MATTHEW-NA
I-ba Aphaba Pao
Wahoudok
Matthew-na i-ba Aphaba Pao asi A.D. 50 aduwaida ikhibani. Lairik asida Ibungo Jisu asi thabirakkani haina wasakpiramba kanbiba mapu aduni haibagi nungairaba pao adu takpiri. Mapu Ibungona Ariba Warepnabada mahakki misingda wasakpikhibasing adu Ibungo mahakki mapanna thunghanbi. Nungaiba pao asi Ibungo mahakna pokkhiba amadi hourakkhiba Jihudi mising adukhaktagi nungaiba pao nattaduna taibang pumbagi nungaiba pao oikhi. Matthew lairik asi cheksinna mathang manao naina i-ba lairikni. Lairik asi Jisu pokpadagi houraga baptize louba, athemba maiyoknakhiba, amadi Ibungo mahakna Galilee-da pao sondokpa, tambiba amasung anaba phahanbagi thougal toubagi maramda sandokna takpiri. Masigi matungda Jisuna Galilee-dagi Jerusalem tanna chatpa amadi Ibungona sigadaba amasung hinggatkadaba adugi aroiba chayolda thokkhiba thoudoksing adusu i-ri.
Lairik asida Jisubu Tengban Mapugi Wayel Yathanggi wahanthok sandokna haiba ngamba amadi Tengban Mapugi Ningthou leibakki maramda tambibagi matik leiba oja ama oina utpi. Ibungona tambiba ayamba adu hiram mangada punna supchinba yai: (1) Lamchatki, thoudanggi, khudongchabasinggi, amadi Tengban Mapugi ningthou leibakki misingna akonbada oirakkadaba phibhamgi maramda Ibungona Chingthakta Pao sandokpa (pandup 5-7); (2) Thoudanggi maramda Ibungogi tung-inba makhoi taranithoida piba paotak (Pandup 10); (3) Swarga leibakki maramda piba pandamsing (Pandup 13); (4) Tung-inba haibasi karino haiba tambiba (Pandup 18); amasung (5) Houjikki oiba taibangpan asi mangkhigadabagi amadi Tengban Mapugi leibak adu lakkadabagi maramda tambiba (Pandup 24-25) asising asini.
Yaopham Takpa
1. Jisugi Pari-puri amadi Jisu pokpa (1:1–2:23)
2. Baptize toubiba John-na Tengban Mapugi thougal touba (3:1-12)
3. Jisuna baptize louba amasung Jisubu Satan-na themba (3:13–4:11)
4. Jisuna Galilee-da miyam marakta Tengban Mapubu thougal touba (4:12–18:35)
5. Galilee-dagi Jerusalem-da Lakpa (19:1–20:34)
6. Jisuna thawai thadringei mamanggi aroiba chayol (21:1–27:66)
7. Jisuna sibadagi hinggatpa amadi miyamda uhanbiba. (28:1-20)
1
Jisugi pari puri
(Luk 3:23-38)
1 Isinduna thamliba asi David amadi Abraham-gi charon suron oiriba Jisu Christtagi pari purigi maramdani.
2 Abraham-na Isaac pok-i, Isaac-na Jacob pok-i, Jacob-na Judah amasung mahakki machin manaosing pok-i.
3 Aduga Judah-na Perez amasung Zerah pok-i, amasung Tamar-na makhoigi mamani. Aduga Perez-na Hezron pok-i, Hezron-na Ram pok-i.
4 Aduga Ram-na Amminadab pok-i, Amminadab-na Nahshon pok-i, Nahshon-na Salmon pok-i.
5 Salmon-na Rahab louduna Boaz pok-i. Aduga Boaz-na Ruth louduna Obed pok-i. Adudagi Obed-na Jesse pok-i.
6 Jesse-na David ningthou pok-i; aduga David-na Uriah-na louramba nupi adu louduna Solomon pok-i.
7 Aduga Solomon-na Rehoboam pok-i, Rehoboam-na Abijah pok-i, Abijah-na Asa pok-i.
8 Aduga Asa-na Jehoshaphat pok-i, Jehoshaphat-na Jehoram pok-i. Jehoram-na Uzziah pok-i.
9 Aduga Uzziah-na Jotham pok-i, Jotham-na Ahaz pok-i, Ahaz-na Hezekiah pok-i.
10 Aduga Hezekiah-na Manasseh pok-i, Manasseh-na Amon pok-i, Amon-na Josiah pok-i.
11 Aduga makhoibu Babylon-da lanpha oina puba matam aduwaida Josiah-na Jeconiah amasung mahakki machin-manaosing pok-i.
12 Adudagi makhoibu Babylon-da lanpha oina pukhraba matungda, Jeconiah-na Shealtiel pok-i, Shealtiel-na Zerubbabel pok-i.
13 Aduga Zerubbabel-na Abiud pok-i, Abiud-na Eliakim pok-i, Eliakim-na Azor pok-i.
14 Aduga Azor-na Zadok pok-i, Zadokna Akim pok-i, Akim-na Eliud pok-i.
15 Aduga Eliud-na Eleazar pok-i, Eleazar-na Matthan pok-i, Matthan-na Jacob pok-i.
16 Aduga Jacob-na Mary-gi mapuroiba Joseph pok-i. Mary-na Christta kouba Jisu-bu pok-i.
17 Asumna Abrahamda-gi houraga David phaobagi miron pumnamak asi taramarini. Aduga David-tagi houraga makhoibu Babylon-da lanpha oina pukhiba phaoba miron taramarini. Aduga Babylon-da lanpha oina pukhibadagi Christta pokpa phaoba adu miron taramarini.
Jisu pokpa
(Luk 2:1-7)
18 Jisu Christta asi matou asumna pokkhi. Ibungogi mama Mary asi Joseph-ka luhongnabagi waroinaraga, makhoi ani leiminadringeigi mamangda mahak Thawai Asengbagi mapanna mironle haiba khanglakle.
19 Adubu Joseph achumba chatpa mi ama oiba maramna, Marybu miyam mangda phongdoktuna ikai phiruk khumhanninglamde. Maram aduna mahakna mana-manin naidana Mary-bu thadoklage haina leplammi.
20 Aduga mahakna asumna khallingeida, yeng-u, Mapu Ibungogi dut amana mamangda uhanbiduna asumna hairak-i, “He David-ki macha Joseph, Mary-bu nahakki nupi oina loubada kiganu, Maramdi mahakna naopuriba angang adu Thawai Asengbadagini.
21 Aduga mahakna machanupa ama pokkani, nahakna mahakki maming Jisu thon-gadabani. Maramdi mahakna mahakki misingbu makhoigi paptagi kanbigani.”
22 Mapu Ibungona Tengban Mapugi wa phongdokpa maichousinggi mapanna phongdokpikhiba wasing adu thungnanaba pumnamak asi thoklare,
23 “Yeng-u, leisabi asengbi amana mironduna machanupa ama pokkani, aduga mahakki maming Immanuel kougani, masigi wahanthokti ‘Eikhoiga leiminaba Tengban Mapu’ haibani.”
24 Aduga Joseph-na tumlambadagi hougatlaga, Mapu Ibungogi dut aduna piramba yathang adugi matung inna mahakna Mary-bu luhongduna loure.
25 Adubu Mary-na machanupa adu poktriba phaoba Joseph-na mahakka phidinnaramde. Aduga mahakna angang adugi maming Jisu thonkhi.