18
Babilon borok su lene
1 Kaimer mana motoŋ la na, aŋre aŋela toro imbot saamba mi isu. Aŋela tana mburaana biibi kat, mi ka azuŋka iyaara ma irao toono.
2 Mi kalŋaana biibi ma isombe:
“Kar biibi Babilon borok su lene kek! Tireege ma borok su lene kek!
Iŋga muriini bilim. Matanda la na, tere mini som.
Iŋga be imbot ma iwe bubuŋana sananŋan mi man sananŋan boozomen ta lelende pizin risa som na murin.
3 Pa ni ta iyaryaaru zin king ki toono ma tikamam mbulu sanaana.
Mi ipakankaana zin karkari tomini ma tito i pa mbulu kini sananŋana.
Tabe ikam zin ma kembei tiwin yok ta mbolŋana kat ma tikankaana.
Ni mata koroŋŋana kat, ma iso ikam le koroŋ ta boozomen.
Tana wal boozomen tilala kini be tiŋgomoono koroŋ kizin, mibe tikam len kadoono.
Mi mbulu kini tana iwe zaala pizin ma tiwe mbio uunu.”
4 To aŋleŋ kalŋaana toro ta imbot saamba mi isu. Iso:
“O niom wal tio, koko pa kar tina, mi kala kombot ndel.
Kokena kagaabi pa sanaana kini, to kadoono kini sananŋana ise tiom tomini.
5 Paso, sanaana kini ta boozomen indoundou mi isala isala mabe koŋ sala saamba.
Mi mbulu kini sananŋan ta boozomen tana na, Anutu mataana iŋgalŋgal.
6 Tana mbulu ta ni ikam pizin tomtom, iŋgi be imiili pini ma ilip kat.
Pa mbulu kini sananŋana, Anutu kola ipokot pa ru.
Muŋgu moori tana itooro yok mbolŋana, mi ipiwin zin tomtom pa.
Mi iŋgi be ni kadoono iwin yok ta mbolŋana kat la itunu mbooro kini.
7 Ni muŋgu ipakur itunu mi ikam le koroŋ boozo kat irao itunu leleene.
Tana ni kola itaŋtaŋ mi ire yoyouŋana biibi ma ikot mbulu kini tana.
Pa ka gorok molo ta koroŋ to isombe: ‘A, nio iŋgi mernan ta aŋborro koroŋ ta boozomen. Ko aŋbutultul se muriŋ mi aŋbomboreŋ ta kembei.
Nio kembei nora sa, be aŋbot ŋoobo mi aŋtaŋtaŋ? Som.
Pataŋana sa ta kembei irao ipet pio na som.’
8 Mi aigule tasa, nako iporou sala pataŋana boozomen ta Anutu iur pini na.
To meeteŋana, tiŋiizi, mi peteele ko indeeŋi,
mi you ko ikani ma gubuunu men.
Pa Merere Anutu tabe iur kadoono pini i, ni mbura keskeezeŋana.”
9 Beso zin king ki toono ta tilala ma ziŋan moori tana tikamam kat mboti ambaiŋana, mi tikamam mbulu sananŋana na, matan ila na, tire you ka koi biibi izalla. To timaŋga na, titaŋ ma tikam geezeŋana pini.
10 Tamen tila tigarau i som. Pa timoto kan pa yoyouŋana biibi ta ise kini na. Tana timbot molo mi titwer la pini men. Tiso:
“Wei, tembeli kek!
A kar biibi, tembeli kek!
Babilon, ni kar zaanaŋana mi mburaanaŋana.
Mi iŋgi ikam kadoono kini ma imbiriizi karau men pa aigule suruunu rimen ŋonoono ti.”
11 Ikam ma zin wal toono kan ta tiŋgomonmoono koroŋ kizin ilala kini na, titaŋ biibi pini ma tiyeryer. Pa len tomtom sa be iŋgiimi koroŋ kizin mini som.
12 Koroŋ kizin ta kembei: Pat milmilŋan mi zanŋan tau ndabokbokŋan mi kadon bibip i, mi mburu pakan kembei ta natabu, zaara, ze, mi kawaala ta kokouŋan, totoŋan, mi siŋsiŋŋan, mi pakan ta ambaimbaiŋan kat. Mi ke ta kuzinŋan, mi koroŋ ambaimbaiŋan ta tiurpe pa elepan zoŋon, mi ke ambaimbaiŋan ta kadon bibip i, mi pat pakan ta ka mos yaryaaraŋan i,
13 mi koroŋ pakan ta kuzin ambaimbaiŋan mi kadon bibip i. Mi baen, ŋgere, kini, makau, sipsip, mi hos raama karis. Ina zin koroŋ tina. Mi zin tomtom tomini, wal tana tiŋgomonmoono zin ila kizin wal pakan be tiwe len mbesooŋo. Tana koroŋ kizin ta munŋaana men tina, ko irao tiŋgomoono mini na som.
14 Mi zin tau tiŋgomonmoono mburu ma koroŋ i ko timaŋga, mi tiso pini ma tiso:
“Wai, koroŋ munŋaana men ta kar Babilon mata berber pa be ikam, ta iŋgi imap i. Mi koroŋ kini ambaimbaiŋan boozomen ta zaana biibi pa i, ta ila lene lup. Ma iŋgi ko irao kamŋan mini som.”
15 Mi zin ta tiwe mbio uunu pa koroŋ boozo ta tiŋgomonmoono isu kar tana, nako timoto la pa yoyouŋana biibi ta ise kini na, to timbot molo mi titaŋ pini.
16 Ko tiyeryer mi tiso:
“Tembelu kek!
A kar biibi, tembelu kek!
Muŋgu nu rru pa mburu kokouŋan, totoŋan, mi siŋsiŋŋan men.
Mi kamam aigau pa mburu milmilŋan mi pat ndabokbokŋan men.
17 Tamen, aigule suruunu rimen ti, mi mburu ku ambaimbaiŋan ta boozomen tina tisaana lup.”
Mi zin peeze kan ta boozomen ki wooŋgo ta kembena. Ko ziŋan zin tomtom pakan ta ziŋan tikwayai pa tai keteene i, mi zin uraata kan ki wooŋgo timbot molo pa tomini.
18 Mi tire la pa ka kakoi ta izalla na, mi titwer ma tiso ma kalŋan biibi ta kembei: “We, kar toro sa ko irao kar biibi tiŋga?”
19 Tana timoŋ zin pa koskoozo, mi titaŋ ma tiyeryer, mi kalŋan biibi ma tisombe:
“Tembelu kek!
A kar biibi, tembelu kek!
La lem mi iŋgi be niam amru zoloyam i.
Niam tomtom tai koyam ta boozomen ti amwe mbio uunu pa nu tau.
Tamen aigule suruunu rimen ti, mi tipasaanu ma map kat!”
20 Tana niom ta kombot kar saamba na, menmeen yom. Pa kar Babilon ila ne kek. Mi niom ta kewe Anutu wal kini potomŋan na, niomŋan zin tau tiwe Anutu kwoono, mi zin ŋgoŋana kini na, menmeen yom. Pa mbulu ta Babilon ikam piom, ta Anutu ipokot kek.
21 Tona aŋre aŋela mburaanaŋana ta ikam pat ta siŋaanabi kat, mi ipundu sula tai mi iso:
“Kar biibi Babilon, ko tipundu i ma isula lene ta kembei.
Mi ko irao tere i mini som.
22 Tomtom sa ko imbot kar Babilon mini be ise kombom, mi iwi twiiri ma mamaaza, mi imbo mboe ma iwal tileŋ na som.
Mi wal kini ta tizabzap len koroŋ pakan be tiŋgomoono na, kizin sa ko ipa pa kar keteene mini som.
Mi pat bibip ta tiurpewe palawa pa na, inako tikam uraata pa mi kan orooro isala mini na som.
23 Mi tomtom sa ko imbot mini be itun lam mi iyaara na som.
Mi ula ta kembena. Sa ko ipet su Babilon mini som.
Muŋgu wal kini ta tiŋgomonmoono koroŋ na, zin zan mi mburan bibip. Tilip pa wal boozomen ta timbotmbot toono na.
Mi naborou kini ta ipandelndel zin iwal karkari.
24 Mi tere na, kembei wal potomŋan ki Anutu mi kwoono bizin ziŋan wal ta boozomen, ta siŋ kizin isu kar tana ma isaana.”