4
1 Tama te sogo te nogo a naga olama, me badu
nogo si we dabego
bidi me deli tola selama, te waibao,
“Da dena digi nai me ugwa dabe da
dena digi sela tuyu yaibao.
Tiali goli, dago bidi mu menio.
Tama da hale mu ebo.
Tama tibaso, te hale silimainu eyu,
nage dago bidi bidibo ąǫ yaibao,” te po waibao.
Jerusalem dwagi yai noma yai bulu ma gagawaibao
2 Te me sogo nosali pedalaibao, Genuai Bidigo te ni me deligo gesi nologo ma kolimainu yaibao. Tama tǫgo dwagi dwagi yai nai dabe holiyu yaibao. Tama te Israel we bidi dabe dolisąma me bidibo bage, augwaligo te nai dabe wiegi yai holobo sulama, augwali dwagi yai homu ela paibao.
3 Te Saion hanude bidibo we bidi dabe, augwali te Jerusalemde me bidibo we bidi dabe da, Genuai Bidigo augwali bugagia bidimainu sa polo muai dao, augwali bugagia bidimainu. Tama agai augwali nogi agai bukude asęai dao. Tama megi da, agai augwali aga we bidi mu dao waibao.
4 Genuai Bidigo bomai homu kolesaga mu yali, te Jerusalem bulu dolama, tama nosali ma te Jerusalem bulu ma usu ma ilama, wiegi yai bulu ma ilainu. Te aga genuai bomogo agai te Jerusalem bulu wę tedalama, tama tigidali meda elalubo sela sąwaibao, te hanude daganaluali meda dabe. Agai te we dabego yali dwai kolesaga dabe sese sela sąwaibao. Me te bidi dabego gasa bidi dabe dolainu yali dwai kolesaga dabe me sela sąwaibao, te Jerusalem wiegi yai pedalobo si da.
5 Tama Genuai Bidigo bobobage yai pǫ me deli te bulu du Saionde elalumainu elama, me te we bidi lotu wabo pesageba sisinalubo madi. Te giligade Genuai Bidigo te pǫ elalumainu yaibao. Tama hulide da, agai bobobage yai hano dali, genuai isi bogoli dali elalumainu yaibao. Te pǫ me, hano me, isi me, Genuai Bidigo bogwą wali yali gilama, aga te bulu dude me aga dwagi yai nai dabede ugwadu walaluaibao.
6 Te bogwą waligo te Jerusalem bulu haluama, tama bomai giliga posolo palialuaibao. Tama me, agai Jerusalem te mone tulubage sogo bugagia bidimainu yaibao.