13
Israel bage augwaligo gomunai ogwa Godibolo mawai
1 Genuai Bidigo Mosesbolo te po wai,
2 “Dagego gomunai ogwa tigidali enabolo mao. Dage Israel hanigo gomunai ogwa tigidali, me te dagego tigidali sipsip, meme, bulmakau gomunai omai wai dabe me, te enaba naga mao. Augwali te eno tedali muani nai dao,” wali.
Te Bo Disiąwai Nai Bret tuali genuai side
3 Mosesgo te we bidi augwalibolo te po wai, “Dage te Isipde bidali, te kalabus sę ebo bulu dao. Tama aga bomogo digi, Genuai Bidigo dage Isip bulude selama, odasa asai. Tama tibaso, tigidali kibu be dagego agai te tama tiali side homugo koneama, tama dagego te bo dai nai bret dali tugio.
4 Tama megi dagego te Isip taga sobao, te side e polua delide, augwaligo te nogi Abip wai.
5 Tama Genuai Bidigo dago wąį dabe dali po dąų olama weyu, te Kenan dabe augwaligo tǫ, me Hit bidi dabe, me te Amor dabe, me te Hivi, me te Jebus dabe, te bidi hani augwaligo tǫ dage mawaibao. Te tǫ wiegi yai mu, tama ili hauwa elalubao. Tama Genuai Bidigo dage te tǫba odasa pabo sogo, dagego te Bo Disiąwai Nai Bret tuali te genuai side tigidali kibu be e Abip nogi wabo poluade te sę wali piąo.
6 Tama dagego te bo disiąwai nai bret te a naga olama me badu nogo si tama side tuao. Tama a naga olama me badu si sogo, te dagego te genuai nai tuyu, Genuai Bidibolo lotu po wao.
7 Tama te a naga olama me badu nogo si te side te we bidi augwaligo te bo disiąwai nai bret tulama, tama dagego te yis, me bret te yis elalubadi, te bulude me te dagego tǫde munalubadi elaluamu dao.
8 Tama te genuai side pedalobo si, dagego duga ogwa te wai dabe augwalibolo te po haninama pusao, ‘Dago te kolesaga tigidali ebo, te Genuai Bidi agai da te Isip tǫde bidibadi, da odasa asali sogo koneagasu, te sę ebo dao.’
9 Tama dagego kegeda pidali weyu, te tiwai lotu po wabo kolesaga da, te dąį me deli dao, te dagego duga nogode me gesabidide elaluabo dąį ąǫ yaibao. Tama te Genuai Bidigo bomai po te dagego homu kolesaga iliyu, tama po wabo nigilaibao. Magi basowe, Genuai Bidigo bomogo sę elama, tama da Isip tǫde selama, odasa asai dao.
10 Tama tigidali kibu bede te tiali sogo pedalobode, te sogo dagego te nai tuao,” Mosesgo te po wai.
Te gomunai wai ogwa dabe
11 Te Mosesgo po ma weyu, te po wai, “Genuai Bidigo dage te Kenan dabego tǫba odasa paibao. Tama agai dagebolo me, te dagego waigo wai dabe, te dagego wąį dabe, augwalibolo me te tǫ maiabo po polobadu digi dąų wai dao.
12 Tama agai te tǫ dageba mabo sogo, tama dagego gomunai ogwa tigidali te dagego Genuai Bidiba mao. Tama tigidali kibu dabego gomunai wai, te me Genuai Bidigo naga dao.
13 Tiali goli, dagego te sipsip wai me deligo te donki gomunai wai ma dobola abelama, ofa ilao. Tiali goli, dagego te donki ma abelesiąyu da, teda dagego te donki dogoni togwao, isimainao. Tama dagego duga digi te gomunai ogwa wai dabe tigidali ma abelao.”
14 “Tama nosali dagego ogwa dabego dagebolo te tiwai hanaluyu, te po tiwai waibao, ‘Te kolesaga page mena tama dawe?’ Tama dagego augwalibolo te po wao, ‘Da Isip bulude kalabus sę ebadi, tama Genuai Bidigo bomai sę mu elama, tama da Isip bulude selama, da odasa asai dao.
15 Tama hasia sogo Isip hani tuni bidigo homu kolesaga hasegelisiąyu, tama da tagala palobeo. Tiali goli, Genuai Bidigo te Isip dabego gomunai ogwa tigidali, me te augwaligo kibu dabe gomunai wai tigidali ela muai. Tama megi dago te kibu dabego gomunai wai te Genuai Bidiba ofa ebo dao. Tama tiali goli, dago te dena gomunai wai ogwa te augwali ma abelebo dao.’ Te po duga ogwa dabebolo wei ponao.
16 Dago te sę ebo te dago homugo ma koneama, te Genuai Bidigo bomogo aga digi da te Isipde selama, odasa asai. Tama te dago nogode me gesabidide muai nai tiwai, tama dago homu hodolobo sę ebo dao,” Mosesgo te Israel hani we bidibolo te po wai.
God te pǫde me siade bidiyu, augwali dali pai
17 Te Isip tuni bidigo te Israel we bidi hani tagala palai sogo, Godigo augwali te nabis badu te pęwadage tųdu te Filistia tǫ badu odasa pabeo. Magi basowe, Godigo te homu yai, ‘Te Israel hani augwali te pęwadage tųdu odasa peyu da, tama gasa hanigo augwali dali hwįainogo ebo suyu da, teda augwaligo homu hasegelama, te Isipba ma paibao. Tama te Israel hani augwaligo te tama tebo te eno hagela yai.’
18 Tama tibaso, Godigo augwali te ni meni yai te tǫ wa pai bulu, te badu bagulama soyu, tama augwali te mama yai tamu ąįba pedelai. Augwaligo te boi bidi dali hwįbo nai me tolama pai.
19 Polobadu Josepgo te Israel hanibolo te po wai, “Nosali ena isama, tama Godigo dage Isipdu te Kenan tǫba ma oda sagasobode, tama dagego eno dili dabe dali selasa pao.” Tama Israel dabe augwaligo bomai po dąų weyu, tama tiaibao wai. Tama Mosesgo te Josepgo dili dabe selama, tolasa pai.
20 Tama Israel hani augwaligo te Sukot hanu tagalama, te masigi sane yai bulu Etam sesegeba pedelai.
21 Tama siade te Genuai Bidi te genuai bobage pǫ tomode bidali, tama aga polasa peyu, augwali pabo tų ola mawai. Tama hulide aga te genuai bobage sia dabe tomode bidiyu, tama aga polasa peyu, tama augwalibolo te sia ula ilai. Tama tibaso, augwali te siade me, hulide me pabo usu yaibao.
22 Tama sesemane sogo siade te pǫ te we bidi augwali pobadi te pǫ polasa pali, tama hulide me te sia polasa peyu, ula ela pai.