Ko te Pukapuka a Paora Āpōtoro ki te
HUNGA O KOROHE
Kupu Whakataki
Te Pukapuka a Paora Āpōtoro ki te hunga o Korohe i tuhia ki te Hāhi o Korohe, he taone i Āhia Maina ki te rāwhiti o Epeha. Ko tēnei hāhi ehara nā Paora i whakatō, engari, i tū ki roto i te takiwā i raro i āna kawenga, ā, e whakatoro ana i āna kaimahi mai i Epeha, te taone mātua o te takiwā o Roma ki Āhia. I rongo a Paora ki te horihori o ētahi kaiako i roto i te Hāhi o Korohe e whakahau ana ki te mōhio te tangata ki te Atua me te whiwhi oranga tonutanga, me koropiko ia ki ētahi momo ariki wairua me tā rātou kī, me ngohe kau ki ētahi kawa pēnei i te kokotinga me te whakapono tūturu ki ngā kawa e pā ana ki te kai me ētahi atu mea.
Ka tuhia e Paora ōna whakapae o ēnei momo akoranga o te rongopai karaitiana. Ko te iho o tāna whakautu, mā Īhu Karaiti e āhei ai te hōmai i te oranga tonutanga, ā, ko ērā atu akoranga e whāia rā, e huri tuarā kē ana ki a ia. Mā roto i a te Karaiti i hangaia e Te Atua te ao, ā, mā roto i a te Karaiti ka whakahokia mai te ao ki a ia anō. Mā runga i te whakakotahitanga me te Karaiti anake he awhero oranga tonutanga mō te ao. Kātahi ka whakamāramatia e Paora ngā whakataunga o tēnei akoranga whakahirahira mo te hunga whakapono. Te mea i kitea ko Tikuku, nāna nei i mau te reta a Paora ki Korohe, i haere tahi me Onehimu, he taurekareka, i tuhia nei e Paora he pānui mōna ki Pirimona.
Rāpopoto o Ngā Take
Tīmatanga 1.1-8
Te āhua ki ngā mahi a te Karaiti 1.9–2.19
Te oranga hou i roto i a te Karaiti 2.20–4.6
Whakamutunga 4.7-8
1
He Mihi
1 Nā Paora, i paingia nei e te Atua hei āpōtoro mā Karaiti Īhu, nā tō tātou teina hoki, nā Tīmoti –
2 Ki te hunga tapu, ki ngā tēina whakapono hoki i roto i a te Karaiti, i Kōrohe:
Kia tau ki a koutou te aroha noa, me te rangimārie, he mea nā te Atua, nā tō tātou Matua.
He Īnoi Whakawhetai
3 Tēnei mātou te whakawhetai atu nei ki te Atua, arā ki te Matua o tō tātou Ariki, o Īhu Karaiti, me te īnoi tonu anō mātou mō koutou,
4 nō mātou ka rongo nei ki tō koutou whakapono ki a Karaiti Īhu, ki tō koutou aroha hoki ki te hunga tapu katoa;
5 mō te mea e tāria atu nei, e takoto mai nei mā koutou i te rangi. Ko tā koutou i rongo ai i mua ki te kupu o te pono o te rongopai,
6 kua tae atu nā ki a koutou; kua whai hua hoki, ā, kua nui haere ki te ao katoa, pēnā hoki i roto i a koutou, nō te rā anō i rongo ai, i mātau ai koutou ki te aroha noa o te Atua i roto i te pono.
7 I whakaakona atu nā hoki koutou ki tēnā e Epapara, e tō mātou hoa pononga e arohaina nei; he minita pono nei ia nā te Karaiti ki a koutou.
8 Nāna hoki i whakakite mai ki a mātou tō koutou aroha i runga i te Wairua.
9 Nō konei hoki, mai o te rā i rongo ai mātou, kāhore e mutu tā mātou karakia me tā mātou īnoi mō koutou, kia whakakīa koutou ki te mōhio ki tāna e pai ai, i runga i ngā whakaaro nui katoa, i te mahara wairua anō hoki.
10 Kia tika ai tā koutou haere, kia rite ai ki tā te Ariki, āhuareka rawa, hua rawa i runga i ngā mahi pai katoa, tupu tonu i runga i te mōhio ki te Atua.
11 Kia whakanuia te kaha hei whakakaha mō koutou, kia rite ki tā te mana o tōna korōria, e ū tonu ai, e whakamanawanui ai i runga i te hari.
12 Me te whakawhetai atu anō ki te Matua, nāna nei tātou i whai tikanga ai ki tētahi wāhi o te kāinga o te hunga tapu i roto i te mārama.
13 Nāna nei tātou i whakaora mai i te kaha o te pōuri, ā, whakawhitia ake tātou e ia ki te rangatiratanga o tāna Tama aroha.
14 Kei roto nei i a ia tō tātou whakaoranga i runga i ōna toto, arā te murunga o ngā hara.
Ko Karaiti me Tāna Mahi
15 Ko ia nei te āhua o te Atua e kore nei e kitea atu, ko te whānau mātāmua o ngā mea hanga katoa.
16 Nāna hoki ngā mea katoa i hanga, ngā mea i te rangi me ngā mea i te whenua, ngā mea e kitea ana me ngā mea kāhore e kitea, ahakoa torōna, ahakoa kāwanatanga, ahakoa rangatiratanga, ahakoa mana. Nāna, ā, mōna te hanganga o ngā mea katoa.
17 Nō mua anō hoki ia i ngā mea katoa, nāna anō hoki ngā mea katoa i mau ai.
18 Ko ia anō te ūpoko o te tinana, arā o te hāhi. Ko ia te tīmatanga, ko te whānau mātāmua i roto i te hunga mate; kia waiho ai ia hei tuatahi i roto i ngā mea katoa.
19 Ko tā te Matua tērā i pai ai, kia noho te huanga o ngā mea katoa ki roto ki a ia;
20 kia mā roto ai i a ia he houhanga rongo mō ngā mea katoa ki a ia, kua mau nei i a ia te rongo i ngā toto o tōna rīpeka; āe rā, mā roto i a ia, ahakoa he mea nō te whenua, ahakoa he mea nō te rangi.
21 Me koutou hoki he tāngata kē i mua, he hoariri te hinengaro i ngā mahi kino, nā, kua meinga nei e ia kia houhia tā koutou rongo,
22 i runga i te tinana o tōna kikokiko, he mea nā te mate; mō koutou anō kia tāpaea atu ki tōna aroaro, he hunga tapu, kāhore nei he koha, kāhore he hē;
23 ki te pūmau koutou ki te whakapono, ū tonu, mau tonu, tē taea te whakaneke atu i te tūmanako ki tā te rongopai i rongo ai koutou, kua kauwhautia atu nei ki ngā mea hanga katoa i raro o te rangi. Mō reira nei ahau, a Paora, i meinga ai hei minita.
Te Mahi a Paora he Pononga ki te Hāhi
24 Tēnei ahau te hari nei ki ōku mamae mō koutou, ka kapi hoki i ōku kikokiko ngā mate o te Karaiti kāhore anō i rite noa, hei mea mō tōna tinana, arā mō te hāhi.
25 Mō reira nei ahau i meinga ai hei minita, rite tonu ki tā te Atua tikanga ki a koutou i hōmai nei ki ahau, kia whakapaua te kauwhau o te kupu a te Atua,
26 o te mea ngaro i huna i ērā wā noa atu, i ērā whakatupuranga; ā, kua whakakitea ināianei ki tāna hunga tapu,
27 he meatanga nā te Atua, kia whakaaturia ki a rātou te taonga nui o te korōria o tēnei mea ngaro ki roto ki ngā tauiwi, arā, a te Karaiti i roto i a koutou, e tūmanako atu ai ki te korōria.
28 E kauwhautia nei e mātou, me te whakatūpato i ngā tāngata katoa me te whakaako i ngā tāngata katoa i runga i ngā whakaaro mōhio katoa, kia tāpaea atu ai e mātou ngā tāngata katoa, he mea tino tika i roto i a te Karaiti.
29 Ko tāku tēnei e uaua nei, e tohe nei i runga i tāna mahinga e kaha nei te mahi i roto i ahau.