JOHN-NA
I-ba Ahanba Chithi
Wahoudok
Ahanba John hairiba chithi asi Christtana pokpa matung chahi 50 dagi 100 phaobagi manungda Pakhonchatpa John-na i-rambani. John-na chithi asigi a-iba adu mahakni haina sak taklamde adubu chithi asigi ahanba pandupta mahak Jisuna hinglamba amadi sibadagi hinggatpa adu mitna uhouba misak amani haina utli (1:1-3). I John-da i-ba mawong asiga John-na i-ba Aphaba Pao adugi i-ba mawong adugasu yamna manei. John-na i-ba Aphaba Pao aduga chithi ahum haibadi 1 John, 2 John amadi 3 John hairibasing asi John-na Ephesus-ta leiringeida i-bani haina thajanei.
John-na chithi asi Christian pumnamakta i-bani, matam aduda “Gnostic” kouba mioi kangbu amana maram oiduna singlupna khudong chadaba thengnariba matamni. Mioising asina Jisudi mapung phana Tengban Mapu oibani adubu ee-tonggi hakchang panba tasengba mioiba ama natte haina thajarammi. Masigi maramgidamak Jisuna hingba uhouba amadi mahakki makhutmakna soklaba (1:1-3) adugi maramda John-na i-bani. Chithi asi, mahakki haraoba mapung phahannaba (1 John 1:4) thajabasingna pap touba thingnanaba (1 John 2:1) thajabasingbu aranba tambibadagi ngakthoknaba (1 John 2:26) amasung thajaba makhoising adu kanbiba phangle haibasi soidrabani hainanaba John-na i-bani (5:13).
Yaopham Takpa
1. Chithi asibu masak takpa amadi masi i-bagi maram ama piba (1:1-4)
2. Tengban Mapudi mangalni amadi Jisuna hinglamba matougumna eikhoinasu hinggadabani haiba adu sugaina takpa (1:5–3:10)
3. Amaga amaga nungsinou haiba yathang adu mahakna eikhoida ningsingba (3:11–5:12)
4. Mahakki chithi adu loisinba (5:13-21)
1
Hingbagi wa
1 Ahoubadagi leiraklaba, hingbagi Wa adugi maramda nakhoida eikhoina i-ri. Eikhoina madu tare, eikhoigi imitna ure; hoi, eikhoina ujare amasung eikhoigi khutna madu sokle.
2 Hingba adu uhanbire; eikhoina madu ujare amadi madugi maramda eikhoina sakhi pi amasung eikhoida uhanbiba amadi Mapa Ibungoga leiminnaramba lomba naidaba hingba adu eikhoina nakhoida laothok-i.
3 Nakhoisu eikhoiga tinanaba eikhoina uraba amadi taraba adu nakhoida laothok-i. Eikhoigi tinnaba adudi Mapaga amadi mahakki Machanupa, Jisu Christtagani.
4 Eikhoigi haraoba mapung phahannaba eikhoina masi ijabani.
Tengban Mapudi mangalni
5 Eikhoina mahakki Machanupadagi taraba amadi nakhoigi naphamda laothoklaba paojel adu asini: Tengban Mapudi mangalni, aduga mangonda amamba amata leite.
6 Eikhoina Ibungo mahakka tinajei hairaga amambada hinglabadi, eikhoina wahei amadi thabak animakta minamle.
7 Adubu mahakna mangalda leibagumna eikhoinasu mangalda leirabadi, eikhoi amaga amaga tinnaba phangle, aduga mahakki Machanupa Jisugi eena eikhoibu pap pumnamaktagi sengdokpi.
8 Eikhoina eikhoida pap leite hairabadi, eikhoi isa ithanta minamjare amasung achumba adu eikhoida leite.
9 Adubu eikhoina eikhoigi papsing Tengban Mapuda haidokcharabadi, mahakna mahakki wasak adu ngakkani amadi achumba adu tougani: Ibungo mahakna eikhoigi papsing kokpigani amasung aranba touba pumnamaktagi sengdokpigani.
10 Eikhoina pap toude hairabadi, eikhoina Ibungo mahakpu minamba oihalle, amasung mahakki wa eikhoida leite.