13
Suŋŋana ki tomtom ta ibaada pataŋana ma molo
Mboe ki Dabit
1 O Yooba, pataŋana biibi taiŋgi imbel teegeŋoŋ kek. Ŋiizi na motom iŋgal yo mini?
Ko piŋgis motom pio, mi zem yo ma aŋbotmbot ta kembei ma alok? Ŋiizi na motom imiili pio mini?
2 Mbeŋ ma aigule na, leleŋ ipata kat mi aŋkamam ŋgar boozo.
Ŋiizi na mar uulu yo? Pa iŋgi koŋ koi ilip pio kek.
3-4 Yooba Anutu tio, re yo mi ŋgun talŋom pa suŋŋana tio ti.
Pombol yo mi payaryaara motoŋ. Kokena pataŋana taiŋgi ikoto yo, som ipun yo ma aŋmeete.
To koŋ koi bizin tirepiili yo,
mi nin se ma tiso tilip pio.
5 Mi nio na, aŋpase pa mbulu ku ta toto sua ku mbukŋana mi urur lelem pa wal ku.
Tana leleŋ ambai kat. Pa nio aŋute: Nu ko kamke yo.
6 Nio ko aŋbo mboe mi aŋpakur Yooba zaana.
Paso ni ikampe yo ma biibi.