12
1 Iti sombe lelende be tomtom tipazal ti, ina iswe kembei lelende pa ŋgar ambaiŋana.
Mi tomtom ta so leleene iŋgis pa sua pazalŋana, na ni italli kembei ta wok!
2 Tomtom ambaiŋana na, Yooba leleene pini mi ikampewe i.
Mi zin wal ta tirru zaala be tikam mbulu sananŋana na, Yooba iurur kadoono pizin.
3 Tomtom sa irao imbol se mbulu sananŋana na som.
Mi wal ndeeŋeŋan na, zin kembei ke ta uraana isula kat toono. Irao timuzu na som.
4 Moori ta so ikamam kat uraata ma mbulu, na iwe kembei mogar pa kusiini. Pa ikamam ma kusiini niini izze.
Mi moori ta so mbulu kini ipamiaŋ kusiini, ina ni kembei motmooto ta itoutou kusiini tiroono.
5 Wal ndeeŋeŋan na, lelen iurur pa koroŋ ambaimbaiŋan men.
Mi wal sananŋan na, sombe tikamam peeze piti, nako tipasaana iti. Tana irao tendemeere ŋgar kizin na som.
6 Sua kizin wal sananŋan iwe kembei kilis be ikeene zin tomtom mi ipasaana zin.
Mi wal ndeeŋeŋan na, sua kizin itatkewe zin pa pataŋana kizin.
7 Wal sananŋan, sombe koroŋ sa ipasaana zin, nako irao timaŋga mini na som.
Mi wal ndeeŋeŋan ziŋan wal kizin na, zin ko timender mbolŋana ma timbotmbot.
8 Tomtom ta so ikamam kat ŋgar mi uraata kini ilonloondo ambai men, nako tipakuri.
Mi zin wal ta tikamam ŋgar sananŋana na, tomtom tirepilpiili zin.
9 Wal sorrokŋan ru, ta len pat riŋa be iuulu zin. Ta na, ikam ŋgar pa mboti kini, tana iŋgiimi le mbesooŋo be imbeeze pini.
Mi toro na, iwirri sorok pat kini bekena ikam tomtom lelen mi tipakuri. Tabe kaimer isu ma imbot ŋoobo.
Asiŋ ilip?
10 Tomtom ndeeŋeŋana, ni leleene izanzaana pizin mbili kini mi imbesmbeeze pizin.
Mi wal sananŋan na, tiute mbulu ki muŋaiŋana ri sa som. Tanata tiseseeze tomtom matan.
11 Tomtom ta so ikamam kat uraata pa mokleene kini, nako ka kini boozo.
Mi zin wal ta gorgori tirru zaala pa koroŋ ta ŋonon somŋan i, na zin len ŋgar sa som.
12 Wal sananŋan sombe tiur kilis kizin sananŋana sa be tikam zin tomtom, ina ikam zin ma lelen ambai kat.
Mi tomtom ndeeŋeŋana, ni kembei ke ta uraana isula kat toono mi indom ma iwe biibi.
13 Sua ta wal sananŋan tizorzooro pa i, ko iwe kembei ta kilis pizin.
Mi wal ndeeŋeŋan na, zin len zaala be tiko pa pataŋana kizin.
14 Sombe sua ambaiŋana men iwedet pa kwondo, inako ikam ti ma tombot ambai.
Mi sombe namanda ikamam kat uraata, inako tere lende kadoono ambaiŋana.
15 Wal kankaanaŋan ta tizorzooro na, lelen be tileŋ la tomtom toro kalŋaana som. Pa tindemeere sorok ma tiso titoto kat zaala ambaiŋana.
Mi tomtom ta le ŋgar ambaiŋana na, ni ileŋleŋ la sua tutŋana ta tomtom tikamam pini na.
16 Wal kankaanaŋan ta tizorzooro na, sombe wal pakan tikam mbulu sa pizin, na karau men mi keten malmal.
Mi tomtom ta le ŋgar na, sombe wal pakan tipiri sua sananŋana pini, na irao niini puliizi pa na som.
17 Zin wal ta titoto mbulu ŋonoono men, sombe tipombol tomtom toro sua kini, na irao tendemeere sua kizin. Pa ina sua ŋonoono.
Mi sombe wal pakamkaamŋan tipombol tomtom toro sua kini, na irao tendemeere sua kizin na som. Pa ina sua pakaamŋana.
18 Sua ta so takam ŋgar pa som mi tipiri sorok, ina irao ipasaana tomtom lelen ma kembei ta izi iŋgal zin.
Mi sua ta iwedet pa wal ŋgarŋan kwon, ina iurpewe tomtom lelen.
19 Zin wal ta kwon ipiyotyooto sua ŋonoono men, inako timbotmbot ma alok.
Mi zin wal ta kwon ipiyotyooto sua pakaamŋana, inako timbot rimen mi timap.
20 Zin wal ta lelen iurur be tikam mbulu sananŋana na, ŋgar kizin bok pa pakaamŋana.
Mi zin wal ta tirru zaala be tilup zin tomtom mibe tikam zin ma timbot ambai, inako lelen ambai kat.
21 Tomtom ndeeŋeŋana na, koroŋ sa irao ipasaana kati na som.
Mi wal sananŋan na, pataŋana ilolol zin.
22 Zin wal ta kwon ipiyotyooto sua pakaamŋana na, Yooba leleene pizin ri sa som kat.
Mi zin wal ta tizzo sua ŋonoono men mi titoto sua kizin mbukŋana na, ni leleene pizin ilip.
23 Wal ta len ŋgar ambaiŋana na, sombe lelen iurur pa ŋgar sa, na irao tiso sorok pizin tomtom na som. Pa ŋgar kizin tana ko iur ŋonoono kek?
Mi wal kankaanaŋan ta tizorzooro na, keten pitpit mi loŋa tizzwe ŋgar kizin talliŋana pizin tomtom.
24 Tomtom ki uraata, nako iwe biibi mi ikam peeze.
Mi tomtom maolŋana, nako isu ma iwe mbesooŋo sorok.
25 Sombe lelende ipata kat, ina ipun ti ma mburanda imap.
Mi sombe tomtom tikam sua ambaiŋana piti, nako ikam ma lelende ambai mini.
26 Tomtom ndeeŋeŋana, ni itiiri kat zin tomtom muŋgu, mana ikam zin ma tiwe toroono bizin.
Mi mbulu ta wal sananŋan titoto, ina iyaryaaru zin be tizem zaala ambaiŋana.
27 Wal maolŋan na, tirao be tiru kan buzur sa som.
Mi tomtom ki uraata, nako le koroŋ boozo. Tabe ikami ma leleene ambai.
28 Zaala ndeeŋeŋana, ina zaala ki mbotŋana ambaiŋana.
Sombe tototo zaala tana, na irao temeete ma tala lende na som.