4
1 Magpasabot pen hao kaini nga ya maanak nga magdawatay ka kabilin na toong ama, ka bata pen iza singed iza ka oripen bisan kon iza ya tag-iza ka tanan.
2 Ka bata pen iza may mga tao nga nagaaligara daw nagadomara ka toong kabilin hangtod ka pagdateng na tirmino nga in-andam daan na toong ama.
3 Singed kaiza ya kahimtang nita. Kay ka wara pen kita magtoo kan Kristo mga oripen isab kita na mga balaed na mga Yodayo.
4 Basta pagdateng na tirmino nga in-andam na Diyos inpakarimbaba naiza ya toong Maanak. Kamhan ya Maanak na Diyos natao iza daw mintoman iza ka mga balaed na mga Yodayo.
5 Kamhan iza ya minpakapatay dazaw anlibri ka mga tao ka pagkaoripen niran ka mga balaed dazaw mahinang kita nga mga maanak na Diyos.
6 Kamhan inpakarini kanta na Diyos ya Ispirito na toong Maanak nga nagahawag nga Ama nao nga Diyos! Agon iza ya nagapamatood nga kamo di ya toong mga maanak.
7 Agon diri di kon oripen kamo basta kay maanak. Agon tagan kamo naiza ka tanan nga in-andam naiza para ka toong mga maanak.
8 Ka mahon-a pen wara kamo makakilala ka Diyos agon mga oripen kamo na mga diyosdiyos.
9 Piro koman nakakilala di kamo ka Diyos. Isaben o paglaong nga koman ya Diyos ani ya minkilala kamazo agon kay onosa kamo maazak pagbalik ka mga balaed nga waray gahem ka paglowas? Kay onosa kamo magpaoripen kaniran pag-isab?
10 Minmahal kamo ka aldaw nga Sabado nga tigpahimlay na mga Yodayo. Minmahal isab kamo ka pagsebay na bolan daw ya mga pista daw ya ikapitong toig nga inmahal na mga Yodayo.
11 Nawied hao kamazo kay basi naosik ya tanan pagkahago nao para kamazo.
12 Mga lomon nao dizan kan Kristo, minhangzo hao kamazo nga maghaod kamo kanao nga diri ansarig ka mga balaed na mga Yodayo ka pagkawa ka mga sala. Ka mahon-a pen minhaod hao kamazo nga mga diri kon Yodayo kamhan madazaw ya batasan mazo kanao.
13 Mahagdam kamo nga ka primiro pen ya pagkabedlay nao ani ya may logar nao ka pagwali kamazo ka sindo mahitenged kan Kristo.
14 Kamhan wara kamo magtamay kon magsalikway kanao bisan ya kanaong masakit mangil-ad ya selengan. Hinoa indawat mazo hao singed ka pagdawat mazo ka taga langit nga sinogo na Diyos. Indawat mazo hao singed ka pagdawat mazo kan Hiso Kristo.
15 Kay dakola ya kasaza mazo. Kay ono sa mintignaw di ya kamazong hinawa kanao? Ka mahon-a pen nalooy gazed kamo kanao kamhan kon mahimo pagkawa ya kamazong mata kaw-en matood mazo dazaw ihatag kanao.
16 Daw nahinang di hao koman nga kaaway mazo kay inpanan-ogan nao kamo ka matood?
17 May mga iba nga tao nagapakahinang siran ka madazaw nga batasan dizan kamazo piro diri kon madazaw ya tozo niran. Kay gosto niran nga pabelagen kamo kanao dazaw ansakop kamo kaniran.
18 Madazaw gazed ya batasan nga nagaaligara ka mga ibang tao basta madazaw lamang ya tozo, bisan wara hao dizan kamazo.
19 Mga maanak nao nga naazakan! Singed hao ka ina nga nagapamati kay nagalised gazed ya hena-hena nao mahitenged kamazo hangtod mag-anika kamo daw si Kristo ka batasan.
20 Gosto gazed hao kon dizan hao iba kamazo dazaw mahagdam hao kon ono pen ya madazaw nga itambag kamazo kay dakola gazed ya pagkawied nao kamazo.
21 Kamo nga mga maazak pagbalik ka pagpaoripen ka mga balaed, daw wara kamo mahagdam kon ono ya intoldo na balaed?
22 Mintoldo iton nga may dowang bolos nga maanak ni Abraham polos amaama. Dizan ka oripen nga babazi natao ya isang maanak. Dizan kan Sara nga kaogaringeng asawa ni Abraham natao ya iba nga maanak.
23 Ya maanak dizan ka oripen natao iton singed ka pagkatao na bisan sin-o nga maanak. Piro ya maanak dizan kan Sara natao iton pinaazi ka pagtoman na Diyos ka toong saad kan Abraham. Kay minsaad ya Diyos kan Abraham nagalaong nga bisan malaas di gazed si Sara daw diri manganak an-anak iza.
24-25 Pamolinged ini nga ya dowang ka babazi singed siran ka dowang saad na Diyos. Kamhan ya isang babazi nga oripen ani si Agar. Si Agar pamolinged iza ka balaed nga inhatag na Diyos kan Moysis doro ka bobong nga Sinay doro ka lopa nga Arabya nga lopa nga natao na mga maanak ni Agar nga polos oripen sirang tanan. Singed isab si Agar ka siyodad nga Hirosalem kay ani ya dapit koman na mga tao nga in-oripen pen kaini nga balaed. Kamhan bisan sin-o ya ansakop kaniran in-oripen sab iza ka mga balaed.
26 Kamhan may matood nga siyodad nga Hirosalem daked pen ka langit. Pamolinged ini nga si Sara ya siyodad kay iza ya diri kon oripen kay kaogaringeng asawa ni Abraham iza. Kamhan iza ya kantang ina kay kita nga mga nagasarig kan Kristo kita di ya mga matood nga kaliwat ni Abraham.
27 Kay minpasoyat ya Diyos daan mahitenged kan Sara nga nagalaong nga Sara, iko nga diri makapanganak magsaza ko. Bisan wara iko makapamati magsaza ko pagdakola. Bisan inbizaan di ko na bana mo manganak iko ka mataed pen ka babazi nga nagatipon di ka bana mo. Ani ini ya daan pinasoyat na Diyos mahitenged ka kahimtang ni Sara.
28 Mga lomon nao dizan kan Kristo, koman singed kita kan Isak kay mga maanak kita na Diyos garing ka toong saad singed kan Isak.
29 Pagsolig na dowang ka maanak ni Abraham indaegdaeg na maanak na oripen ya maanak nga natao garing ka pagtabang kan Sara na Madazaw nga Ispirito na Diyos. Singed sab kaiza ya kahimtang nita koman kay inkontara kita na mga mintoman ka mga balaed.
30 Basta minpasoyat daan ya Diyos ka toong sogo kan Abraham nga nagalaong nga Abraham, pamogawen mo ya oripen nga babazi daw ya toong maanak. Kay ya maanak na oripen diri makadawat ka kabilin na toong ama iba ka maanak na babazi nga diri kon oripen.
31 Agon mga kaibahan nao, diri kon mga maanak kita na babazi nga oripen basta kay mga maanak kita na babazi nga diri kon oripen.