37
Esekielgo bidi dili dabe hauwa mu suali
1 Genuai Bidigo bomo enaba aselama, tama Genuai Bidigo Mobo Bidigo ena oda selama, tama ena odasa pelama, odogo malu bulu mede bidi dili dabe kisu delalubo madi odasa pali.
2 Tama agai ena te bulu odogode odasa bilibadi suali da, eno bidi dili dabe hauwa mu suali. Tama tigidali dili dabe mu wa pai elalubo suali.
3 Tama Genuai Bidigo enabolo te po wali, “Tǫde bidi, nago homugo te bidi dili dabego we bidi mu ma gagabo usu yaibawe, ma meniwe?” Tiali goli, eno te po wali, “God Genuai Bidi, nagaduba deli naga koneanio, eno da, menio,” wali.
4 Tama Genuai Bidigo enabolo te po wali, “Eno homugo nago eno po te dili dabebolo pusao. Te dili dabebolo e tama po pusao, ‘Dage dili mu wa pai dabe, dagego Genuai Bidi eno po odao.
5 Ena God Genuai Bidi, eno te po e obao, eno dagebolo bidibo mobo menama, tama dage we bidi ma pedelaibao.
6 Awe, eno dage kigibili ma mayu, me tigi mi dabe ma mayu elama, tama dage tigi waligo ma halua saibao. Tama eno dagebolo bidibo mobo menama, tama dage bidibo ula selama, tama dage ma bidaibao. Tama tiyu, dagego bugagia mu koneaibao, ena deli naga ena Genuai Bidi dao homu yaibao.’ Te po te dili dabeba pusao,” agai enabolo wali.
7 Tama tibaso, eno Genuai Bidigo enabolo pusao wali po tiwai tama pusali. Eno te po pusubo sę idubadi, tama eno kilikili wabo odali. Te da te dili sibi kidagalo wabo po odali. Tama eno tonalubadi, te dili aga digi pąba kigigili pabo suali, te aga elaluali pesageba ma pabo suali, tama augwali bidi mu ma pedalobo suali.
8 Tama eno suali, te tigi kigibili me tigi mi dabe te diliba ma wadoa selama, tama tigi wali ma halua sagaselama, tama augwali we bidi tiwai ma pedalobo suali, tiali goli augwaligo mobo kegebo subeo.
9 Tama nosali Genuai Bidigo enabolo te po wali “Tǫde bidi, nago eno po te walibolo e tama po pusao, ‘Godigo te po wali, wali, nage tigidali badu aselama, tama nago te boi bidigo elai bidi dabe te mobo mao, tama augwali bidibo mobo ma somainu yao.’ Te po wao,” wali.
10 Tialima, eno Genuai Bidigo te po pusali, tama te wali te bidi tigiba dabe asali, tama augwali sese tama bidibo mobo selama, tama augwali sese tama hodalubo suali. Augwali te genuai ami bidi hani tiwai mu elaluali.
11 Tialima, Genuai Bidigo enabolo te po wali, “Tǫde bidi, te kalabuside megi bidibo Israel dabe tigidali augwali da, te bidi dili dabe wa pai tiwai dao, tama augwaligo te po wabo dao, ‘Te dago dili dabe mu wa pai dao, tama bugagia munu ma me bidigobeo. Tama da mu tama mu hagawaibao.’ Augwaligo po da te tama goli dao.
12 Tiali goli, eno homugo nago eno po augwalibolo pusulama, tama augwalibolo e tama po augwalibolo pusao, te ena Genuai Bidigo po, ena God Genuai Bidi, eno dagego gų page tų dalama, tama dage buluba odasa aselama, tama dage kantri Israelba ma odasa paibao, te duga tǫ mu dao.
13 Tama eno dage gų pagede hodolobo sogo da, teda dage eno we bidigo e tama bugagia koneaibao, ena deli naga ena Genuai Bidi dao homu yaibao.
14 Tama eno dagebolo eno mobo bidi dagebolo menama, tama dage bidibo ula saibao. Tama eno dage duga tǫ muba ma odasa paibao, tama dage tede bugagia bidaibao. Tama eno te sę ebo sogo da, dagego e tama bugagia koneaibao, te da ena po mu dao homu elama, tama eno ena po dąų walali gilama yali. Ena Genuai Bidi eno po polo wali. Te po te Israel dabebolo pusao,” wali.
Israel dabe augwali kantri deli mu pedelaibao
15 Genuai Bidigo enabolo te po wali,
16 “Tǫde bidi, nago ni dage me deli sigi pelama, tama nago te po ugwadu daide asęao, ‘Te Juda hanigo ni dage, me te meba Israel hani we bidigo ni dage dali augwali deliba elalubao.’ Tama tialima, nago te ni dage me deli selama, tama nago te po tede asęao, ‘Te Josep hanigo ni dage, me te Efraim hanigo ni dage dali, me Israel hani mebago ni dage dali deliba elalubao.’ Te si wali ni dagede te po asęao,” wali.
17 “Nago asęna silama da, teda nago te ni dage sabi si deliba waloluyu, teda te ni dage si te deli ni gagawaibao, nago nogode.
18 Tama naga abagi dedego nago te sę yali page po hanalubo sogo da,
19 teda nago augwalibolo e tama po walao, ‘Ena God Genuai Bidi eno obao, eno te Josepgo ni dage, te ni dage te Efraim hani, me te meba Israel hanigo ni me da, eno te ni me Juda hanigo ni dage si selama, deliba walolaibao. Tama eno te ni dage si te eno nogode ni dage deli elaluaibao.’ Te po wao,” wali.
20 “Tǫde bidi, nago te po asęani ni dage si nogo tola sao, tama te we bidigo sumainu ugwaba sao.
21 Tialima, nago augwalibolo e tama po walao, ‘Ena God Genuai Bidi, eno te po obao, eno te tigidali Israel dabe augwali te bidibo te tigidali kantri dabede oda selama, sisinama, tama augwali augwa tǫ muba eno odasa paibao.
22 Tama tialima, eno augwali kantri deli te tǫde pedelemainu ilaibao, te Israel dabego bulu dabede. Tama augwali king deligo augwali tigidali tonaluaibao. Tama augwali bugulama, king bidi si elalubo kantri si munu me ma bidigobeo.
23 Tama augwaligo tibo god dabeba ma lotu po weyu, me dwai damua pai kolesaga wali peyu, me dwai sęgę sabo kolesaga wali me peyu me egobeo. Tama tiyu, augwali eno gedude meda yai me pedalogobeo. Augwali me habu badu bidi augwaligo sęgę saibaso, tagalao, eno augwali tau selama, tama augwali wiegi yai pedalaibao. Tama augwali eno we bidi bidaibao, tama ena augwaligo God bidaibao.
24 Tama eno sę bidi Devitgo hani bidi me deli augwaligo king bidaibao. Tama aga deli naga augwaligo tonalubo bidi bidaibao. Tama augwaligo eno bomai po me, eno gasa po wali peyu yaibao.
25 Tama dage hani bidi dabe tigidali sogo polobadu duga wąį dabe bidali te tǫde bidada paibao. Te da, te eno ena sę bidi Jekopbolo mani te tǫ dao. Tama Devitgo hani bidi me deli augwaligo tomode king tigidali sogo bida bida peyu bidaibao.
26 Tama eno augwali dali kontrak po dąų walama, tama augwali tigidali sogo bugagia bida bida peyu bidaibao. Tama eno augwali augwa tǫde bidimainu sula tagalama, tama augwali we bidi hani genuai hauwa mu pedelaibao. Tama eno be augwali tomode tigidali sogo mu elalua paibao.
27 Tama eno bidibo madi augwali dali bidaibao. Tama ena augwaligo God bidaibao, tama augwali eno we bidi bidaibao.
28 Te eno be Israel dabe augwali tomode sesemane elalubo sogo da, teda gasa hani we bidigo sumainu yaibao. Tama augwaligo e tama bugagia koneaibao, ena Genuai Bidi, eno te Israel dabe augwali ena we bidi mu ilali kolesaga augwaligo sueibao.’ Te po te we bidibolo pusao,” God Genuai Bidigo te po wali.