15
1 Sombe tomtom keten malmal piti mi tepekel pa sua luumuŋana, nako takam ma lelen iluumu.
Mi sua kekeŋana, ina ipazas tomtom keten.
2 Zin wal ta len ŋgar ambaiŋana na, tizzwe ŋgar kizin totomen som. Mazwaana tataŋa men ta tipiyotyooto ŋgar kizin pizin tomtom.
Mi wal kankaanaŋan ta tizorzooro na, kwon pereupereu pa sua. Sua kizin talliŋana ireere kembei ta yok!
3 Yooba, ni mataana molo. Tana ire lele ta boozomen.
Mataana ikamam zin wal sananaŋan, mi wal ambaimbaiŋan tomini.
4 Sombe sua ta iwedet pa kwondo na iurpewe tomtom lelen, ina iwe kembei ke ta ipiyotyooto mbotŋana ambaiŋana pizin.
Mi sombe sua pakaamŋana iwedet pa kwondo, ina ipasansaana tomtom lelen.
5 Wal kankaanaŋan ta tizorzooro na, sombe taman bizin tipazal zin, na tileŋleŋ la kalŋan som.
Mi tomtom ta le ŋgar ambaiŋana na, ni ileŋleŋ la sua pazalŋana.
6 Wal ndeeŋeŋan ruumu kizin, ina bok pa koroŋ ndabokbokŋan matakiŋa.
Mi pat ta wal sananŋan tikamam, ina ikamam pataŋana pizin.
7 Zin wal ta len ŋgar ambaiŋana na, sua ŋgarŋana ta iwedet pa kwon, ina irak ma irao zin tomtom.
Mi wal kankaanaŋan ta tizorzooro na, tikamam ta kembei som. Pa ŋgar ambaiŋana sa imbotmbot la lelen som.
8 Patoronŋana kizin wal sananŋan na, Yooba leleene pa ri sa som kat.
Tamen zin wal ta tikamam kat mbulu na, ni leleene pa suŋŋana kizin ilip.
9 Zaala ta wal sananŋan titoto na, Yooba leleene pa ri sa som kat.
Mi zin wal ta tikamam kinkiini pa mbulu ndeeŋeŋana na, ni iurur kat leleene pizin.
10 Tomtom ta so izem zaala ambaiŋana, nako mbulu kekeŋana sa ipet pini bekena ipazali.
Mi tomtom ta so leleene iŋgis pa sua pazalŋana, nako imeete ma ila lene.
11 Andewa mi lele ta tipasansaana zin wal meeteŋan su pa i, ina Yooba irre. Ike pa mataana som.
Mi so kembena, na ni irre iti tomtom lelende tomini.
12 Tomtom ta so ipakurkur itunu mi irepilpiili ŋgar ambaiŋana, sombe tipazali, nako leleene iŋgis.
Tana wal ta kembei lelen be tila kizin wal ŋgarŋan ma tiuulu zin pa ŋgar pakan na som.
13 Sombe lelende ambai, nako tomtom tikilaala mar pa ruŋgundu.
Mi sombe lelende ipata, nako ipasaana ŋgar kiti.
14 Tomtom ta so ŋgar kini ipet kek, nako ikam kinkiini be ikam le ŋgar pakan ma isala ki.
Mi wal kankaanaŋan ta tizorzooro na, tinoknok mbulu kizin talliŋana mi lelen pa ilip, kembei ta kini namutŋana.
15 Zin wal ta timbotmbot raama pataŋana na, aigule sa ambai pizin som.
Mi tomtom ta so leleene ambai, na ni kembei tomtom ta ikanan ma iwinin mi menmeeni ikot aigule ta boozomen.
16 Iti sombe tomototo Yooba ma teleŋleŋ la kalŋaana, mi lende koroŋ rimen,
nako mbotŋana kiti ambai ma ilip pizin wal ta len koroŋ boozo, mi tamen timbotmbot raama lelen ipata.
17 Iti sombe kanda kini biibi som, mi tamen lelende par piti,
nako mbotŋana kiti ambai ma ilip pizin wal tau tikanan kini ambaiŋana, mi tamen tiurur lelen par pizin som.
18 Tomtom ta so keteene malmalŋana, nako ipeyei malmal.
Mi zin wal ta keten malmal karau som na, tipunmetmeete ŋoŋi.
19 Tomtom maolŋana isombe ila pa uraata, inako som. Pa koroŋ boozomen ko ipakalkaali ma kembei kolomboŋ ikowo i.
Mi zin wal ta tikamam kat mbulu na, titoto zaala ambaiŋana ta mbaŋbaŋ sa isekaala som. Tana tipa pai kizin ma ambai men.
20 Sombe pikin sa le ŋgar ambaiŋana, nako ikam ma tamaana leleene ambai kat.
Mi wal kankaanaŋan ta tizorzooro na, tirepilpiili nan bizin.
21 Zin wal ta len ŋgar somŋan i, na lelen ilip pa mbulu talliŋana.
Mi tomtom ta so ŋgar kini ipet kek na, ni itoto zaala ndeeŋeŋana men.
22 Sombe wal pakan tiuulu iti pa ŋgar kizin som, nako ŋgar kiti iur ŋonoono som.
Mi sombe wal boozo tiuulu iti pa ŋgar kizin, nako uraata kiti iloondo ambai, mi ŋgar kiti iur ŋonoono.
23 Sombe tepekel sua kizin tomtom, mi sua kiti ila ma indeeŋe men, ina ikam ti ma lelende ambai kat.
Tana tipiri sua karau pepe. Tombot mi tanaama ka mazwaana muŋgu. Iso ipet, to tipiri. Naso sua kiti itop la kat.
24 Zin wal ta len ŋgar ambaiŋana na, ko irao tisula Andewa na som. Zin ko tikam mbotŋana ambaiŋana.
Pa titoto zaala ta izalla pa saamba.
25 Zin wal ta tipakurkur zitun na, Yooba irekreege ruumu kizin mi mboti kizin.
Mi zin noroŋa na, ni mataana pizin: Kokena tomtom sa ipakaam zin mi ikam toono kizin.
26 Wal sananŋan na, Yooba leleene pa ŋgar kizin ri sa som kat.
Mi zin wal ta lelen ŋgeezeŋan na, ni leleene pa sua kizin.
27 Tomtom ta so mata koroŋŋana, na ni ikamam pataŋana pa wal kini.
Mi mbulu ki tiŋgiimi zin tomtom bekena tigaaba iti, ina tomini ikamam pataŋana piti. Tana tomtom ta so iurur koi pa mbulu tana, nako imbot ambai.
28 Wal ndeeŋeŋan timbot mi tikam kat ŋgar pa sua uunu muŋgu, mana tipekel.
Mi sua ta iwedet pa wal sananŋan kwon, ina ambai som kat.
29 Yooba imbotmbot molo pizin wal sananŋan.
Mi wal ndeeŋeŋan na, ni ileŋleŋ suŋŋana kizin.
30 Sombe ruŋgundu iswe iti kembei lelende ambai, nako ikam ma zin wal ta tire iti na, lelen ambai tomini.
Mi sombe teleŋ uruunu ambaiŋana sa pizin wal pakan, inako ikam ma nindi ise.
31 Sombe tomtom tipazal ti bekena tiurpe mbotŋana kiti, mi teleŋ la kalŋan,
nako tarao be tagaaba zin wal ŋgarŋan.
32 Sombe takam sua pazalŋana pa tomtom sa mi ni ileŋtut, ina ni mata pasom itunu.
Mi tomtom ta so ileŋleŋ la sua pazalŋana, na ŋgar kini ko izze.
33 Mbulu ki tomototo Yooba mi teleŋleŋ la kalŋaana, ina zaala ŋonoono tabe takam lende ŋgar ambaiŋana.
Mi sombe lelende be zanda iwe biibi, na bela tokoto itundu muŋgu.