Ioni ena leta nugweta
Leta ana alamani weaqina
Baʼe leta nana Ieisu ana toʼabiboda Ioni ʼinega. Baʼe Ioni nana wese ena leta vemagilafuna be vetoina ʼwayavidi. Ta wese buki taha Ieisu Valena Aqiaqina weaqina be Veʼita buki nana taunega ʼwayavidi.
Ta baʼe leta nana ʼwayavia mana nuanuana toʼekalesia navona iuledi maʼoda ina veʼaidega ʼaiqa Yaubada ta Natuna Ieisu Keliso maega. Ta wese veʼita tunutunuqina neidi Ieisu weaqina, mana toveʼita luveifadi ilugu tovetumaqana adi qabu gamonaya, ta taudi edi veʼita ʼinega ivonaya vonigo Ieisu ge davetomotau tuta nana mai bwaʼobwaʼoya. Ta wese edi veʼita luveifana ʼinega ivonaya vonigo ge taha toga ana fata be ʼetoyavua nalobei ʼeguma tomotau nana nanuanua ena toa bwaʼobwaʼoya weaqina. Ta Ioni tovetumaqanayavo vematamagilafuyedi baʼe veʼita nana luveifa otaqina, ʼinega ge wese ina matayagei, mana fole vetoatoasiʼi naʼifoqe edi veiaiana ʼinaya.
Ta wese simana ʼidia Ieisu tauna vonahaqiaqi vetomotau tuta nana mai bwaʼobwaʼoya. Ta wese vona waiwaina neidi maʼoda ma ediavo veyoluba ilivuna ʼinega ina toa ʼaiqa.
Leta gamona
1:1-4 Vona mayawaina
1:5–2:29 Simatala be velovelovana weaqina
3:1-24 Yaubada natunavo be Seitani natunavo weaqidi
4:1-6 Vonahaqiaqi ta uʼava weaqina
4:7-21 Veyoluba ana ilivu weaqina
5:1-21 Vetumaqana ta venoqi weaqina
1
Vona mayawaina
1 Yaʼa ta wese tovaletuyana qabudi maega avevematamagilafuyemi taha toga Valena weaqina. ʼAbiboda be bwaʼobwaʼo naʼifoqe, ta tauna nugweta toatoa. Baʼe Vale nana imaʼa niʼau anoqolia ta matamega aʼitea, ta wese nimamega agitonovia. Tauna Yaubada ena Vona, ta baʼe Vona nana Vona mayawaina.
2 Baʼe Yawai nana lova Tamada maega itoatoa, ta Yaubada ena nuenuega Yawai nana giveʼifoqeyea ʼimaya vetomotau e ʼinega tomotau qabudi adi fata ina ʼitea. Imaʼa amaduʼitea e ʼinega baʼitagana baʼe Yawai nana toatoa vatayana asimasimana ʼifoqeyea ʼimia.
3 Yani baʼena imaʼa matamega aʼitea ta teniqamega anoqolia, ʼinega weaqina avonevonemi be yaqisa omiʼa be imaʼa kana veiaiana aqiaqi. Ta eda veiaiana nana Yaubada Tamada be Natuna Ieisu Keliso taudi maega.
4 Baʼe yani diavona weaqina aʼwayaʼwayavidi ʼimia be yaqisa omiʼa be imaʼa kana qaiawa, e ʼinega eda qaiawa naveqidua vaʼine.
Yaubada ena simatala ʼinaya kana toa
5 Ieisu Keliso Vale Aqiaqina neima, ʼinega Vale nana asimasimana ʼifoqeyea ʼimia, ta ana alamani baʼe: Yaubada tauna simasimatalina, ta ge taha ana tufwa velovelovana ʼinaya daʼenoʼeno.
6 ʼInega ʼeguma taudega kana vonaya vonigo itaʼa niʼau Yaubada maega kaluvetuba ta kaveveiaiana, ta nawale velovelovana ana ilivu ʼinaya katoatoa, e ʼinega itaʼa toʼeuʼauʼava eda vona ʼidiega ta wese eda viaqayavo ʼidiega.
7 Ta ʼesi ʼeguma Yaubada ena simatala ʼinaya katoatoa ʼidewani taunega wese ena simatala ʼinaya toatoa, e ʼinega itaʼa ma edavo kaveveiaiana aqiaqi. Ta Ieisu Yaubada Natuna sulalinega givevunavunaqida luveifana qabudi ʼidiega.
8 Ta ʼeguma itaʼa kana vonaya, “Ge taha eda luveifamo”, e ʼinega taudega kauʼauʼaveda ta Yaubada ena vonahaqiaqi kanogenogea.
9 Ta ʼesi ʼeguma eda luveifanayavo kana simana ʼifoqeyedi Yaubada ʼinaya, e ʼinega tauna luveifa diavona naʼewa yavuledi be nanuataqoda, ta wese naʼawatunutunuqeda. Tauna ana fata baʼe yani diavona naviaqidi, mana tauna ma ana vetumaqana ta wese tauna Toluvine tunutunuqina.
10 Ta ʼeguma taudega kana vonaya vonigo itaʼa ge taha luveifana kada viaqia, e ʼinega itaʼa Yaubada kaveʼewea vonigo tauna touʼava. Ta baʼe vona nana ʼinega Yaubada ena veʼita aqiaqi ge kada ʼawahaqiaqiea ta veʼita nana giwalidaya ge daʼenoʼeno.