19
Te geme duala sabo hanu dabe
(Nam 35:9-28; Jos 20:1-9)
1 Tama Mosesgo po geninama weyu, te po wali, “Genuai Bidi dago God agai dagebolo mawainogo eba te bulu bidi dabe sese dola silaibao. Tama dagego augwaligo hanu me be dabe saibao. Te dage bugagia duagi pabo sogo da,
2-3 teda dagego te bulu te distrik sela nigilao. Tama te sela bulude da, dagego hanu wiegi yai madi me nigiąo, te bidi me ela muani bidi wi duala sigi pabo sunumi sinana bilibo sę yabuo. Tialima, te bidi mego te bidi elebaso da, teda aga wi pelama, tama te hanuba geme duala sigi pomainao.
4 Tialima, te bidi mego aga abagi olo dali ela muai baso da, o me augwali si hasia wado isąma, o boi bidi isąma yai baso da, teda aga te hanu sela me deliba geme duala sigi pelama, bugagia bidimainao.
5 Te e dao. Te bidi si augwa si busiba pelama, aga abagi mego ni geliduai madi mego te sigi hwą osoga sainuma, me isilai yai baso da, teda aga te hanu me deliba wi pelama, tama te hanude geme duala selama, bugagia bidimainao.
6 Ma, hanu deli naga elaluyu da, teda usu me egobeo. Tiyu te hanu digibulu mu elaluyu, te bidi wei sabo bidigo aga ama mego te bidi wei siyu, te bidi olo dali ela muabo, te bidi aga sębę genuai me elama, te bidi toulama elabo. Tiali goli, te ogwaba, te bidigo sęgę menio. Agai homugo aga abagi dali boi bidi homu elama, tama agai aga abagi ela muabo homu me ebeo. Menio. Te sigi hwą naga osoga sainuma, aga elai goli, te wei elidali weyu, te geme wi duala sigi pomainao.
7 Te tama tidali weyu, eno dagebolo te hanu sela sa muao po te wabao,” wali.
8 “Nosali Genuai Bidigo dagego bulu tǫ genuai ugwanu ma dąį igi paibao. Te agai duga wąį dabebolo po dąų wali gilama tiaibao. Tama agai augwalibolo te mawaibao wali te tǫ sese tama mawaibao.
9 Tama tialima, te sogo dagego te gasa hanu sela me ma sa muagameo. Tialima, dagego eno dagebolo megi wabo te bomai po dabe tigidali wali pelama eyu da, me dagego Genuai Bidi dago Godigo po godolo mu elama, tama agai po tigidali sogo wali peyu da, teda agai te tǫ sese tama dagebolo mawaibao.
10 Dagego duala sabo hanu sela me ma sa muao. Tama elama, tama dage te agai dagebolo mabo tǫde bidiyu da, dagego te bidi sęgę meni yai bidi olo dali ela mubode te dage sęgę me sogobeo,” wali.
11 “Ma, te bidi mego aga abagi hagela mu elama, tama geme dualaluama, tama aga dwagila mu elama, tama aga ela muai baso da, tama tilama, aga wi pelama, te hanu me deliba geme duala sigi peyu pai ebaso da,
12 teda aga hanu page tobolu bidi dabego te geme duala sigi pabo hanu page bidibolo hanaluama, tama aga te aga hanuba ma asao po omainao. Tama augwaligo te aga ama wei sabo bidigo nogoba menama, tama agai te bidi elama isilimainao.
13 Dagego aga hobede me elamuo. Mu menio. Te bidigo sęgę meni yai bidi elabo kolesaga te Israelde elalubo. Tama te ebo kolesagago dagego te sęgę sela sąyao. Tama tilama, dage bugagia bidiagameo,” Mosesgo te po wali.
Polobadu dąį augwa tǫde elalumainao
14 Tama Mosesgo po geninama weyu, te po wali, “Dagego duga abagigo tǫ dąį ugwanu ma pogolama, aga tǫ meba sigio. Magi baso meni. Augwaligo polobadu polo dąį ilai dao, te Genuai Bidigo megi dagebolo mawainogo ebo te tǫde,” te po wai.
Te po tų ebode bidigo gasa bidi mego dwai sę ebo suali po wabo po
15 Tama Mosesgo po geninama weyu, te po wali, “Tialima, te bidi me deligo naga te dwai sę ebo sualio po agai te po tų ebode pusubaso da, teda te po tų ebo bidigo odobo bidigo te po odigio. Te bidi sela o sigo suai dao obaso da, teda augwaligo agai po tų ela mabo usu yaibao.”
16 “Tialima, te bidi me deligo ili po olama, tama me bidi doliyu, agai te bomai po te bolali dao po obaso da,
17 teda augwali si tama te lotu wabo pesageba pomainao. Tama te pris bidi me jas bidi dabe augwaligo te sogo te Genuai Bidigo gedude te dodolomainao.
18 Te jas dabe augwaligo te po bugagia osolama, tama augwaligo suali madi te aga abagi po tų ela mani bidigo agai ili po olama, aga abagibolo po olo dali kisilama waibaso da,
19 teda te dwai dene te augwaligo te po tų ela mani bidigo sabo magi ilali te bidi aga somainao. Te tama tiyu da, dagego te dwai kolesaga dage tomode elalubo sela sąwaibao.
20 Tama tiyu da, te we bidi tigidaligo te tama tiali po oda silama, tama augwali bugagia tonaluama, tama bidi mego te tobage kolesaga me egobeo.
21 Dagego te tibo po wabo bidi dagego hobede me elamuo. Agai homugo aga abagi isimainogo yali, teda te tibo po wali te bidi aga isimainao. Te bidi agai homugo aga abagigo gedu, o kele, o sągą, o nogo me dolomainao homu elama waibaso da, teda te ili po wali te bidi aga tigide te gedu, ma kele, ma nogo, ma sągą dolomainao. Te bidi aga tigide te sę aga tigiba ma wei ponao,” Mosesgo te po wai.