5
Gesi ogwa bidigo balia po tama wali
1 Eno we, nage eno hobolu du mu da,
ena te ena giba asalio.
Tama eno te wiegi yai denami ebo nai dabe sisinagasali.
Eno te wiegi yai pusu yai nai hani tuali.
Te eno ame pę me wain dali tuali.
Te we dabe augwaligo balia po tama wali
Dage si abagi wali wiegi yai mu da,
dage si nai me ąį tuao, dage si mu pągąną pao.
Me si me si wabo balia po
Gesi wegigo balia po te tiwai wali
2 Te hulide ena godege pila mudu digi,
tialima, eno homu kone palobo sę iduali.
Te eno nade suali, te eno bidigo eno be
sunumiba bebego udalio.
Gesi ogwa bidigo balia te tiwai wali
Eno we da, te eno hobolu du mu dao,
nago be sunumi dalama,
ena tomoba asabo nigilao.
Te hulide segeni ąį te eno tobolu niside
pągąwai elalubao.
Gesi wegigo balia po te tiwai wali
3 Eno ena gudali ugwa peda muani,
tama eno te ugwa ma gudubo hagela ebao.
Eno ena sągą ąį telawali,
te ena hogodama biliyu,
te sągą meda ma ilibo te ena hagela ebuo.
4 Tialima, eno abagi wali bidigo
te sunumide daganama,
uga siyu, edaba tola siyu ebo nai
handelba nogo tola sagasida wabo eno odama,
tama eno haliga hogodalu,
te eno wiegi yai homu pemene yalio.
5 Ena hodalu, sunumi dawainu yali.
Eno nogo te sunumide daganani uga tola siyu,
eda tola siyu ebo nai
handelba nogo diąbadi,
tama ena nogode elaluali
te sandago te sunumide daganani nai
handelde te sanda dagana sali.
6 Eno ena abagi sunumi dalali.
Tiali goli, aga pai yalio, tama eno aga subeo.
Eno agai wali pode homu kone palama,
tama eno haliga dwai mu yalio.
Te eno aga gegebo sę yali,
tiali goli eno aga me subeo.
Eno aga i wali, tiali goli agai eno i weyu
me ponobeo.
7 Te taun bagulali moni obo tonalubo
bidigo ena suali.
Te augwaligo ena elama, te eno tigi dolama,
tama augwaligo eno bulali ugwa saket sali.
8 Te Jerusalem we dabe,
te dagego eno abagi wali bidi subaso da,
dagego te tiwai po dąų walama, agabolo wao,
eno aga homu godolo mu elama,
te eno nogo sągą dili
kimi meni yai elalubo po walao.
Te we dabe augwaligo balia po te tiwai
9 Nage gasa sawi yai we,
tama nago tigidali we aiyaba elalualio.
Nago te bidi aga mena tobage bidi dawe?
Te da gasa we dabego bidi aiyaba elaluali homu ebaso,
tama nago homugo dago
te tiwai po dąų omainogo ebawe?
Gesi wegigo balia po te tiwai wali
10 Eno abagi wali bidi te aga bomai bidi mu da,
te agai gesabidi gasa sawia pai mu da,
tama te tǫde bidi nedabo usu isiąbo
te hauwa tausen bidi mu aiyaba elaluai dao.
11 Agai gesabidi ula te gol tiwai.
Agai tobolu nisi te husugu yai mu,
te husugu bago tigi nisi tiwai elalubo.
12 Agai gedu begelebo sę umabo mu iduali,
te ąį pauwai ba te ąį sesegede
tolalubo tiwai gilama yai.
13 Te agai naboge badu tobolu nisi te wiegi yai,
te gide wiegi yai denami yai plaua dabe
elalubo tiwai yalio.
Agai pedauwali te sawi yai plaua tiwai elaluali.
Agai wabo po wiegi yai mu ebaso,
te denami ebo wiegi yai sanda tiwai elalualio.
14 Agai nogo te wiegi yai mu tama.
Tama agai te gasa tedali au gasagi yai
ring dabe te aga nogo dani au ilama muani.
Agai tigi tedela mu yai,
te tigi ula umabo mu yalio.
Tama agai kukulu augwaligo te sisi dugusu yai
te gasa au tedali yai masigigo au ilalio.
15 Agai sągą si augwaligo te wiegi yai
tedela yai masigigo nigali pos si tiwai elama,
tama te mu udula pai gol
pedai si elalubo pedai badu dolaluali.
Te noma yai polalubo mu
te ni sida wiegi yai dabe tiwai,
me te Lebanon genuai bulu du dabe
elalubo tiwai yalio.
16 Agai ena dali naboge si dilibo sogo da,
eno te pusu umagi mu yalio.
Agai tigi pedai tigidali badu
usu nama, te wiegi yai naga yali.
Dage Jerusalem we dabe,
eno bidi da te tama tiwai tobage bidi me dao.