Ko te Pukapuka
Tuatahi
a Paora Āpōtoro ki te
HUNGA O KORINITI
Kupu Whakataki
Ko te pukapuka tuatahi a Paora ki te hunga o Koriniti i tuhia ki te whai i ngā raruraru e pā ana ki te oranga me te whakapono o ngā Karaitiana i kake ake mai i te hāhi i whakaūkia e ia i Koriniti. I tērā wā he taone nunui nō ngā Kariki o Koriniti, te taone mātāmua o te takiwā o Roma, o Akāia. E mohio whānuitia ana mō āna mahi hokohoko, āna tikanga whakahirahira, āna kikino whānui, mō ōna momo tikanga i te koropiko ki ngā atua.
Ko ngā tino pūtake a te āpōtoro ko ngā raruraru pēnei i ngā wehewehe me ngā kikino i roto i te hāhi, me ngā pātai mō te ai me te mārena, te ngākau whakawā, ritenga a te hāhi, ngā takoha a te Wairua Tapu, me te aranga. Nā tōna kitenga hōhonu ka whakaaturia e ia i pēhea te whakautu a te Rongopai ki ēnei pātai.
Ūpoko 13, e tohu ana ko te aroha te tino koha a te Atua ki tāna iwi, ko ēnei hoki te ūpoko tino mōhiotia ana o roto i te pukapuka.
Rāpopoto o Ngā Take
Tīmatanga 1.1-9
Ngā wehenga i roto i te hāhi 1.10–4.21
Ngā tikanga aitanga me te noho a te whānau 5.1–7.40
Ngā Karaitiana me te hunga kore whakapono 8.1–11.1
Te oranga hāhi me ngā karakia 11.2–14.40
Te aranga o te Karaiti me te hunga whakapono 15.1-58
Ngā ohaoha mō ngā Karaitiana i Hūria 16.1-4
Ngā take tangata me te whakamutunga 16.5-24
1
He Mihi
1 Nā Paora, i pai nei te Atua kia karangatia hei āpōtoro mā Īhu Karaiti, nā te teina hoki, nā Hotene –
2 Ki te hāhi a te Atua i Koriniti, ki te hunga kua oti te whakatapu i roto i a Karaiti Īhu, kua karangatia hei hunga tapu, rātou ko te hunga katoa i ngā wāhi katoa e karanga ana ki te ingoa o tō tātou Ariki, o Īhu Karaiti, o tō rātou Ariki, o tō tātou:
3 Kia tau ki a koutou te aroha noa me te rangimārie, he mea nā te Atua, nā tō tātou Matua, nā te Ariki hoki, nā Īhu Karaiti.
He Manaakitanga i roto i a te Karaiti
4 He whakawhetai tonu tāku mahi ki tōku Atua mō koutou, mō te aroha noa o te Atua kua hōmai nei ki a koutou i roto i a Karaiti Īhu;
5 kua meinga hoki kia hua ngā mea katoa mā koutou i roto i a ia, te whakapuaki kōrero, te mātauranga;
6 pēnā hoki me te whakaaturanga i a te Karaiti kua ū nā i roto i a koutou.
7 I kore ai koutou e hapa i tētahi mea hōmai; i a koutou e tatari nā ki te whakakitenga mai o tō tātou Ariki, o Īhu Karaiti.
8 Māna hoki koutou e whakaū ā taea noatia te mutunga, kia kore ai koutou e ekengia e te kupu i te rā o tō tātou Ariki, o Īhu Karaiti.
9 He pono te Atua, nāna nei koutou i karanga kia uru tahi ki tāna Tama, ki a Īhu Karaiti, ki tō tātou Ariki.
Wehenga i roto i te Hāhi
10 Nā, he tohe tēnei nāku ki a koutou, e ōku tēina, i runga i te ingoa o tō tātou Ariki, o Īhu Karaiti, kia kotahi tā koutou kōrero katoa, ā, kia kaua he wehewehenga i roto i a koutou; engari, kia tuituia koutou i runga i te ngākau kotahi, i te whakaaro kotahi.
11 Kua oti hoki koutou te tohutohu mai, e ōku tēina, e te hunga o te whare o Koroi, tēnā ngā tautohetohe kei roto i a koutou.
12 Ānei te tikanga o tāku kōrero, kei te kī tēnā o koutou nā, “Nō Paora ahau,” ā, “Nō Aporo ahau,” ā, “Ko ahau nō Kipa. Ko ahau nō te Karaiti.”
13 Kua oti koia a te Karaiti te wāhi? I rīpekatia rānei a Paora mō koutou? I iriiria rānei koutou i runga i te ingoa o Paora?
14 E whakawhetai ana ahau ki te Atua, mōku kīhai i iriiri i tētahi o koutou, ko Kirihipu anake rāua ko Kaiu;
15 kei waiho e te tangata hei kōrero, nāku koutou i iriiri i runga i tōku ingoa.
16 (Nāku anō i iriiri ngā tāngata o te whare o Tepana; i kō ake, kāhore ahau i te mahara ki tāku iriiringa i tētahi atu.)
17 Kīhai hoki ahau i tonoa e te Karaiti ki te iriiri, engari, ki te kauwhau i te rongopai; ehara i te mea i runga i te mōhio ki ngā kupu, kei whakakāhoretia te rīpeka o te Karaiti.
Ko te Karaiti te Mana me te Mātauranga o te Atua
18 Ko te kōrero hoki o te rīpeka ki te hunga e whakangaromia ana he mea wawau; ki a tātou ia, ki te hunga e whakaorangia ana, ko te kaha tērā o te Atua.
19 Ka oti hoki te tuhituhi;
“Ka ngaro i ahau te whakaaro nui o te hunga whakaaro,
ka kore hoki i ahau te mahara o te hunga mahara.”
20 Kei hea te tangata whakaaro? Kei hea te karaipi? Kei hea te tangata tohe o tēnei ao? Kāhore anō koia i whakakūwaretia e te Atua te whakaaro nui o tēnei ao?
21 I te mea hoki i runga i tō te Atua whakaaro nui, kīhai ngā whakaaro nui o te ao i mōhio ki te Atua. Nā, ka pai te Atua kia meinga te kūware o te kupu kauwhau hei whakaora i te hunga e whakapono ana.
22 Inā hoki ko tā ngā Hūrai he tono tohu, ko tā ngā Kariki he rapu whakaaro nui;
23 ko tā mātou ia he kauwhau i a te Karaiti i rīpekatia, he tūtukitanga waewae ki ngā Hūrai, he mea kūware ki ngā Kariki;
24 ki te hunga ia e karangatia ana, ahakoa Hūrai, ahakoa Kariki, ko te Karaiti, ko te kaha o te Atua, ko te whakaaro mōhio o te Atua.
25 Nō te mea he kūware nō te Atua nui atu te mōhio i ngā tāngata; he ngoikore nō te Atua kaha atu i ngā tāngata.
26 Titiro oti ki tō koutou karangatanga, e ōku tēina, kīhai i tokomaha te hunga whakaaro o te wāhi ki te kikokiko, kīhai i tokomaha te hunga nunui, kīhai i tokomaha ngā rangatira, e karangatia ana.
27 Engari, i whiriwhiria e te Atua ko ngā mea kūware o te ao, hei mea e whakamā ai te hunga whakaaro; i whiriwhiria anō e te Atua ko ngā mea ngoikore o te ao, hei mea e whakamā ai ngā mea kaha.
28 Ko ngā mea ware o te ao, ko ngā mea e whakahāweatia ana, ko ēnā i whiriwhiria e te Atua, āe, ko ngā mea kāhore noa iho, kia whakakāhoretia ai e ia ngā tino mea ake;
29 kia kore ai tētahi kikokiko e whakamanamana i te aroaro o te Atua.
30 Nāna hoki koutou i roto i a Karaiti Īhu, kua meinga nei ia hei take whakaaro nui mō tātou, he mea nā te Atua, hei tika, hei whakatapu, hei hoko.
31 Kia rite ai ki te mea kua oti te tuhituhi, “Ki te whakamanamana tētahi, me whakamanamana ia ki te Ariki.”