19
1 Saŋ maŋ nʼa illiga tarkuuse a kandaane aa golla ki ɗoŋ duuru ɓaadaŋ. Golla gette tʼa ruute, tʼede: «Aleluya! Kun amma Galmeega Raa! Yoŋ Wede kʼUttiyadiŋ. Darƴika, toogo kaneʼŋ ki yode Raaziŋ.
2 Yi ɗekkiyo booro ɗerec ki diine. Geeger meeda boliyo, booratú yi-ti ɗikke kono ɗoŋ siiɗo ti tiʼn nukke ti boliykatú. Tôwwo ki ɗoŋ naabadí yi-ti duuze a tode toŋ maŋ.»
3 Wo golla gette tʼa ruute sey, tʼede: «Aleluya! Kun amma Galmeega Raa! Saa ki geeger meeda ere an aa tʼuyye gette ti koliyo ki daayum!»
4 Kane ɗoŋ deero ada sire makumu piɗe ti seyɗi piɗe geŋ an di-dikke, an dʼuttile a Raa wede i-guune a kaakido mozikadí, anʼde: «Eyye! Aleluya! Kun amma Galmeega Raa.»
Ono ombiɗe ki tarnaape ki seeɗu kʼerewo
5 Ti kaakido moziko gette i dʼize golla, tʼa ruute, tʼede: «Kune ɗoŋ naabadí pay geŋ, kun amma Raaziŋ, kune ɗuwo pay deero sun̰n̰i, kun i ottilo.»
6 Saŋ maŋ nʼa illiga tarkuuse aa golla ki ɗoŋ duuru ɓaadaŋ, i-ɗurriyo aa ooye goole yʼokko, wo aa eɗɗiso mizzi. Golla gette tʼa ruute, tʼede: «Aleluya! Kun amma Galmeega Raa toogadí tʼa jiire pay, kono yʼomɓo mozikadí baa!
7 Ulbiŋ in iso uŋse wo in lekko tʼuŋsuwo. In yʼamma, kono onniyo ere Ulo Damu yʼa seeɗa eddí tʼiina, tode eddí toŋ ti tʼikkima tuddutú.
8 An i dʼeele kalle majjaane kamilen̰ i ralita wic wic. Kalle majjaane geŋ, i-kaza naabo ere ki diine ki ɗoŋ ki Raa.»
9 Maaleeka yʼo di ruute, yʼede: «Ki raaŋa, uŋsuwo a kane ɗoŋ soo anʼni wiiko a tarnaape seeɗu kʼUlo Damu.» Wo yʼo di ruute sey, yʼede: «Geŋ ono ɗoŋ ɗerec uɗɗe ti bize Raa.»
10 Maŋ nʼa iire a zoŋɗí nʼa dikke ki tammadí, miŋ yoŋ yʼo di ruute, yʼede: «Kʼoolo, kʼo ottile ye, kono nuŋ toŋ maŋ wede naabo aa kee, wo aa zemɓadá ɗoŋ umɓe a ono ɗoŋ Isa yi ruutite. Kee ki ottilo a Raa, kono ono ɗoŋ Isa yi ruutite geŋ kane ɗerec, kane geŋ miŋ ono ɗoŋ Raa yʼan ele a bize nebiyagi an di ruutite.»
Wede a ti gili a puzu tuware
11 Saŋ nʼa wulle kandaane a tʼihina, wo i dʼuɗɗo puzu tuware. Wede a ti gili eego an yi waaku sundí «Wede Ɗerec, yi seeɗu zakiɗi a munɗa wede yi ruute yʼaasa», yi ɗekkiyo booro wo yi ɗeyyiso a urzi wede ki diine.
12 Wo edayí i dʼomilte aa uwwo, a eedí biibiyagi moziko, suma an riiŋe a tuddí wenɗa soo toŋ yi ki ti suune ye, i ti suune yode siidí.
13 Kallayí yʼusso sulpiyo adda puuzo, wo an yi waaku sundí soo «Ono Raa.»
14 Asigiryagi a kandaane ti punzigi tuwarɗi an di yʼ daaniya, kallagaŋ tuwarɗi kar majjanɗani kamilen̰.
15 Ti bizí i dʼaɗɗiya kasigara robboŋ, ti tode gette yʼa oggipa ita ɗuwo pay ɗoŋ i giigira yode wo yʼanni dokka ti toogo ere ki dalka maala. Yode batum yʼa tiʼn ŋaƴƴa aa an ŋaƴƴu in̰n̰i bin̰ adda sôole. Geŋ i-kaza kulkuwo Raa toogadí tʼa jiire pay.
16 A tukki kallayí wede goole wo a zindí an aa di riiŋe suma ettiyo: «Yoŋ Galmeega yi jiire pay wo Mozigo mozagi.»
Omɓo a zumbi
17 Saŋ maŋ nʼa wulle maaleeka yi tʼîhira ekki peeɗo. Yʼa iɗili ti golla awwa a emɓi ɗoŋ pay oppiyso awwa a kandaane, yʼede: «Kunʼdi kun tʼogiyi a omɓo ere ɓaadaŋ Raa yʼun ize!
18 Kunʼdi, kun ooma sey ki mozagi, sey ki deero kʼasigiryagi wo ki asigiryagi, sey ki punzigi wo ki ɗoŋ i gilo eego, sey ki ɗoŋ pay ɓulagi wo ɓulagi ye, sey ki ɗoŋ pay deero wo sun̰n̰i.»
19 Saŋ maŋ nʼa wulle seysu, mozagi siiɗo ti asigiryagaŋ an tʼugiye ki ɗeyyiso wede a ti gilo puzu ti asigiryagí.
20 Seysu ti wede yi ti tʼisiyo tuddí aa nebi, an tiʼn ziɗɗe. Wede i-tʼize tuddí aa nebi geŋ, yoŋ yʼaaze sulɗi kʼarmika a ɗaana seysu, iŋkino ɗoŋ an dʼede appuzu ki seysu wo an dʼuttile undisadí geŋ, yi tiʼn digge. Seysu ti yode geŋ an diʼn iɓi zeere adda kʼolɗe oggiyo uwwo ɗala ɗala ti moono ki suupire.
21 Asigiryagaŋ ɗoŋ aa guute, wede a ti gilo a puzu yʼaa diʼn îide ti kasigara ere aɗɗiya ti bizí, wo emɓi an dʼiimi seyzaŋ an dʼissite.