5
Nehemiago te Juda dabego sęgę dodolai
1 Nosali te Juda we bidi hauwa mu te doado bage sǫą pobaso, tama augwaligo te augwa abagi hasi dabe dali wado po wabo sę yali.
2 Mebago te tama po wai, “Dago te wai puluba hauwa elalubao, tama da nai sǫą palio. Tama dago te nai tusiąbaso da, te da isaibao,” wai.
3 Tama meba umabogo te tama po wai, “Dago te dena abagi dabe meba dali te nai abelabo mone negeli sai. Tama augwaligo te dabolo waliyu, te dago te negeli sali wei ponesiąbaso da, teda augwaligo te dago gi dabe me be me te negeli wei ponoyu saibao,” wai.
4 Tama hani mebago te tiwai po wali, “Dago me te dena abagi dabede te negeli selama, te kingba takis maiabo mone sai. Tama dago te negeli wei ponesiąbaso da, teda te abagi dabego te dago tǫ me wain gi saibao,” wai.
5 “Te dena abagi dabego digi, tama augwaligo te sęgę dabolo mawai. Te augwaligo homugo te augwaligo da aiyaba elalueiba homu eba, agawe? Menio. Da tigidali te deli tigi tiwai dao. Tama dago wai puluba dabe me te augwaligo wai puluba tiwai si elalubao. Tiali goli, dago te gasa sunumi me elalubeo. Tama tiyu, dago wai dabe te gasa bidi dabego olo sę ebo bidi pedelama, te dago mone somainu me egobeo. Tama te bidi dabego te dago wegimani selama, te augwaligo olo sę ebo we dabe pedalumainu ilali. Tama me te augwaligo dago tǫ me wain gi sali, tama dago te wai dabe ma sabo sę deli me elalubeo,” augwaligo te po wai.
6 Eno te we bidi dabego po wabo odobo sogo, eno haliga sębę mu ebaso,
7 tama eno te sęgę dodolabo sunumi bugagia homu kone palali. Eno koneani, te polalubo bidi dabe me, te ofisa dabego dali, te dwai kolesaga yali, tama eno augwali sisinagasomainu i olama, tama eno augwaliba po bomo elama, augwali dali wali, “Dagego te duga ama hasi dabe aiyaba elaluama, tama augwaliba dwai sę ilalio,” wali.
Tama eno tigidali we bidi augwali sisinagasomainu i olama, te sęgęde po miainu yai.
8 Augwali sisinagasai madi, te eno augwaliba te tiwai po wali, “Dago te dena abagi dabe te Israel hani isąwai bidi dabego abelama, te olo sę ebo bidi bidibaso, te dena ma sainu te mone sisinibo sę dene mu ebo da. Tiali goli, megi dagego te duga abagi dabeba dwai sę iliyu, tama augwaligo te dugago digi te olo sę ebo bidi bidibo tiwai emainu ilali.” Eno te tama po obaso, te polalubo bidi dabe te pedauwali pania selama, te augwaligo po wei ponabo usu meni yai dao.
9 Tama eno po wadoa selama, te tama po wali, “Dagego kolesaga dolo me ebeo. Dage te God dologoba pelama, tama doloba pai kolesaga sesemane yao. Te dagego te tiwai ebaso da, teda te dago boi bidi dabego me te dago ebo kolesagaba te posobo po me wagobeo.
10 Ena dali, ena hani me, te eno sę bidi dabego me, te we bidi dabego dade te negeli selama, te nai me mone somainu ilali. Tama da tigidaligo te negeli augwaligo wei ponomainu te profit me somainu i me olamu dao.
11 Dago augwaligo negeli yali tagalao. Tama augwaligo te mone me wit, ma wain, me te oliv wel, te augwaligo negeli sali nai dabe te wei me ponogobeo. Tama te me wain gi me, oliv gi me, be me dagego te we bidide sali doado bage dabe, te dagego augwaliba ma maiąo, tama dagego te negelide ugwadu manani profit mone me te ma maiąo,” te po wai dao.
12 Tialima, te polalubo bidi dabego po wei ponoyu, te tama po wai, “Te dago nago wali po gilama te tiwai yaibao. Tama dago te abagi dabego nai dabe te augwaba ma menama, tama dago augwaliba i weyu, te negeli wei ponao po me wagobeo,” wali. Tama tialima, eno te pris dabe asao olama, i wali. Tama eno po bomo elama, te polalubo bidi dabeba weyu, te augwaligo te pris dabego gedude te po dąų waliyu, te augwaligo wali po te bugagia wali pomainu yai. Tialima, augwaligo te po dąų walali.
13 Tialima, megi da, eno te kukulu tiwai elama gudali te nami ugwa pedai peda sabo side tama te elaluali nai dabe memenege elama, te augwali tulaluali. Tama eno te tobolu bidi dabe augwaliba te tama po wali, “Te dagego te megi tama dąų walali po te dagego wali me pisąbaso da, teda te Godigo dage me memenege ilama, tama te dagego be dabe me tigidali nai te dobola selama, tama dage e nami ugwa tiwai olo mu elalueibao.” Tama tigidaligo te tiwai po wai, “Dwagi yai dao. Godigo te tiwai emainao.” Tama augwaligo te Genuai Bidi nogi ugwaba sali. Tama augwa beba ma pelabo sogo, augwaligo te augwa dąų walali po wali pai dao.
Nehemiago aga digi aga naga tau sabo homu me ebeo
14 Ena te Juda gavman polalubo bidi bidibadi, te kibu be nogo si olama, sągągo si bidali, te Artaserksis te kibu be bidi sese deli te king bidibo side gagalasa, te aga kibu be te 32 yia, teba usu nagasalio. Tama te kibu be dabede ena dali, te eno hani daligo te kingo te namba wan gavman te polalubo bidiba mabo te mone selama, te eno nai me abela tubeo.
15 Te ena gavman bidi bidisiąbadi, te provinsde polasa gavman bidali bidi dabe, augwaligo te we bidi dabeba genuai sęgę mawai. Augwaligo te we bidi dabede te nai me, wain me, te mone 400 kina anoma elama siyu yali. Tama me te gavman bidigo sę bidi dabego te we bidi dabe augwali aiyaba elalu yai. Tiali goli, ena te God dologode bidiyu, tede homugo kone palobaso, tama tiyu, eno te tiwai kolesaga me ebeo.
16 Tama eno te tǫ me deli me abelibeo. Menio. Eno te sę bomo mu eyu, tama te Jerusalem masigi obo nigibo bidi dabe tau sali. Tama eno bede sę ebo sę bidi augwaligo me, augwaligo te obo banis nigibo bidi dabe tau sai dao.
17 Tigidali side te bidi sese hauwa te 150 we bidi eno beba nai tuagasali. Te augwali tobolu bidi dabe dali, te Juda olo we bidi dali, te nai tuagasiyu idualio. Tama te gasa bulu tǫ pedai we bidi dabego da suagasobo sogo da, teda augwali me te eno bede nai tuai dao.
18 Eno te tiwai po te nai ulubo bidi dabebolo wai, te tigidali nai ulubo sogo augwaligo te bulmakau omai me deli elama ulali, tama te wiegi yai sipsip te a naga olama, me nogo deli uluyu yai, tama te ba kakaruk te hauwa te we bidi dabego tumainu ulali. Tama te nogo si nogo si side te nai ulubo bidi dabego te we bidi dabego tuabo wain wę hauwa mu siąo wali. Te Juda we bidide genuai sęgę elalubo eno koneani, tama tiyu, te kingo enabolo te nai abelabo mone te we bidide sao po obaso, te eno me sabeo. Menio. Eno te nai ena monego digi abelali.
19 “God, eno nageba hanalu obao, te nago homugo eno te we bidi dabe tau siyu, te wiegi yai sę dabe ebaso, tama nago enade wiegi yai sę ilao,” po walio.