9
Merere iuluulu zin wal ta timbotmbot raama pataŋana
Mboe ki Dabit
1 O Yooba, nio leleŋ imap ipakuru.
Mi leleŋ be aŋsoyaara uraata ku bibip ta boozomen urun. Pa uraata ku na, ipa ndel kat.
2 Nio leleŋ ambai mi menmeen yo biibi pu.
Pa nu Anutu kor kana kat. Tana nio ko aŋbo mboe pu mi aŋpakur zom.
3 Nu sombe swe mburom pa koŋ koi bizin, nako tiko ma timiili,
mi timelmel ma timetmeete.
4 Pa nu mbotmbot se murim peeze kana mi tirtiiri zin tomtom pa mbulu kizin. Mi kadoono ta urur pizin, ina indeŋdeeŋe men.
Mi nio tomtom ndeeŋeŋoŋ, tanata nu mender pio mi uulu yo.
5 Nu swe ketem malmalŋana ku pizin wal ta matan munŋan i,
mi pambiriizi zin wal sananŋan ma timap lup.
Nu mus zan ma imap kat. Tana tomtom sa ko ikam ŋgar pizin mini som.
6 Pa nu kas koŋ koi bizin ma timap kat. Irao timaŋga mini na som.
Mi kar kizin tomini, ta reege zin ma tila len.
Tana tomtom matan mbiriizikaala kat zin.
7 Yooba, ni imbotmbot se muriini mbolŋana, mi ikamam peeze ma alok.
8 Mi ni ko itiiri wal boozomen ta timbotmbot su toono na, mi iur kadoono ndeeŋeŋana pizin.
Mi uraata tana, ni ko ikam ma ikam kat.
Pa ni ndeeŋeŋana.
9 Zin wal ta so kan koi bizin tikototo zin mi tikamam pataŋana pizin, na Yooba ko iwit zin, mi iur zin sala kor.
Ni ko iwe seraara pa kan koi bizin. Naso kan koi bizin tirao be timbuulu zin mini som.
10 Yooba, zin wal tau tiute katu, nako tipase pu.
Pa zin wal tau tikam kinkiini be tiute u mi timbot kolouŋana pu na, nu rao pizil ndemem pizin na som.
11 Kapakur Yooba zaana! Pa ni imbotmbot su kar Sion mi ikamam peeze.
Uraata ta ni ikamam na, kosoyaara uruunu pa zin karkari ta boozomen!
12 Ni ipokotkot siŋ kizin tomtom. Tana zin wal ta so timbot raama pataŋana, na ni mataana iŋgalŋgal zin.
Irao ipumun talŋaana pa tiŋiizi kizin na som.
13 Yooba, re! Iŋgi koŋ koi bizin tiseseeze motoŋ ma aŋbotmbot naala kezeene i.
Mi nio mbesooŋo ku tau. Tana muŋai yo mi tatke yo pa pataŋana taiŋgi.
14 Naso aŋmender la iwal biibi ki Yerusalem matan,
mi aŋsoyaara urum pa ulaaŋa biibi ta kam pio na,
mi aŋpakur zom raama menmeen yo biibi.
15 Wal matan munŋan tikel naala, mi tiŋgun kulumbo be tikam zin tomtom. Tamen zitun titop sula sumbuunu kizin tana.
Mi kilis ta tiur pa wal pakan na, ikam zitun.
16 Mbulu tana iswe Yooba mburaana.
Pa ni ta iur kadoono pa wal sananŋan tana,
mi mbulu ta tisombe tipasaana zin tomtom pa i, na imiili mini pa zitun.
17 Tana zin wal sananŋan ko timiili ma tisula mini toono.
Karkari boozomen ta so matan mbeleele Anutu, nako tisula Andewa.
18 Pa zin wal ta so timbot ŋoobo mi tiru zalan na, Yooba irao mataana mbeleele zin na som. Tana zin ko timbotmbot ta kembei ma alok na som.
Mi zin wal ta so timbotmbot raama pataŋana mi tiur matan pini, na ni irao itit ndomon na som. Ko iuulu zin.
19 Yooba, maŋga mi swe mburom! Kokena wal toono kan tipakur zitun ma tiso tilip pu.
Pamender zin su kerem uunu, mi ur kadoono pizin.
20 Yooba, kam zin ma timoto kat.
Pei ŋgar kizin ma tikilaala zitun kembei zin koroŋ sorok ki toono men.