EPHESUS-GI
Misingda I-ba Paul-gi Chithi
Wahoudok
Paulna Ephesus-ki misingda i-ba chithi asi chaorakna AD 61 aduwaida, Pual na Rome-gi keisumsangda leiringeida ikhibani. Chitthi asida ihan hanbada, swarga amasung malemda leiriba Tengban Mapugi khutsem pumnamakpu Christtana makok oiraga amata oina punsinba adu puraknaba Tengban Mapugi thourang adugi maramda i (1:10). Jisu Christtada amata oibagi mapanna mioiba phurup pumnamakna amata oina punsinbinabagidamak toubiba thourang asigi wahanthok aduda Tengban Mapugi misingna hingnanaba masida mahakna hairi.
Chithi asigi ahanba sarukta Paul-na, Ipa Ibungo Tengban Mapuna mahakki misingbu khandokpibagi lambi, Machanupa Jisu Christtagi mapanna karamna makhoibu pap kokpiba amadi makhoigi paptagi ning tamhanbiba, aduga Tengban Mapugi chaoraba wasak adubu Thawai Asengbagi mapanna soidre haibagi shakhi piba, hairibasing asi haiduna apunbagi hiram adu sagatli. Aduga anisuba sarukta apabasingda, makhoina Christtada amata oiminnaba adu makhoigi punsidasu asengba oibaga loinana hingminanaba kanna hairi.
Christtada punsinjaduna Tengban Mapugi misingna amata oiba adu utnanaba tongan tongba wahei wata kaya sijinnei: Madudi, singlup haibasi Christtana makok oiba hakchang amagumbani, aduga Christtana chithekki nung oiba yum amagumbani, aduga Christtana mapuroiba oiba keinya amani haibasini. Christtada leiba Tengban Mapugi thoujal adugi wakhalna ayiba asibu chingbiduna chithi asibu phongdokpagi awangba thak adu youna kahalli. Pot pumnamak Christtagi nungsiba, katthokpa, ngakpiba, amadi thoujalgi asengba mangalda uba phang-i.
Yaopham Takpa
1. Wahoudok (1:1-2)
2. Christta amasung singlup (1:3–3:21)
3. Christtada anouba punsi (4:1–6:20)
4. Waroisin (6:21-24)
1
1 Tengban Mapuna ningbibagi mapanna Jisu Christtagi pakhonchatpa ama oiriba Paul eihakna,
Christta Jisuda thajaba yaba oiriba Ephesus-ta leiriba Tengban Mapugi asengba misingda:
2 Eikhoigi Ipa Ibungo Tengban Mapu amadi Ibungo Jisu Christtana nakhoida thoujal amadi ingthaba pinabiba oisanu.
Thawaigi oiba yaipha thoujalsing
3 Eikhoigi Ibungo Jisu Christtagi Tengban Mapusu, mapasu oiba Ibungo mahakpu eikhoina thagatsi. Maramdi eikhoibu Christtaga amata oina punsinnahanbiduna swargada leiba thawaigi yaipha thoujal pumnamakka loinana mahakna eikhoibu yaipha thoujal pinabire.
4 Maramdi eikhoina Ibungogi mangda asengba oinaba amadi aranba leitananaba malem taibangpan asibu semdringeigi mamangdagisu eikhoibu Christtaga amata oina punsinhanbiduna Tengban Mapu na eikhoibu mahakki oinabagidamak khandokpire.
Mahakki nungsibana maram oiduna,
5 Jisu Christtagi mapanna eikhoibu mahakki machasing oinanaba mahakna hanna leppikhre, masi mahakki apenba amadi aningba aduni.
6 Mahakki nungsiraba Machanupagi mapanna mahakna eikhoida lemna pinabikhraba mahakki thoihellaba thoujal adugidamak eikhoina Tengban Mapubu thagatsi.
7 Maramdi Tengban Mapugi marang kairaba thoujal adugi matung-inna Christtagi ee-gi mapanna eikhoibu handokpire, haibadi eikhoigi papsing adu kokpire.
8 Thoujal adu mahakna eikhoida mapan naidana pinabire!
Lousing amadi khangba ngamba pumnamakka loinana,
9 Mahakna thourangjakhraba adu Tengban Mapuna pangthokle, aduga Christtagi mapanna mapung phahange haina hanna lepkhraba athuppa thourang adu eikhoida khanghanbire.
10 Achaba matam aduda Tengban Mapuna mapung phahanbigadaba thourang adudi Christtana makok oiduna swarga amadi malemda leiba khutsem pumnamakpu amata oina punsinbiba aduni.
11 Thabak pumnamak Tengban Mapuna thourangbiba amadi wareppikhiba adugi matung-inna tou-i. Aduga ahoubadagi houna mahakna lepkhraba aduda yumpham oiba, mahak masagi oiba thourang adugi matung-inna eikhoibu Christtga amata oina punsinbiduna Tengban Mapuna eikhoibu mahak masagi oiba mising oinaba khandokpire.
12 Adu oirabadi Christtada asha thamjabada ahanba oiriba eikhoina Tengban Mapugi matik mangal adubu thagatsi.
13 Aduga nakhoina achumba wa adu haibadi nakhoida aran-khubham purakpa Aphaba Pao adu tabada nakhoisu Tengban Mapugi mising oirakle. Nakhoina Christtada thajare aduga Tengban Mapuna wasakpikhiba Thawai Asengba adu nakhoida pibiduna mahakki mi oire haibagi chum adu nakhoida nambire.
14 Thawai Asengba asimak Tengban Mapuna mahakki oiba misingda wasakpikhibasing adu eikhoina phangjagani haibagi warep-sel aduni, aduga Tengban Mapuna mahakki oikhrabasing aduda mapungphaba ningtamba pibigani haibadu soidre haiba masina khanghanbire. Mahakki matik mangal adu eikhoina thagatsi.
Paul-gi haijaba
15 Maram asigidamak, Ibungo Jisuda leiriba nakhoigi thajaba amasung Tengban Mapugi mising pumnamakpu nakhoina nungsijaba adu eina hek taba adudagi houduna,
16 Eigi haija haijabada nakhoigidamak ningsingjei, aduga nakhoigidamak eina Tengban Mapubu thagatchaba lepchade.
17 Aduga eikhoigi Ibungo Jisu Christtagi Tengban Mapu, matik mangalgi Mapa aduda, nakhoina mahakpu henna khangnanaba nakhoida lousing amasung phongdokpibagi Thawai adu pibinaba eina nijei.
18 Amasung nakhoigi pukning adu hangdokpiduna mahakki mangal adu ujananaba eina Tengban Mapuda nijei. Madu mahakna nakhoibu koubibagi asha adu karino haiba nakhoina khangnanaba amadi mahakki asengba misingda mahakna wasakpiramba angakpa yaipha thoujal adu kayada marang kaibano haibadu nakhoina khangnanabani.
19 Amasung madu thajaba eikhoida thabak toubiriba mahakki panggal adu kayada chaobano haibadu nakhoina khangba ngamnanabani. Masigi eikhoida thabak touriba panggal asiga,
20 Mahakna Christtabu asibasinggi maraktagi hinggat-hanbiba amasung mahakpu swargagi oiba maphamda mahakki yet thangba nakanda phamhanbiba matamda mahakna sijinnakhiba mahakki matik leiraba panggal aduga amatani.
21 Christtana swargagi leingakpasing, matiksing, pangalsing amasung mapusing pumnamakki mathakta palle; amadi taibangpan asidata nattana lakkadaba adudasu Christtagi mingna matik pumnamakki minggi mathakta lei.
22 Aduga Tengban Mapuna pumnamak Christtagi khuyada thamle, aduga pumnamakki makok oinanaba Christtabu singlupta pibire.
23 Singlupti Christtagi hakchangni. Pumnamakpu maram pumnamakta mapung phahanbiba Ibungona singluppu mapung phahanbi.