Ko
NGĀ MAHI
a ngā Āpōtoro
Kupu Whakataki
Ko Ngā Mahi a Ngā Āpōtoro he roanga ake oTe Rongopai ki te Ritenga a Ruka. Tōna kaupapa matua ki te whakaatu i pēhea ngā kaiaru tuatahi a Īhu, e ārahina ana e te Wairua Tapu, e hohou ana i te Rongopai mōna “ki Hiruhārama, ki Hūria katoa, ki Hamāria o te ao.” (1.8) Koia nei te kōrero mō te rōpū Karaitiana i tōna tīmatatanga i waenganui i te iwi Hūrai, ka tipu ake hei whakapono mō te ao. I āwangawanga anō te kaituhi ki te whakaahuru i ngā kaipānui ehara ngā Karaitiana he hunga whakaturaki tōrangapū ki te Emepaea o Roma, atu anō ko tā te whakapono Karaitiana te whakaritenga o te hāhi Hūrai.
Ka taea te wehe i Ngā Mahi ki ngā wāhanga e toru, e whakaatu ana i te whānui o te hāhi. (1) Te tīmatatanga o te whakapono Karaitiana ki Hiruhārama ā muri mai i te kakenga atu o Īhu: (2) te whakawhānui atu ki ētahi atu rohe o Paratini; me (3) te whakawhānui atu ki ngā rohe o te ao o Metitareiniana puta noa ki Roma.
Te mea tino nui o Ngā Mahi ko te ngangahau a te Wairua Tapu, ka tau mai me tōna mana ki ngā hunga whakapono i Hiruhārama, i te rā o te Petekoha, me te mahi tonu hei kaiārahi, hei whakakaha hoki i te hāhi me ōna kaihautū, puta noa i ngā mahi i rīpoatahia nei i roto i te pukapuka. Ko te pūrongo a ngā Karaitiana mātāmua i whakarāpotototia ki ētahi kauhau, ka kitea te kaha o te pūrongo o Ngā Mahi i roto i te oranga o ngā kaiwhakapono me te whanaungatanga o te hāhi.
Rāpopoto o Ngā Take
Te whakaritenga mō te kaiwhakaatu 1.1-26
a. Tā Īhu tohutohu me tōna ōhākī whakamutunga 1.1-14
e. Te kaiwahakakapi o te tūranga o Hūrā 1.15-26
Te tauwhakaatu i Hiruhārama 2.1–8.3
Te tauwhakaatu i Hūria me Hamāria 8.4–12.25
Te minitatanga a Paora 13.1–28.31
a. Te mihinare haerenga tuatahi 13.1–14.28
e. Te hui i Hiruhārama 15.1-35
i. Te haerenga mihinare tuarua 15.36–18.22
o. Te haerenga mihinare tuatoru 18.23–21.16
u. Paora he mauhere i Hiruhārama, Hiharia, me Roma 21.17–28.31
1
1 Ko te pukapuka tuatahi rā he mea tuhituhi nāku, e Tiopira, mō ngā mea katoa i tīmata ai a Īhu te mahi, te ako,
2 taea noatia te rā i tangohia atu ai ia, i muri i tāna whakaakoranga, arā i tā te Wairua Tapu, ki ngā āpōtoro i whiriwhiria e ia.
3 He maha hoki ngā tohu i whakakite ora ai ia i a ia ki a rātou, i muri i tōna whakamamaetanga, e whā tekau hoki ngā rā i kitea ai e rātou, kōrerotia ai e ia ngā mea o te rangatiratanga o te Atua.
4 Ā, i a rātou ka huihui tahi me ia, ka whai kupu ia kia kaua rātou e haere atu i Hiruhārama, ā, ka mea, “Engari, kia tāria te mea i kōrerotia i mua e te Matua, i rongo rā koutou ki ahau.
5 I iriiri hoki a Hoani ki te wai; ko koutou ia, e kore e maha ake ngā rā, ka iriiria ki te Wairua Tapu.”
Ka Mauria ake a Īhu ki te Rangi
(Māka 16.19-20; Ruka 24.50-53)
6 Nō reira, i a rātou ka tāmene, ka ui rātou ki a ia, “E te Ariki, ko te wā ianei tēnei e whakahoki ai koe i te rangatiratanga ki a Īharaira?”
7 Nā, ko tāna meatanga ki a rātou, “Ehara mā koutou te mōhio ki ngā tāima, ki ngā wā rānei, kua whakaritea e te Matua māna ake te tikanga.
8 Otiia, ka riro he kaha i a koutou, ina haere mai te Wairua Tapu ki runga ki a koutou, ā, hei kaiwhakaatu koutou mōku ki Hiruhārama, ki Hūria katoa, ki Hamaria hoki, ā tae noa ki te pito whakamutunga o te ao.”
9 Ā, nō ka mutu tāna kōrero i ēnei mea, i a rātou anō e titiro atu ana, ka tangohia atu ia, ā, nā te kapua i kōpaki atu i ō rātou kanohi.
10 Ā, i a rātou e titiro matatau atu ana ki te rangi, i a ia e haere ana, nā, ko ngā tāngata tokorua e tū ana i tō rātou taha, he mā ngā kākahu.
11 E mea ana, “E ngā tāngata o Kariri, he aha tā koutou e tū, e mātakitaki atu nā ki te rangi? Ko tēnā Īhu kua tangohia atu nā i a koutou ki te rangi, ka pērā anō tōna haerenga mai me ia i tirohia atu nā e koutou e haere ana ki te rangi.”
Te Kairīwhi o Hūrā
(Matiu 27.3-10)
12 Nā, hoki ana rātou ki Hiruhārama i te maunga e huaina nei ko Ōriwa, he wāhi e tata ana ki Hiruhārama, he haerenga hāpati.
13 Ā, ka tomo rātou, ka kake ki te rūma i runga, ki te wāhi i noho ai rātou; arā a Pita, a Hēmi, a Hoani, a Anaru, a Piripi, a Tamati, a Patoromu, a Matiu, a Hēmi tama a Arapiu, a Haimona Heroti, a Hūrā te teina o Hēmi.
14 Ko ēnei katoa kotahi tonu te whakaaro i ū ai ki te īnoi, ki te karakia, me ngā wāhine; me te whaea o Īhu, me Meri; me ōna tēina.
15 I aua rā, ka whakatika a Pita i waenganui o ngā ākonga; ā, he tokomaha ngā tāngata i huihui, kei te kotahi rau e rua tekau; ā, ka mea,
16 “E hoa mā, e ōku tēina, i tika anō kia whakaritea tēnei karaipiture, tā te Wairua Tapu i kōrerotia rā i mua e te māngai o Rāwiri mō Hūrā, mō te kaiārahi i te hunga nāna i hopu a Īhu.
17 I huihuia tahitia hoki ia ki a tātou, i a ia anō tētahi wāhi o tēnei mahi.”
18 (Nā, hokona ana e taua tangata tētahi māra ki te utu o tōna hara; ā, taka tūpou iho, kōara pū i waenganui, pakaru katoa ki waho ōna whēkau.
19 I mōhiotia tēnei e te hunga katoa e noho ana i Hiruhārama; nā reira taua wāhi i huaina ai ki tō tātou reo ko Akērama, arā ko te Māra o te Toto.)
20 “Kua oti hoki te tuhituhi ki te pukapuka o Ngā Waiata,
‘Kia ururuatia tōna nohoanga,
kaua hoki tētahi tangata e noho ki reira’,
me tēnei:
‘Kia riro tāna mahi tirotiro i tētahi atu.’
21 “Nō reira, ko ngā tāngata i haere tahi nei tātou, i ngā wā katoa i hāereere mai ai, i hāereere atu ai te Ariki, a Īhu i roto i a tātou,
22 hei te iriiringa a Hoani tīmata ai, ā tae noa ki te rā i tangohia atu ai ia i a tātou, me whakatū tētahi o ērā hei hoa mō tātou ki te whakaatu i tōna aranga mai.”
23 Ā, tokorua a rātou i whakarite ai, ko Hōhepa i huaina nei ko Pāhapa, ko tētahi o ōna ingoa ko Hutuha, rāua ko Matiaha.
24 Nā, ka īnoi rātou, ka mea, “Ko koe, e te Ariki, e mōhio ana ki ngā ngākau o te katoa, māu e whakaatu ko wai o tēnei tokorua tāu i whiriwhiri ai,
25 hei tango i te wāhi i tēnei mahi minita, i te tūranga āpōtoro hoki, i taka atu a Hūrā, he mea kia haere ai ia ki tōna wāhi.”
26 Nā, ka makā e rātou ō rāua rota; ā, ka tau te rota ki a Matiaha; ā, uru ana ia ki ngā āpōtoro tekau mā tahi.