130
Muŋaiŋana ki Anutu
Mboe kizin wal ta tizalla pa Yerusalem
1 O Yooba, iŋgi pataŋana biibi ilol yo ma kembei ta nio be aŋmon sula leŋ ta mozo lukutuunu i! Tana aŋtaŋroro u.
2 O Merere, ŋgun talŋom pa tiŋiizi tio.
Leŋ suŋŋana tio ti, mi muŋai yo lak!
3 Yooba, sombe motom kiskis mbulu boozomen ta amkamam ŋoobo na,
asiŋ ko irao be imender su kerem uunu? Som.
4 Tamen nu muŋaiŋana katuunu, mi rekreege sanaana tiam.
Tanata tomtom timototo u mi tileŋleŋ la kalŋom.
5 Nio aŋpase pa Yooba mi aŋzza i. Pa leleŋ ilip be iswe muŋaiŋana kini mi iuulu yo.
Tana aŋurur motoŋ pa sua kini mbukŋana be iur ŋonoono, mi aŋbotmbot.
6 Nio leleŋ pa Yooba ilip mi aŋurur motoŋ pini,
kembei zin menderŋan ta matan pa kar pa mbeŋ na, tiurur matan pa zoŋ.
Zin, sombe tire zoŋ pok ma ise, na lelen ambai. Mi nio ta kembena. Sombe Yooba iswe itunu mi muŋaiŋana kini pio, nako leleŋ ambai kat.
7 O niom Israel, kapase pa Yooba mi kuur motoyom pini be iuulu yom.
Pa ni itoto sua kini mbukŋana mi iurur leleene pa wal kini.
Sombe ni itatke yom pa pataŋana tiom, nako ikam ma ikam kat.
8 Tana ni itunu ko itatke yom Israel pa pataŋana tiom,
mi ireege sanaana tiom ta boozomen ma ila lene.