36
1 Te Mosesgo po ma weyu, te po me wai, “Genuai Bidigo wiegi yai homu kolesaga te Besalel de Oholiap, te bidi sibolo dali, te tigidali sę ebo koneani bidi dabebolo dali, te sę emainogo eyu mani, tama augwaligo te Godigo ugwa be sę yabo nai tigidali nigibo te usu yaibao. Tama te bidi dabego naga te tigidali nai dabe te Genuai Bidigo po wali gilama te sę yainogo yao.”
Te we bidi augwaligo doado bage hauwa sela asai
2 Tama nosali Mosesgo Besalel me, Oholiap badi, i weyu, tama te Genuai Bidigo wiegi yai homu kolesaga mani bidi augwali tigidali i wai. Tama te sę ebo godolo homu ebo bidi dabe augwali asali, tama Mosesgo augwalibolo te sę gagalama yao, te po wai dao.
3 Tama Mosesgo te bidi dabe augwalibolo te Godigo ugwa be sę emainogo te Israel dabego sisinani nai tigidali te augwalibolo mawai. Tama tigidali sogo kigamu te Israel we bidi augwaligo te Godibolo te ofa tiwai maiabo nai dabe selasa pabo sę idu geai.
4 Tama tibaso, te ugwa be sę ebo bidi dabe augwaligo te nai dabe sela asobo sulama, tama augwa ebo sę tagalama,
5 tama aselama, Mosesbolo e tiwai po wagasali, “Te we bidi augwaligo te doado bage hauwa sela asali. Te tigidali sę yabo nai dabe te usu yali, te Genuai Bidigo dabolo te sę emainogo wali po gilama. Tama te doado bage meba hauwa te olo munaluaibao,” augwaligo te po wai.
6 Tialima, te tiwai Mosesgo te tigidali we bidi bidibo madi po ola tolai, “Dage we bidigo te Godigo ugwa be sę yabo nai dabe me sela aselamuo.” Augwaligo te po odama, tama te nai dabe augwaligo me sela pabeo.
7 Te we bidi dabego sela asali tigidali nai dabego te ugwa be sę yabo te usu elama, te dąį ela pelama, tama meba olo munaluai dao.
Augwaligo te Godigo ugwa be sę yani
8 Te tigidali sę bidigo te sę ebo mu koneama, tama augwaligo te Godigo ugwa be sę yai. Augwaligo te ugwa be sę yani, te genuai ugwa name nogo sigo sę yai. Augwaligo te gasa wiegi yai ugwa selama, tama augwaligo te mama yai, me sisi yai hobigo te name ugwa au ilai, te hobi te augwaligo sipsip nisigo nigai. Tama te sę mu koneai bidi augwaligo te mobo bidi ensel noma te tigidali ugwade hobobolo pai dao.
9 Te ugwa deli deli bobage usu sali, te 12 mita, te aga genuai usu nama te si tama 2 mita, tama tigidali ugwa te deli tigi poai naga dao.
10 Augwaligo te a naga ugwa dali te bobage iliyu, tama te gasa a naga bobage ugwa te tiwai naga elama hobolai dao.
11 Tama augwaligo te ring meba te husugu ugwago nigilama, tama tego te genuai bobage ugwa siba wadolainogo hobolai.
12 Te augwaligo 50 ring te hasia ugwa me dedeli sesegede kęnani, tama te tiwai naga augwaligo me si wali te ugwa sesegede kęnai dao.
13 Tama augwaligo te 50 huk gol nigilama, tama te genuai ugwa si dali te huk dabego dąų olama, tama deli ugwa poai naga pedelai dao.
14 Tama augwaligo te ugwa be haluabo genuai ugwa me dedeli nigai. Augwaligo te ugwa 11 nigali, te augwaligo meme nisigo nigai dao.
15 Te ugwa deli deli bobage usu sali, te 13 mita, tama te genuai dabe usu nama, te si tama 2 mita, te tigidali usu sali te deli tigi poai naga yai.
16 Augwaligo te nogo a naga ugwa dali hobolali, te bobage ugwa dedeli pedelai. Tama augwaligo te ugwa 11de te gilama tiwai naga yai dao.
17 Tama augwaligo te 50 ring ugwa te hasia ugwa sesegede mubadi, te me ugwade te 50 te gasa me ugwa sesegede kęnai.
18 Tama augwaligo te 50 te huk bras te ugwa si dali kęnabo te nigilai. Tama te ugwa si te genuai deli tiwai naga pedelai.
19 Nosali augwaligo te ugwa be haluabo gasa nai me te augwaligo mama yai pengo pilai te omai sipsip waligo nigai. Tama nosali me augwaligo te sela wabo te be haluabo nai te tamu ąįde elalubo hasa nogi sikau waligo nigai. Te si haluali madi ugwadu muainogo nigai.
20 Augwaligo te ugwa be daga ni name te ni akasgo nigai dao.
21 Te ni name tigidali bobage usu sali, te 4 mita, tama te ni name genuai usu sali usu ni te 66 sentamita dao.
22 Augwaligo te ni name dabe dwasianu bobage gana togolama, te be dili ni te page nai tomode dąų walomainogo yai. Tama augwaligo tigidali ni name te tiwai naga nigali.
23-24 Tama augwaligo te ni name dabe te bidi sese deli te tǫ sesege badu muabo nigibadi, tama te silva page halobage te bidi sese si te augwaligo te dodolabo ni name nigilama, tama te halobage si te ni name deli deli dologode te ni name page dąų walama, elalumainogo yai.
25 Tama augwaligo te tǫ sesege me badu te bidi sese dodolabo ni name nigali,
26 tama augwaligo te bidi sese si silva halobage nigilama, te ni name page dabe dąų walomainogo yai.
27 Tama augwaligo te dodolabo ni name me sela me sela te be tudi badu, te ugwa be te sia ge dega sigi pabo badu nigali.
28 Tama augwaligo te ni nami si te ugwa be tudi badu te dage badu nigali.
29 Augwaligo te be dage si aiyadu ugwaba digigo dąų wawalo holai. Augwaligo te tiwai sę te si dali si dage badu te tiwai yali.
30 Tama te be tudi badu muani ni name te 8 badi, tama te 8 ni name dabe page dąų walabo silva halobage dabe elaluali. Te silva halobage si te tigidali dodolabo ni name deli deli dologode elalua muani.
31-32 Tama augwaligo te obo tuabo bobage ni meba te ni akasgo nigai. Augwaligo te tǫ sese me badu te obo tuabo ni nogo a naga nigibadi, te obo me badu sese badu tuabo ni a naga nigiyu, te sia ge dega sigi pabo tudi badu obo tuabo ni a naga nigiyu yai.
33 Te ni name dabe tomode dąų walama tuabo ni dabe, augwaligo te be dolo usu nama bobage togai dao.
34 Tama augwaligo te be daga ni name dabe te golgo haluama, tama tigidali ni name deli delide te ring gol meba kęnama, te bobage ni dabego te be daga ni dabe kęani dąų walali. Tama augwaligo te ni name dabe me te golgo haluai dao.
35 Tama augwaligo te ugwa be tomode walabo dąį te gasa wiegi yai genuai ugwa me deli nigai. Tama augwaligo te sisi yai, me mama yai sipsip nisigo nigai hobigo te ugwa au ilai. Tama te sę mu koneai bidigo te mobo bidi ensel piksa noma te ugwade hobobolo pai dao.
36 Tama augwaligo te genuai dąį ugwa walabo pos me si me si te ni akasgo nigai. Tama augwaligo te pos dabe te golgo haluama, tama te ugwa walabo gol huk dabe te posba muai. Tama augwaligo te silva page dąų walabo halobage me si me si te pos dabe dodolabo madi nigai.
37 Tama augwaligo gasa wiegi yai genuai ugwa te ugwa be tųde muabo nigai. Tama augwaligo te gasagi yai hobi dabego bugagia au ilama, tama augwaligo te au yabo sisi yai hobi, me te mama yai hobi te sipsip nisigo nigai dao.
38 Tama augwaligo a naga pos nigilama, tama augwalide te huk dabe kęnama, tama te ugwa dabe walabo madi tama tiwai nigilai. Tama augwaligo te gol selama, te pos toboluba halubadi, tama te posba wadolabo ba dabe me tiai. Tama augwaligo a naga halobage bras, te pos dabe dodolabo madi te me nigai dao.