17
1 Sombe kanda kini ri sa, mi itiŋan wal kiti lelende ambai, mi taparlup ti ma tombotmbot,
na mbotŋana kiti ko ambai ma ilip pizin wal ta kan kini biibi, mi tamen timbotmbot raama ŋoŋi.
2 Tomtom sa, sombe lutuunu ipamiaŋi, nako iur mbesooŋo kini sorokŋana sa ta le ŋgar ambaiŋana na ma iwe biibi pa lutuunu tana be imboro i.
Mi kaimer ni ko ikam mbesooŋo tana le matamur kini raraate kembei ta ikam pa itunu lutuunu bizin pakan.
3 You ikanan gol ma silba bekena kan muk ila ne ma tiŋgeeze kat.
Mi iti tomtom na, Yooba izemzem pataŋana pakan ma iwedet piti bekena itoombo iti mi ipeŋgeeze mbulu kiti.
4 Tomtom sananŋana, ni ileŋleŋ la sua ta iwedet pa wal sananŋan kwon.
Mi tomtom pakamkaamŋana na, ni iŋgungun talŋaana pizin wal ta tipasansaana tomtom urun.
5 Tomtom ta so igibgiibi sua repiiliŋana pizin wal sorrokŋan, ina ni kwoono pasom Anutu tomini. Pa ni ta iur zin wal sorrokŋan ma tipet.
Mi tomtom ta so ire tomtom toro ibaada sorok pataŋana mi leleene ambai pa, na ire i. Pa ni kola ire kadoono pa mbulu kini tana. Irao Anutu ileeli na som.
6 Tomtom ta so iwe kolman kat mi ire tumbuunu bizin, nako niini ise. Paso tumbuunu bizin tana tiwe kembei aigau pini be tomtom tiwit uruunu.
Mi zin pikin ta kembena. Nin se pa mbulu ki taman ma nan bizin.
7 Wal kankaanaŋan ta tizorzooro na, mbulu kizin pakurŋana tere kembei ambai som.
Mi sombe zin bibip ta tikamam peeze i tipakamkaam, ina ambai som kat!
8 Zin wal ta tiwadat zin tomtom pa pat bekena tito ŋgar kizin na, tindemeere pat kizin tana kembei ta naborou i.
Pa tire kembei pat tana iuluulu uraata kizin ta boozomen ma ilonloondo ambai men!
9 Iti sombe tuurur lelende pizin tomtom, nako matanda imbiriizikaala sanaana kizin.
Mi tomtom ta so izeizei lene sua kizin wal pakan mi iyyo kwoono pa, na ni irao ikam ma itiŋan torondo bizin ŋonoono taparmbot molo piti.
10 Tomtom ta so ŋgar kini ipet kek na, sombe tayaambi, nako karau men mi itooro mbulu kini.
Mi wal kankaanaŋan ta tizorzooro na, som. Sombe tabalis zin pa re pa tomto lamata, na takamam lende men. Mi irao titooro mbulu kizin sananŋana na som.
11 Wal sananŋan, ŋgar kizin imbol kat be tikam mbulu zooroŋana.
Tana kaimer biibi sa kola ila ma ibalis kat zin. Mi ni ko irao imuŋai zin ri sa som.
12 Ŋge saŋsaŋŋana ta so ipeebe na, koroŋ ambai som. Sombe la garau ŋgini kini, nako imaŋga mi ikanu.
Mi wal kankaanŋan ta tizorzooro na, zin ambai som kat. Pa mbulu kizin talliŋana irao be ipasaana katu. Tana la garau zin pepe.
13 Tomtom ta so tikam mbulu ambaiŋana pini mi ipokot pa mbulu sananŋana,
na ziŋan wal kini mbotŋana kizin ko isaana kat ma imborene ta kembei. Irao ambai mini na som. Som kat.
14 Sombe pataŋana sa ipet na, kwom la pa karau pepe. Zem sua pa.
Kokena kam ma ŋoŋi musaana ila ma iwe pataŋana biibi ŋonoono.
15 Zin bibip ta titirtiiri sua i, sombe tizem zin wal sananŋan ma tila sorok, som tiur sorok kadoono pizin wal ta len uunu sa som,
na Yooba leleene pa mbulu ru tana ri sa som kat.
16 Wal kankaanaŋan ta tizorzooro na, titeege pat pepe.
Pa zin tikam kinkiini pa ŋgar ambaiŋana som.
17 Torondo bizin ŋonoono, nako tiurur lelen piti pa mazwaana ta boozomen.
Mi toŋmatiziŋ kiti timbotmbot be tiuulu iti pa pataŋana kiti.
18 Tomtom ta so imender pa tomtom toro mi imbuk sua ta kembei: “Sombe ni irao be ikot mbun kini som, na nio ituŋ ko aŋkot.”
Na tomtom ta kembei, ni kankaanaŋana kat.
19 Zin wal ta lelen pa mbulu sananŋana, ta tiŋoŋooŋo len sorok.
Mi tomtom ta so ipo siiri biibi bekena ipakuri pa, mibe iyembut itunu pa waene bizin pakan, na ni itoto zaala tabe ipasaani.
20 Tomtom ta so ŋgar sanaŋana izeebi kek, nako irao indeeŋe mbotŋana ambaiŋana na som.
Mi tomtom ta so miaana ibogboogo, nako indeeŋe pataŋana.
21 Pikin kankaanaŋan ta tizorzooro na, tipasansaana taman bizin lelen.
Tana taman bizin ko irao lelen ambai na som.
22 Sombe lelende ambai mi menmeen ti, inako iuulu kulindi tomini be imbot ambai.
Mi sombe lelende isaana ma tombotmbot, inako ikam mete piti.
23 Wal sananŋan, sombe tomtom sa ipabeleu pat mi ikam pizin bekena tipakaam mi tiuuli pa sua kini, na zin ko tiyok pa men.
Pa mbulu ki sua urpeŋana na, zin tikamam ŋgar pa ri sa som.
24 Tomtom ta so ŋgar kini ipet kek, nako ŋgar ambaiŋana imbotmbot keren uunu totomen.
Mi wal kankaanaŋan ta tizorzooro na, matan ipinin pa koroŋ ŋonon somŋan tau timbotmbot molo pizin i. Mi ko tirao be tikam na som.
25 Pikin kankaanŋan ta tizorzooro na, ko tipasaana taman bizin lelen.
Mi nan bizin ta tipeebe zin na tomini, ko keten pakpak.
26 Sombe tuur sorok pataŋana pizin wal ta tikamam kat mbulu, ina ambai som.
Mi zin bibip tau tikamam kat uraata kizin ta kembena. Tapamiaŋ zin pepe, mi tiseeze sorok matan pepe.
27 Tomtom ta so le ŋgar ambaiŋana, nako imborro kat kwoono.
Mi zin wal ta ŋgar kizin ipet kek na, keten meeteŋan.
28 Wal kankaanaŋan, sombe timborro kat kwon mi tizzo sua pe som,
inako tomtom tire zin kembei zin tomini len ŋgar!