4
Godigo Abraham doloba pai bidi nogi poai
1 Awe, te Abrahamde me te tiwai pedalali. Abraham aga te da tiwai bidi, tama aga da Juda dabego wąį mu dao. Tama dago agade homu kone paluyu, tama Godigo bidi doloba pai bidi ilibo kolesaga page dago bugagia koneagameo. Agade magi sę pedalaliwe?
2 Te mu tama Abrahamgo te dwagi yai kolesaga ebaso tama tede aga te doloba pai bidi pedaligi sogo da, teda aga digi aga nogi ugwaba sainogo tigi dao. Tiali goli God gedude aga digi aga nogi ugwaba sigi meni.
3 Tama te sęde te Godigo po bukude e tiwai po wai dao, “Te Abrahamgo Godigo wali pode te mu po dao aga homu tomode weyu, tama Godigo po homude dąų wali. Tama tibaso, Godigo ‘Te Abraham te doloba pai bidi dao’ wali,” te bukude te po elalubao.
4 Dago koneani, bidigo sę elama sabo mone, te mone dago te olo sabo dao te nogi nogi egobeo. Menio. Te sę ebo wei naga ponobo nai dao.
5 Tiali goli te Godigo te bidi dabe doloba pai bidi ilibo kolesaga te tiwai menio. Te menio. Bidi me deligo homu eyu ‘Eno te Godide konealubo po dąų obaso, agai ena te doloba pai bidi nogi poaibao. Eno ena ebo sęde te nogi sogobeo.’ Te homu ebo bidi agai homugo te God da te dwai sę yali we bidi te doloba pai bage ilibo God dao. Tama te homu ebo bidigo homugo konealubo po Godiba dąų obaso, teda Godigo gedude te tiwai konealubo po dąų wali bidi te doloba pai bidi dao. Tama Godigo agabolo te nogi olo mawai, te bidigo aga yali sęgo abelebeo.
6 Tama te polobadu bidai bidi nogi Devit agai te tobage bomai po wali pisąwani doloba pai bidi nogi sai bidide homu kone paluyu, tama Devitgo te bidi aga wiegi yai homu pemene ebo koneai dao.
7 Tama te koneama, tama tede Devitgo te po asęani,
“Te Godigo bidi dabego te bomai po bolali dwai
kolesaga sela sąnama, tama augwaligo dwai sę yali
kolesaga mesegelali, te bidi dabe augwali wiegi yai
homu pemene mu ebo dao.”
8 “Te Genuai Bidigo bidi me deligo dwai sę yali
te homu me konesiąbaso da, te bidi aga wiegi yai
homu pemene mu ebo dao.”
9 Tama te tigiwali togwali Juda bidi dabe augwali naga augwali te tiwai wiegi yai homu pemene emainogo yaibawe? Ma te tigiwali togosiąwai bidi dabe, te Juda hani isąwai bage, augwali me te wiegi yai homu pemene egowe? Woo, te tigiwali togosiąwai bidi dabe augwali me te wiegi yai homu pemene yaibao. Magi baso meni. Dago te po tama wabo dao:
“Abrahamgo homugo te Godigo agabolo nai maiabo
dąų walali po te mu po dao. Tama tiyu, Abrahamgo
te agade konealubo po dąų wali kolesaga te Godigo
sulama, tama Godigo homugo ‘Te Abraham te
doloba pai bidi dao,’ te po wali.”
10 Tialima, Abraham te mena tama bidibadi tama Godigo aga doloba pai bidi da homu yaliwe? Ma aga tigiwali togwai elalubadi, ma aga tigiwali togosiąbadi dawe? Te aga tigiwali togosiąbadi tama Godigo homugo aga te doloba pai bidi da te homu elama, tama aga doloba pai bidi nogi wai dao.
11 Aga te tigiwali togosiąbadi, tama agai Godide konealubo po dąų obaso, tama Godigo aga doloba pai bidi nogi wai. Tama nosali te sa muyu, te tigiwali togobo kolesaga mayu tebogo Godigo hania hanilali, te agai Abraham te doloba pai bidi nogi polali dao. Abraham agai hasia tama tilama, tama nosali gasa bidi dabe augwa tigiwali togosiąbadi goli, te Godigo augwalibolo te doloba pai bidi nogi omainogo eyu, tama augwaligo Godide te konealubo po dąų wai. Tama Abraham aga te kolesagade polasa pai bidi dao, tama augwali nosali wali asai. Tama tibaso aga da augwaligo hasia wąį monu bidai.
12 Tama aga te tigiwali togosiąwani bagego wąį naga ebeo. Menio. Aga da te da Juda dabego wąį mu me dao, te da te dena tigiwali togolama tama Abrahamgo sągądu wali pabo Juda bage, dago te konealubo po dąų wali. Tama tiyu te aga tigiwali togosiąbadi te sogo agai tama tiwai kolesaga dago yai dao.
Godigo dąų wali po te tigidali konealubo po dąų wabo bidibolo wali po dao
13 Polobadu Godigo po Abraham dali me te aga bulai wai dali po dąų wali elaluai, te agai te tigidali bulude bidibo we bidigo tǫ tigidali augwalibolo mawaibao po wai. Tiali goli Abrahamgo te bomai po wali pobaso Godigo te po agabolo dąų me wabeo. Menio. Abrahamgo Godide konealubo po dąų obaso tama Godigo aga doloba pai bidi nogi nogi yali, tama tibaso Godigo aga dali te tǫ maiabo po dąų wai dao.
14 Te e tiwai dao: te bidi augwaligo te bomai po wali pobaso, augwaligo tede naga te tigidali nai sabo tigi sogo da, teda te konealubo po dąų wabo kolesaga te olo nai tiwai elalugi da, tama te Godigo dąų wali po me te bomo menigi dao. Magi baso meni. We bidigo te bomai po tigidali bugagia wali pabo usu meni baso, tama sęgę sai we bidi bidibo dao.
15 Bomai po elalubaso da, teda dago koneani, te bomai po bolobo bidi aga Godigo nogode dene sabo tų te me elalubao. Tama te bomai po menigi sogo da, teda dago te bidigo bomai po bolobo te po me wagi menigi dao.
16 Tama tibaso, Godigo e homu ebo dago hania koneagameo, Godigo agai te nai maiabo dąų wali po mu po pedalomainogo eyu, te we bidi augwaligo te sa muani nai sabo homu eyu da, te augwaligo konealubo po agade dąų obaso da, augwaligo te nai saibao. Tama tiyu, tama te Godigo agai olo tau sabo kolesagago te polobadu dąų wali po mu po pedalobo dao. Tama elama, tama Godigo nai maiabo dąų wali po te bomo elalubao, te tigidali Abrahamgo bulai wai dabe nosali pedalabo bage augwalide te po bomo elalubao, tulalugobeo. Te bomai po elalubo Godide konealubo po dąų wabo Juda we bidi augwaligo naga te nai me sogobeo. Menio. Te bomai po elalusiąbo Juda hani isąwai bage me, augwaligo Abraham tiwai eyu tama Godigo dąų wali poba homu begi pobaso da, teda augwaligo me te Godigo maiabo nai mu saibao. Abraham aga da, te Godide konealubo po dąų wali we bidi da tigidaligo hasia wąį monu mu dao.
17 Tama tede te Godigo po bukude e tiwai po wai dao: “Eno nage te geninama pedalabo bidi hani hauwago wąį mubao” wai. Te dąų wali po Godigo obaso, Godigo gedude te po te bomo elalubao. Abraham te dago aya dao. Tama Abrahamgo konealubo po te dąų wali po wali peyu Godiba homu dąų wai. Te Godigo naga te isali bidi dabebolo te bidibo ula mayu, tama te pedalisiąwani nai dabe me i weyu, te augwali pedelainu ebo dao. Tama tibaso Abrahamgo e homu mu yali, te Godigo aga yaibao po wali sę te mu yaibao.
18 Abrahamgo Godigo te sę yaibao po wabo tų te agai me susiąbadi, tiali goli agai konealubo po mu dąų weyu, te tų suai bidigo ebo tiwai yalio. Tama aga te bidi hani hauwago wąį monu bidi pedelali, te Godigo wali po tiwai yalio, “Te nago bulai wai hani dabe e tiwai geninama tama pedalaibao,” te po wai dao.
19 Te Abrahamgo kibu be te bidi sese a naga te 100 kibu be pąde elalubadi, tama aga tigi te monu dabe tiwai elalualio. Tama aga we Sarago tigi me te mosi dabe tiwai yalio, augwali sigo wai ame nabo usubeo. Abrahamgo tede te homu yali, tiali goli agai Godigo wali pode konealubo po dąų wali te bomo kimi me isibeo. Te agai konealubo po dąų mu wai dao.
20 Godigo po weyu, te nai nosali pedalaibao po wali, tama Abrahamgo tede homu elama, tama homu si eyu, tama agai te konealubo po tagalabo te homu me ebeo. Menio. Agai homu te Godigo poba begi pai, tama tebogo aga bomo ilali. Agai tama tiyu, te Godigo nogi ugwaba selama,
21 tama kuna koneanio, God agai te sę yabo usu yaibao, te agai polobadu wali po tiwai wali pelama te sę mu yaibao.
22 Tama Godigo homugo ‘Te Abrahamgo enade te konealubo po dąų obaso, te aga doloba pai bidi dao.’
23 Te po te Godigo po bukude elalubao, “Godigo homugo aga te doloba pai bidi da te homu yali,” agai te Abraham dali naga te po me wabeo.
24 Menio. Agai te po dabolo me walio. Te Godigo dago Genuai Bidi Jisas te gų pagede ma hodolali. Tama te sęde dago konealubo po dąų obaso da, teda Godigo homugo da te doloba pai we bidi dao, te homu agai da dali me yaibao.
25 Godigo Jisas e tǫba tagala palali te aga isąma dago dwai sę yali sęgę sela sąmainogo yai. Tama tiyu me, Godigo aga te gų pagede ma hodolaligo te agai da doloba pai we bidi nogi emainogo tiai dao.