7
Gesi bidigo balia po te tiwai wali
1 Eno abagi we, nage te kwin we
me deli tiwai mu polalubao.
Nago sągą nadoba bulali,
tama nago sągą meda meni yai mu elalubao.
Nago sągą te sawia pai mu da, te piksa noma me deli
te kolesaga konea pai bidigo te masigi togolama,
nigali piksa noma tiwai mu yali.
2 Nago mosogobe te kap tiwai
te wain pągąwai pusu yai
pauda dali taluai tiwai yali.
Nago pamene si te gasa sawi yai mu
te wit me deli pesage holali tiwai,
augwaligo te sawia pai plaua dagego
au ilali tiwai dao.
3 Nago ame si te wiegi yai bulu uni hasa si tiwai da,
augwa idago augwali si deli sogo ame nani.
4 Nago dogoni magete tedela yai taua me deli tiwai.
Nago gedu te genuai taun Hesbon sunumi pąde elalubo
dwasianu sigi ąį ge tiwai yali.
Nago guni wiegi yai mu tama,
te Lebanon tonalubo bidi dabego taua tiwai,
te augwaligo Damaskus pedai badu tonalubo dao.
5 Nago tobolu ugaba mu igulali,
te Karmel bulu du tiwai.
Nago tobolu nisi udula pali,
te kingo sawia pai name ugwa tiwai yali.
Tama te tobolu nisigo te king tulaluabo sę mu ilibo dao.
6 Eno abagi we, nage gasa sawi yai we mu da.
Eno nage godolo mu ebao,
te nago tigidali naigo ena pemene ilibo dao.
7 Nage wiegi yai mu te doloba pai ni kokonas tiwai.
Te nago ame te aga du dabe tiwai da.
8 Ena te kokonas nidu ugaba holama,
te nai aga du saibao.
Eno nago ame suali, te du hauwa walai wain
nologo elalubo tiwai yali.
9 Eno nago pedauwali denami odali,
te wiegi yai nedu du laulau denami ebo tiwai.
Nago ena dali nono nani,
te wain ąį pusu mu ebo tiwai yali.
Gesi wegigo balia po te tiwai wali
Awe, eno abagi wali bidi,
eno te wain nage mawaibao.
Te godege pibo sogo me
te tobage wain wiegi yai ebo da.
10 Ena te ena abagi wali bidigo we da,
te agai ena godolo mu ebo dao.
11 Eno abagi wali bidi, nage ena dali asao.
Tama da te dwasianu bulu dabeba bidigi pinao.
12 Te kigamu digi mu te da hogodasa peyu,
te wain ni dabe sueibao.
Te augwali kulubi pedelama,
te augwa yabe diligi naniwe,
ma meniwe, te homu ebao.
Tama dago te nai du wiegi yai walobo ni dabe sueibao.
Te augwa plaua dabe diligi naniwe, ma meni yaliwe?
Da te wain gide bidalu,
te eno te tiwai nagebolo ola mobaso,
te eno nage godolo mu eba homu yagameo.
13 Eno abagio, eno te wiegi wiegi yai
ni du wai naga selama,
te be sunumi pąde muai elaluali,
te nago tumainogo yali.
Meba eno polobadu sali, tama meba megi naga eno sali.
Tama dago te wiegi yai bono dabe denami ebaso,
te dago godolo ebo homu hodolomainu ebao.