak, aw ginyir God di kupwaraap wakinaad gwurak.
2 “Gwur nuwukadiy duw takwak kupwarapa jaav viyakita jaav dayak kwurkigwura, atampik God ab kwur-kidadiygwur gwurak adiy nuwukadiy duw takwak kwurgwuradiy yawiyab vikuw.
3 “Gwur agwa javik nikidi duw diki yidil kwasa valik wagwura, aw gwur gwuradiy nimadiy valik akil wukigwura?
4-5 “Gwur nuwukadiy duw taakw dayadiy kwasadiy valik vikuw, wakigwuradiy, ‘Min kwasa vaal yiminal, alik wun sugwiyaan kwurik minak.’ Aw gwuradiy vaal mwiya nimadiy-adiy. Alik gwur atawa wakigwura, gwur viyuw tikala pik pasira-kigwura. Taay gwur bwan akwiy gwuradiy nimadiy valik. Kwiykuw, ginyir ata yin sugwiyaan akwur adi nikidi duw diki kwasa valik.
6 “Nuwukadiy duw taakw kwasik yikwanadiy God diki maaj wukiwukik. Alik gwur dayak God diki maaj watikwa. Aw li gwur dayak God diki maaj wakigwura, day gwurak wariy-wariya as kaytik tikinadiy. Nuwukadiy duw taakw maa wakwanadiy God diki majik. Gwura maaj dayak bwalak til yakisawula-dadiy jaav kaytik. Kupwaam vakirkuw ridaak, adiy bwal dayadiy apiyim vasiyi vasiyaan tikwadana pik. Atampik adiy duw taakw vasiyi vasiyaan tikidana gwura majim.”
Jisas kalivadidiy God adiy dikidiy nyanugw dikik bas sikidanadiy jaav dayak kwiykidadiy.
(Luk 11:9-13)
7 “Adiy Godak bas sikir wakigwuradiy jaav God gwurak kwiykidadiy. Adiy pakwun rinadiy javik gwur kwakikuw, adiy sitakira-kigwuradiy. Adiy wiyig dayaam viyakiti-kigwura, adiy wiyig gwurak sakwutaka-kidanadiygwurik.
8 “Ababa duw taakw dayadiy Godak bas sikidadiy jaav adiy kwurkidanadiy. Ababa duw taakw day adiy pakwun rinadiy javik kwakikuw, adiy sitakira-kidanadiy. Ababa duw taakw dayadiy viyakiti-kidanadiy wiyig adiy God dayak sakwutaka-kidadiy.
9 “Gwur asaay, li gwuradiy nyanugw gwurak yakuw bret kikir bas sidaak, gwur kabaak kwiy-kigwuradiy, ay?
10 “Day gwurak kamiy kikir bas sidaak, kabaay dayak kwiy-kigwuradiy kidakikik, ay?
11 “Gwur kupwarapa duw taakw-adiygwurik. Aw gwur gwuradiy nyanugwak viyakita jaav kwiy-kwanadiygwurik. Aw atawa kwurgwur, adawul tipaam kwanadi Asaay di gwuraam kakilkinaad dikik bas sigwuradiy jaav gwurak kwatiya-kidadiy.
12 “Mawsis kwiydidiy lo wawa ababa God diki maaj wasapwiydiy duw dayadiy kalivadadiy majiwa dayadiy maw maaj, ‘Adiy jaav gwur duw takwak gwurak kwurdakik mawul yigwuradiy jaav, atampik nuwukadiy duw takwak akwur.’ ”
Jisas kalivadidiy duw taakw dayabir yikwadanabir yabak.
(Luk 13:24)
13-14 “Duw taakw kupwaraap tikidana tipaar yikwadanadi yaab, aad tupwiya wiyig tikuw, mwiya viyakitad. Alik samasama duw taakw yikwadanaad adi yabir. Duw taakw viyakit kwakidana tipaar yikwadanadi yaab, adi wiyig tupwiy maa ti. Kwasaadad. Nimadi yawiy kwurkuw, duw taakw yikwadanaad adi yabir. Alik duw taakw nakanak yikwadanadiy adi yabir. Aw gwur kwasadi yabir maay.”
Jisas kalivadidiy duw taakw nuwukadiy duw taakw dayadiy yawiy vikuw, dayadiy mawul lakwu-kinadiy.
(Luk 6:43-44)
15 “Gwur yarakara ada. Nuwukadiy duw day yakinadiy gwurak. Aw day God diki maaj wasapwiynadiy duw kaytik yakinadiy gwurak. Aw day suwaal takatak tikinadiy duw-adiy gwurak. Aw day gwurak yakuw, apaapap kwurkuw, gwur, ‘Kidiy God dikidiy viyakita duw-adiy,’ wakigwuradiy. Aw dayadiy mawul viyakita maa ti. Mwiya kupwarapa duw-adiy.
16 “Aw gwur dayadiy yawiy vikuw, dayadiy mawul ata lakwu-kigwuradiy. Balawiy wuw liki mwiya pik akis rikwana. Abagwaar ab kaam liki mwiya pik akis rikwana.
17 “Adi bapir bapir warkinadi miy nimaad tikuw, viyakita mwiy rikinaad. Adi ajikayin warkinadi miy nimaad tikuw, viyakita mwiy ri maa.
18 “Aw adi bapir bapir warkinadi miy nimaad tikuw, kupwarapa mwiy ri maa. Adi ajikayin warkinadi miy nimaad tikuw, viyakita mwiy ri maa.
19 “Adiy miy viyakita mwiy ri maarkinadiy, day adiy miy vilkuw, yaar yakisawula-kidanadiy.
20 “Atawa tikuw, adiy duw gwurak yakuw, gwur dayadiy yawiy vikuw, gwur lakwu-kigwuradiy day God diki maaj wasapwiy-nadiy duw maa. Suwaal takakwanadiy duw-adiy.”
Jisas duw takwak kalivadidiy adiy God diki majib wukikinadiy duw taakw dayada adawur tipaar wulakinadiy.
(Luk 13:25-27)
21 “Ababa duw taakw day wunak wakinadiy, ‘Min wunadi yitaypika duw-adimin’ adawul tipaar wul maa. Adiy duw taakw day wunadi Asaay diki majib wukikinadiy, dayada adawul tipaar wula-kinadiy.
22 “God dikidi kot rikidadi nyi yadik, samasama duw taakw wunak wakidanadiwun, ‘Nyanadi yitaypika duw, nyan minadi saam God diki viyakita maaj wasapwiy-diyan. Minadi saam mawulaar yidiy wudib kwurin yakidiyan. Minadi saam nyan samasama nimadi yawiy kwurdiyan.’
23 “Aw wun dayak ata wakituwadiy, ‘Gwur agwutak! Gwur kupwarapa vaal yidiy duw taakw-adiygwurik. Gwur Godak mwiyir wukijibir ti maargwuril alik wun gwuraam maa laakw!’ ”
Jisas kalivadidiy adiy diki majib wukikwanadiy duw takwawa adiy diki majib wak maarkwanadiy duw takwak.
(Luk 6:47-49)
24-25 “Lakwunadi duw nak dikidi wiy kabakim kwurdid. Ginyir nimadi waal jadik, guw ata warid. Warkuw, giviy yaan nimadi mwar viyaan adi wiyaam kwurdik, adi wiy kabakim tikuw, samab maa vakir. Ababa duw taakw day wuna maaj wukikuw, a majib wukikidana, day adi lakwunadi duw kaytik tikinadiy.
26-27 Mawul wak maarin apar apar yawiy kwurnadi duw di dikidi wiy kwula yawiyim kwurdid. Ginyir nimadi waal jadik, guw ata warid. Warkuw, giviy yaan nimadi mwar viyaan adi wiyaam kwurdik, adi wiy kwula yawiyim tikuw, ata vakirid. Ababa duw taakw day wuna maaj wukikuw, a majib wak maarkidana, day adi mawul wak maarin apar apar yawiy kwurnadi duw kaytik tikinadiy.”
28-29 Jisas kidiy maaj wakwusin napadik, adiy vagaruwdiy duw taakw ata pitaan wardiy diki wadil majik. Di samasam lakwukuw, apawa kalivadidiy. Adiy God diki lo kalivadiy duw, day atampik akis kalivayi-kwadiy.