2
Polgo te Korin dabego konealubo po dąų omainu te ni pedaide po page pusali
1 Tama eno ama dedeo, polobadu hasia ena dageba asama, tama eno Godigo geme dualali mu po te dagebolo pusagasali, tiali goli eno te haniani pogo te dage homu begelemainogo me wabeo. Tama eno te koneani genuai genuai kolesagade te po dagebolo me pusubeo.
2 Te eno homugo digi eno tiwai po walio: te ena dage tomode bidibo sogo, te eno homugo gasa nai me konebo sę me ebeo. Menio. Eno homugo te Jisas Kraisba naga konealumainogo yaibao. Awe, te Jisas Krais ni pedaide isai dao, tede naga eno dagebolo po pusabo homu yai.
3 Tama polobadu ena dage dali bidali sogo, te sogo ena bomo meni yani. Ena moni wi elalu, tama ena tigi didibili hauwa yai.
4 Tama eno ola mani po me, te dagebolo pusali po me, te eno te kolesaga koneai bidigo kolesaga selama, te dagego homu bega sabo po me wabe. Menio. Dagego te Tedali Mobo Bidigo bomo kuna konemainogo eyu, eno Godigo po dagebolo ola mayu wai dao.
5 Eno tama tiali. Magi baso meni, eno homugo te bidigo homu kolesagaba te dagego homu teba tialugobeo. Menio. Eno homugo te dagego Godigo bomode naga te Kraisde konealubo po dąų weyu, tama teba naga duga homu bugagia tialuaibao. Tama tibaso, eno te Kraisgo po dagebolo pusuyu, eno te kolesaga koneai bidigo po wabo kolesaga wali pabeo, eno te tobage homu bega sabo pogo te Kraisgo po dagebolo pusubeo.
Godigo Tedali Mobogo te kuna koneabo kolesaga dabolo mani
6 Te tǫde kolesaga koneai bidi dabego kolesaga eno dagebolo ola masiąwani goli, te Godigo Mobo Bidigo te Godide ola mabo po page kuna konebo usu yali we bidi augwalibolo eno te koneani kolesaga po pusubo dao. Tiali goli te tǫde bidi dabego koneani kolesaga po me wabo meni. Tama te tǫde tobolu bidi dabego kolesaga me dago wabo meni, te augwaligo bomo kimi megi meni ebo.
7 Tiali goli dago te Godigo koneani kolesaga po pusubo dao. Te po te bidi dabego koneidali weyu geme dualaluali. Godigo te tǫ dagalu nigisiąbadi tama agai te koneani kolesaga sa muani te dabolo mayu, tama te koneani kolesagago dago te Godigo bomai ula digi nosali selama tama bugagia bidimainu yalio. Tama te tobage koneani kolesaga po dago te we bidibolo ola mabo da.
8 Te e tǫde tobolu bidi deli mego te koneani kolesaga po page me konebeo. Menio. Te augwaligo konegi sogo da, teda augwaligo te ula yai bomo elalubo Genuai Bidi me sisinama, tama aga te ni pedaide elama me isigi meni dao.
9 Tiali goli dago te sę dabe po wabo te Godigo po bukude wali po gilama yali,
“Te we bidigo gedugo susiąwani nai, tama odogo
me odobe, tama bidigo homuba me pedalisiąwai, te
nai digi Godigo sisi ilali te we bidi dabe augwaligo
aga godolo mu ebo bage augwalibolo momainogo
yai.”
10 Tiali goli te polobadu geme dualaluali po te Tedali Mobo Bidigo sęde te Godigo dabolo ola mani. Tedali Mobo Bidigo te tigidali nai osola suyu tama koneani. Tama te Godigo homu kolesagade aga geme dualali nosali sę yabo homu, te me te Mobo Bidigo konebo dao.
11 Mena bidigo te gasa bidi mego homu konegowe? Menio. Te bidi aga mobogo digi, te aga tomode bidibo, tego naga koneani. Te tiwai naga, te gasa bidi me deligo te Godigo homu kolesaga me konesiąwai. Te Godigo Mobogo digi agai naga konebo dao.
12 Tama dago e tǫde we bidi tonalubo mobo me sabeo. Menio. Dago te Godidu asali Mobo Bidi sali, tama dago te Godigo dabolo olo maiabo tigidali nai konemainogo yalio.
13 Tama tibaso, dago te Godigo Tedali Mobo Bidi elalubo we bidibolo te Godigo olo maiabo naide po hanilama pusubadi, dago te bidigo homude selama dago te po me wabo meni. Menio. Te Tedali Mobogo digi da ola menama, tama dago te po ola mabo dao.
14 Tiali goli te Tedali Mobo Bidi elalusiąbo bidi da, agai te Godigo Mobogo olo mabo nai dabe sogobeo, aga usu egobeo. Magi baso meni, agai homugo te page meni yai nai dao, tama agai te naide te page bugagia konegobeo. Te naide po dago te Tedali Mobo Bidide naga sali, tama te Tedali Mobo Bidi meni yani bidi da, agai te po page me dagalogobeo.
15 Tialima, te Tedali Mobo elalubo bidigo, agai te tigidali nai dagalama, tama te nai page konebo usu ebo dao. Tiali goli te bidi me deligo te Tedali Mobo elalubo bidi dagalainogo ebo te usu me egobeo.
16 Awe, te Godigo po bukude po me elalubo e tiwai wabo,
“Dego te Genuai Bidigo homu konebaso, te agai
Genuai Bidi mobo mabo usu egowe? Bidi meni,” te
asęani po tama wabo. Tiali goli te Kraisgo homu
kolesaga dago elalubo dao.