TIMOTHY-DA
I-ba Paul-gi Anisuba Chithi
Wahoudok
2 Timothy asi Paul-na mahakki tung-inba Timothy-da i-ba anisuba chithini. 2 Timothy asi Paul-gi punsi loiramdaida ibani. Matam asida mahak Rome-da phadok taduna leibani (2 Timothy 1:16). Paul-ga Timothy-ga naknaba mari leirammi, mahakna Timothy-bu ichanupa haina kayarak palli (Philippians 2:22; 1 Timothy 1:2, 1:18).
Chithi asi Paul-na singlupta nattaduna misak amada i-ba chithi marigi manungda amani. Atoppa chithi ahumdudi 1 Timothy, Titus amasung Philemon-ni. 2 Timothy i-ba matam aduda Rome-gi ningthourenna panba lamsingda Christian-singbu ot-neirammi. Paul-na keisumsangda leiba amadi mahakna Timothy-da awa ana khaangnaba paotak piba adu masigi maramna oiba yai. 1 Timothy-da i-khibagumna lanna tambibasinggi maramda cheksin wasing piri (1 Timothy 1:16-18). Khudong thiba matamsing thengnarakkani hainasu mahakna Timothy-da hairi (3:1).
Yaopham Takpa
1. Chithi asi Paul-na Timothy-bu khurumlaga hou-i (1:1-2) aduga mahakpu pukning thougatli (1:3-18)
2. Timothy-bu khaangba kannaba kanna thougatpi (2:1-13)
3. Mathangda mayamgi oiba paotak khara mahakna Timothy-da piri (2:14-26)
4. Tungda thorakkadaba thoudoksinggi maramda amadi madusing adu karamna achumba mawongda thengnagadage haibadu mahakna Timothy-da hairi (3:1–4:8)
5. Paul-na masagi oiba wa khara Timothy-da hairaga chithi asi loisilli (4:9-22)
1
1 Tengban Mapugi aningbagi matung inna Christta Jisugi pakhonchatpa oiriba amadi eikhoina Christtaga tinnajabadagi phangjaba wasakpikhraba hingba adubu phongdoknaba thabiraba Paul eihakna,
2 eihakki nungsijaraba ichanupa Timothy-da:
Ipa Ibungo Tengban Mapu amadi eikhoigi Mapu Ibungo Christta Jisuna nahakpu thoujal, chanbiba amasung ingthaba pibiba oirasanu.
Thagatpa amasung thougatpiba
3 Eigi ipa ipusingna tourambagumna, asengba achum aran khangba pukningga loinana eina thougal toujariba Tengban Mapubu thagatchei. Eina ahing nungthil animakta haijabada nahakpu ningsingduna Ibungo mahakpu thagatchei.
4 Nahakki takhiba pi adu eina ningsing-i, eihak haraobana thannaba eina nahakpu unaba yamna pamjei.
5 Nabok Lois amasung nahakki ima Eunice-tasu leiramba thajaba adugumna nahakki taseng tasengna thajaba adu eina ningsing-i. Madu nangondasu lei haiba eina tasengna thajei.
6 Maram asigidamak eina nangonda khut thambikhiba matamda Tengban Mapuna nangonda pibikhiba khudol adu meigumna chakkhat-handuna thamnaba eina nangonda ningsingli.
7 Maramdi Tengban Mapuna eikhoida akibagi thawai pibide; adubu panggalgi, nungsibagi amasung masa khudum chanbagi thawai pibi.
8 Maram aduna eikhoigi Mapu Ibungogi maramgidamak sakhi pibada ikaiganu; aduga Christtagi maramgidamak phadok oiriba eigidamaksu ikaibiganu. Adubu Tengban Mapugi panggalgi mapanna aphaba paogidamak awabada eiga loinana saruk yaminnasi.
9 Ibungona eikhoibu kanbire amasung Ibungo mahakmakki mi oinaba eikhoibu koubire, masi eikhoina toukhiba karigumba thabak amagidamak natte adubu Ibungo mahakki ningba amasung thoujalgi matung innani. Thoujal asi taibang leisemdringei mamangda Christta Jisugi mapanna eikhoida pibire,
10 adubu houjikti, eikhoigi Kanbiba Mapu Christta Jisuna lengbirakpagi mapanna madu eikhoida utpire. Ibungona asibagi panggalbu manghalle aduga aphaba pao asigi mapanna hingba amasung sinaidaba punsi adu mangalda pubire.
11 Atoppa phurupsingda aphaba pao asi sandoknaba Tengban Mapuna eibu pakhonchatpa amasung tambiba oja ama oina khandokpibani
12 Maram asigidamak eihakna awabasing asi khaanglibani. Adubu masina eibu ikaihande maramdi eina thajariba mahak adu eina khang-i, aduga eina mangonda sinakhiba adu numit adu phaoba ngakpi senbiduna thamba ngammi haiba eina tasengna khang-i.
13 Eina nangonda takpi tambikhiba achumba waheising adu nahakna in-gadaba pandam oina chetna paiyu, aduga Christta Jisuda leiba thajaba amasung nungsiba aduda lengdana leiyu.
14 Nangonda sinakhiba aphabasing adu, eikhoigi nungda leiriba Thawai Asengbagi panggalgi mapanna ngaksellu.
15 Phygelus amasung Hermogenes yaona Asia-da leiba pumnamakna eibu thadoklamle haiba nahak khangliba aduni.
16 Onesiphorus-ki imung manungda Mapu Ibungona chanbiba oirasanu, maramdi mahakna eibu yamna toina pukning thougatpi. Eina keisumsangda leiba asi mahakna ikaikhide,
17 adubu mahakna Rome-da hek thungbaga eibu phangdriphaoba mahakna eibu thibani.
18 Numit aduda Mapu Ibungona Ibungo mahakki chanbiba mangonda pibiba oirasanu! Ephesus-ta mahakna eibu kayagi matik pangbikhiba adu nahakna sengna khangliba aduni.