5
Jerusalem tigidaligo Genuai Bidi tudiba muani
1 Genuai Bidigo te tiwai po wali,
“Dage Jerusalem we bidi,
dage udulama, te taun sunumi dabeba,
me te sisinibo pesageba tedela pelama,
te doloba pai bidi meba bidibowe,
ma meniwe, suainu tama tiao.
Te dagego bidi me deli te doloba pai kolesaga wali peyu,
te dolo yali kolesaga sę mu bomo ebo bidi subaso
da,
teda eno dage Jerusalemgo ebo dwai sę tigidali
tagalaibao,” wali.
2 “Te dagego bomo yai po me deli dąų weyu, po wabo
sogo,
dagego Genuai Bidi, eno nogide mu po obao po
wabo dao.
Tiali goli, dagego tibo po naga weyu,
te odolali po wabo dao,” wali.
3 Genuai Bidi, nago godolo ebo homugo te tigidali
bidigo te dolo yai kolesaga mu wali pomai
homu ebao.
Nago te we bidi dabe elebadi goli,
tialima augwali te dene ebo gę nabeo.
Nago augwali elaluali,
tiali goli te augwali nago dodolomainu me ebeo.
Augwa tobolu te masigi dila pai mu tiwai elalu,
te augwa haliga begelibo hagela mu yali.
4 Tialima, eno te homu yali,
‘Te hani dabe, augwali te bidi mu dwai dabe naga tama,
te augwa homu kolesaga konesiąyu ebao.
Augwa te tobage kolesaga me bomai po,
God Genuai Bidigo te augwa homude wali pomainu
ebo te augwaligo konesiąyu ebo dao.
5 Tialima, eno te genuai bidi dabe sugi pelama,
te augwali dali po miaibao.
Augwa te tobage kolesaga me bomo yai po,
God, Genuai Bidigo homugo augwa wali peyu,
konemainu ebao.’
Eno te homu yali.
Tiali goli, te genuai bidi dabe tigidaligo me te Genuai
Bidigo po sela sąnama,
te agai homu kolesaga wali me pabeo.
6 Tialima, te laion dabe te genuai buside bidali
tagalama asu,
te augwali ela muagasaibao,
te uni yowi dabe te wa pai bulu pesagede bidali
taga soyu,
te augwali dolagasaibao.
Te genuai uni pusi dabe te aselama,
te Juda dabe augwa taun pąba tonaluagasaibao.
Te bidi me we me deli te taun tomode bidali tagalama,
buluba teda soabode, te uni pusi agaba pasuga sigi
pelama,
te aga tigi pepeda tueibao.
Te sę augwaliba pedelaibao, magi baso meni,
te augwa dwai sę hauwa eyu,
te hauwa sogo augwaligo
te Genuai Bidi tudiba mubo dao.
7 Genuai Bidigo po Jerusalemde elalu te tiwai po wali,
“Eno nago dwai sę sela sągobeo, magi baso meni,
te nago we bidi dabego ena tudiba munama,
tama te mu nai ąǫ isąwai tibo god wali pai.
Tama augwaligo te tibo godigo nogide bomai po dąų
wai dao.
Eno te we bidi dabeba nai hauwa mani,
tiali goli, augwaligo ena tagalama,
te tibo god wali pobao,
te bidigo aga we tagalama,
te penani ebo wego beba pabo tiwai ebo dao.
8 Te bidi dabego haliga te gasa bidigo wede hogodobao,
te bomai hos kibu omaigo te so kibu hos sulama,
haliga hogodobo tiwai ebao.
9 Ena Genuai Bidi, eno dolo po obao,
mu tama eno te we bidi dabeba dwai dene
mawaibao,
augwa te yali dwai kolesaga wei ponoyu tiaibao,”
wali.
10 “Dage Israel dabego boi bidi dabe,
dage te tǫ kantri Israelgo wain gidu aselayu,
te gi dabe doliąo.
Tiali goli, dagego mu siligio.
Te wain nologo dabe naga sela sąyao,
magi baso meni, te nologo dabe te eno nai menio.
11 Te Israelgo Juda dabego ena tudiba mu muai.
Ena Genuai Bidigo eno te po wai dao,” wali.
Genuai Bidigo te boi bidi dabe tagala palama, te Israel dolomainu yali
12 Te Israel dabego Genuai Bidi tibo wali peyu,
augwa te tama po wali,
“Genuai Bidigo magi sę me egobeo.
Agai te dwai nai daba me tagala palomainu me iligobeo.
Te boi bidi dabego me hwįagasisąyu,
te genuai nasi me pedalugobe dao,” te po wai.
13 Mu tamao, te profet dabego te tobage po pusali,
tialima te augwa digi poli po pusali.
Genuai Bidigo augwaliba po me masiąwai.
Tialima, te aga digi augwali dolaibao.
14 Dagego te tobage po weyu, te dagego Godigo po odobao, Genuai Bidi te Tigidali Bomo Elalubo dao. Agai enaba te tiwai po wali,
“Te eno nageba menama pusabo po da,
te sia tiwai pedelaibao.
Tama te we bidi dabe te nogobo sia tiwai elalubao,
tama te siago augwali ulama daibao.
15 Ena Genuai Bidi, eno dage Israel
we bidiba te tama po obao,
eno te digibulu bidi hani bage selama,
odasa aselama,
te dage dali boi hwįmainu yaibao.
Augwali te bomai hani bidi te augwa tǫ kantride
polobadu mu bidali.
Dagego te augwaligo wabo po page me konegobeo,
magi baso meni,
dagego augwaligo po konebe dao.
16 Augwa ami bidi dabe te hwįbo bomai bidi dabe,
te augwaligo ene enebo mu konea pelama,
te bidi hauwa ela mubo dao,” te po wali.
17 “Te augwaligo dagego gide elalubo nai,
me bede elalubo nai sia saibao.
Te augwaligo dagego wai puluba tigidali ela mubadi,
te sipsip hani tigidali me, te dagego bulmakau me
ela muaibao.
Tama te augwaligo dagego wain du ni,
me ni fik kaya, te dolaibao.
Dagego homugo te dage bomai obo taun
tomode bugagia bidaiba homu ebao,
tiali goli, te menio.
Te boi bidi dabego hwįagasiyu,
te taun dabe dola silaibao,” wali.
18 Tialima, Genuai Bidigo te tiwai po enabolo ma weyu, te po wai, “Te boi bidi dabe aselabo sogo, te eno dage Israel tigidali silimainogo me egobeo,” te po wai.
19 “Tama nosali, te we bidi dabego nageba te tiwai po hanalu waibao, ‘Magi baso Genuai Bidi dago Godigo te sę dabe dabolo yali dawe?’ Tama Jeremaia, nago eno te po augwaliba pusa mao, ‘Dagego ena tudiba munama, te duga tǫde digi dagego te gasa hani dabego god dologoba pali. Tialima, dage te gasa hani dabego tǫba bidigi pelama, tama te hani bage dabe dologode bidagameo,’ te po pusa mao,” Genuai Bidigo te po wai dao.
Genuai Bidigo bomai po te we bidi dabeba mawai
20 Genuai Bidigo te tiwai po wali,
“Te Jekopgo hani te Judade bidibo bageba te po mao,”
wali.
21 “Dage we bidi dabe te wiegi yai homu kolesaga
meni yai.
Duga gedu elalubao,
tiali goli te elalubo nai dagego me susiąwai.
Te dagego olo elalubao, tiali te dagego po me odobeo.
Tiali te dagego olo eno te poba bugagia muiąo,
22 Magi baso dage enade wi elama,
midigi ebo meniwe?
Eno te nambis wę sane muani,
te tamu ąįgo dąį tiwai nigilali,
tama te nambis ąį sane te sesemane te obo tiwai
elalubao.
Te genuai si pedalu, te bomonama bugusu obadi,
agai te dąį ilali me bogi soagobeo.
23 Tiali goli, dage we bidi te gasagi yai mu ebao.
Dagego enaba hagoma mu eyu,
te duga homu kolesaga te mu tomaga sobao.
Tama dagego ena tudiba munama,
te tedela pabo dao.
24 Dagego ena Genuai Bidi duga God dologoba me
pisąma tebao.
Dagego te homu isąbao,
ena digi eno te tulubage te dagego nai wai bulubo
sogo tagala paliyu,
te nai inabo sogo tagala palu ebao.
Te ena digi eno te nai aga inayabo sogode inamainu eyu,
te tigidali kibu bede dagego sela tumainu tebo dao.
25 Tialima, dagego te haniani dwai sę ebo kolesaga
ebao,
tama duga te ebo kolesagago te wiegi yai nai
sabo te paliama,
te dagego sabe dao,” wali.
26 “Te meba eno we bidi dabe,
augwaligo te dwai kolesaga ebao.
Augwaligo te gasa we bidi dabeba dwai sę yainu
tonalueibao,
te bidigo umben wa muai madi te ba tomoba soabo
tonalubo tiwai ebo dao.
27 Augwaligo te tibo kolesaga elama,
te gasa bidigo nai hauwa sainu tiaibao,
te bidigo ba hauwa selama,
te aga basket wa pągąbo tiwai yaibao.
Te kolesagade augwali bomai mu pedelama,
te augwa doado bage me mone hauwa elalubo dao.
28 Augwali te nai hauwa tulama,
te tabi buai bidi pedelali.
Augwaligo te tobage dwai kolesaga ebo gagamu yabo
homu me egobeo.
Augwaligo te doloba pai kolesaga te augwa aya isai
bidigo wai pulubade me egobeo.
Te doado bage meni yai bidi dabego sęgę elalubo sogo,
augwaligo te augwali tau selama,
te sęgę silimainu ebo meni.”
29 “Ena Genuai Bidi, eno dolo yai po obao.
Mu tamao, eno te bidi dabeba dwai dene mabo sę yaibao,
te augwa ebo kolesaga wei ponoyu, tama tiaibao.
30 Dwai nai mu te tǫba pedelai dao.
31 Te profet dabego augwade digi pusali pogo digi te
we bidi dabe tibo po ola mani.
Te pris dabego te we bidi tonaluali sogo,
te pris dabego te profet dabego po wali pali.
Tama eno we bidi dabego te kolesaga godolo mu yali.
Tialima, eno dwai dene mabo sę dageba ebaso,
tama duga te dwai kolesaga silaibao.
Tama te sogo dagego magi yaibawe?” wali.