29
1 Tomtom ta so imbelmbel sua pazalŋana leŋŋana, mi tamen inoknok men zooroŋana,
nako lwoono sa to pataŋana biibi ipasaani. To zaala sa be imbot ambai mini na som.
2 Sombe wal ndeeŋeŋan timasak ma tiwe boozo, to tomtom menmeen zin mi lelen ambai kat.
Mi sombe wal sananŋan tikamam peeze, na tomtom lelen ipata mi tikaraŋesŋeeze.
3 Pikin sa, sombe leleene ilip be ikam le ŋgar ambaiŋana, nako ikam ma tamaana leleene ambai kat.
Mi pikin ta so igabgaaba zin moori zaala lwoono kan, nako ipasaana koroŋ ki tamaana.
4 King ta so ikamam mbulu ndeeŋeŋana men, nako ipombol zin tomtom be tikam mbulu ambaiŋana, mi lele kini imbot ambai.
Mi king ta so mata koroŋŋana mi isombe tomtom tiŋgiimi i, tona iuulu zin, nako ikam ma lele kini isaana.
5 Tomtom ta so kwoono imbesmbeeze pa waene toro,
na iurpewe kilis pini be ikeeni.
6 Zooroŋana kizin wal sananŋan ko iwe kilis pizin mi ipasaana zin.
Mi wal ndeeŋeŋan na, zin lelen ambai men mi tilonloondo ma tila pa zaala ambaiŋana.
7 Wal ndeeŋeŋan tikamam ŋgar biibi pizin wal sorrokŋan, mi lelen be tikam ŋoobo zin som.
Mi wal sananŋan na, tikamam ŋgar pa koroŋ ta kembei som.
8 Zin wal ta tipakurkur zitun mi tirepilpiili ŋgar ambaiŋana na, tipesese zin tomtom be tipasaana kar.
Mi zin wal ta len ŋgar ambaiŋana na, tipalumluumu tomtom lelen bekena keten malmalŋana kizin imap.
9 Tomtom ta le ŋgar ambaiŋana na, isombe ipamender tomtom kankaanaŋana sa pa sua,
nako tomtom kankaanaŋana tana kalŋaana izalla mi ikam sua repiiliŋana boozo pini. Irao iur niini na som.
10 Zin wal ta tipa pai kizin ma ambai men na, wal ta tikamam zaaba pizin tomtom tiurur koi pizin.
Mi wal ndeeŋeŋan na, tikamam kinkiini be tiuulu zin ma timbot ambai.
11 Wal kankaanaŋan ta tizorzooro na, tirao be tiyaraama keten malmalŋana kizin som. Tizzwe ma imbot mat.
Mi tomtom ta le ŋgar ambaiŋana na, ni iyaramraama itunu.
12 Tomtom peeze kana sa isombe ileŋleŋ la sua pakaamŋana,
na wal uraata kan kini ko timap ma tiwe wal sananŋan.
13 Wal sorrokŋan mi zin bibip ta tiseseeze tomtom matan na, zin raraate som. Mi koroŋ tamen ta ilup zin:
Yooba ipayaryaara zin mi ikiskis zin, ta timbot matan yaryaara.
14 King ta so iurpewe pataŋana kizin wal sorrokŋan ma indeŋdeeŋe men,
na peeze kini ko imbol ma imbotmbot.
15 Sombe tabalis zin tomtom mi tapazal zin, nako tikam len ŋgar ambaiŋana.
Mi sombe tezem pikin sa ma inoknok mbulu sananŋana, na kaimer ni ko ipamiaŋ naana.
16 Sombe wal sananŋan timasak ma tiwe boozo, na mbulu sananŋana ko ipet ma iwe biibi.
Tamen kaimer wal ndeeŋeŋan ko tire kat ki matan ta kembei: Wal sananŋan ko tisu ma mburan imap.
17 Pazal lutum. Naso lelem ipata som mi mbotmbot raama menmeenu.
Pa ni ko ikamu ma lelem ndabok kat.
18 Sombe Anutu kwoono bizin tizzwe sua kini som, nako tomtom timaŋga mi tikam mbulu bozboozo. Pa koroŋ sa be iyaraama zin mini som.
Mi tomtom ta so mataana iŋgalŋgal tutu ki Anutu mi itoto, nako leleene ambai mi kampeŋana ki Anutu imbotmbot se kini.
19 Nu sombe so sua men pa mbesooŋo ku, nako rao urpe mbulu kini na som.
Ŋonoono, sua ni ileŋleŋ. Mi ko irao ikan la na som. Bela nu balisi, tona ileŋ la kalŋom.
20 Wal kankaanaŋan ta tizorzooro na, ipata pizin be titooro mbulu kizin.
Mi tomtom ta so ikam kat ŋgar som, mi iwirri sorok sua, nako ipata kat pini be itooro mbulu kini.
21 Sombe mbesooŋo ku naŋgaŋŋana mi kwom ikanani pa uraata som,
na kaimer ni ko irao ikam kat uraata som, mi ikam pataŋana pu.
22 Tomtom ta so keteene bayouŋana, nako ipeyei ŋoŋi boozo,
mi itunu ikamam sanaana boozo.
23 Mbulu ki tapakurkur itundu ko ikam ti ma kanda miaŋ.
Mi sombe tomtom sa ikototo itunu mi imbesmbeeze pizin tomtom, ina zaala tabe zaana iwe biibi.
24 Nu sombe gaaba tomtom toro pa mbulu ki kuumbu, na ur itum ila pataŋana.
Pa kaimer, sombe tipamenderu, mi tiso pu be so kat sua ŋonoono ila Anutu mataana, nako kam so? Pa sombe swe mbulu ku tana, nako tiur kadoono pu. Mi sombe watkaala, nako Anutu itunu keteene malmal pu mi ipasaanu.
25 Mbulu ki tomototo zin tomtom ko iwe kilis piti.
Mi tomtom ta so ipase pa Yooba, na Yooba ko mataana pini mi imboro i ma imbot ambai. Irao koroŋ sa ipasaani na som.
26 Wal boozomen tirru zaala be tila tire zin peeze kan. Pa tiso ko zin tiuulu zin pa pataŋana kizin.
Mi tundu ŋonoono na Yooba. Pa ni ta iuluulu kat iti pa pataŋana kiti.
27 Wal ndeeŋeŋan lelen pizin wal sananŋan ri sa som.
Mi wal sananŋan ta kembena. Lelen pizin wal ta titoto zaala ambaiŋana na ri sa som kat.