Ko te Pukapuka a Paora Āpōtoro ki te
HUNGA O EPEHA
Kupu Whakataki
Ko te Pukapuka a Paora Āpōtoro ki te hunga o Epeha e pā tuatahi ana ki ngā whakaritenga a te Atua, kia huihuia ngā mea katoa, ngā mea katoa o te rangi me te whenua, ko te Karaiti hei ūpoko (1.10). He tono atu hoki ki te hunga a te Atua kia noho pūmau ki tēnei whakaritenga nui mō te whanaungatanga o ngā tāngata katoa o te ao i roto i te kotahitanga o Īhu Karaiti.
I te wāhanga tuatahi o Epeha, ka whāngaihia te kaupapa o te kotahitanga e te kaituhi, arā, mā te kōrero i te ara i tohua e te Atua Matua āna tāngata, i tāna murunga me te wewete i ō rātou hara mā roto i a Īhu Karaiti te Tama, me te oati a te Atua e mau pono ana mā te Wairua Tapu he whakamana. I te wāhanga tuarua, ka īnoi atu ia ki te hunga pānui, kia noho rātou pēnei i te mea nei mā tō rātou kotahitanga i roto i a te Karaiti ka noho tūturu pea i ō rātou wāhi noho tahi.
He nui tonu ngā kōrero whakarite ki te whakaatu i te kotahitanga o ngā tāngata a te Atua i roto i a te Karaiti, pēnei te hāhi i te tinana, ko te Karaiti te ūpoko, pēnei rānei i tētahi whare, ko te Karaiti te kokonga kōhatu; pēnei rānei i te wahine moe tāne, ko te Karaiti tōna hoa tāne. I eke rawa tēnei reta ki ngā taumata teitei mō ngā whakamārama a te kaituhi i whakamīharo nei i te aroha o te Atua i roto i a te Karaiti. Kua kitea katoatia ngā mea i te māramatanga o te aroha o te Karaiti, te whakahere, te muru, te whakapai, me te harakore.
Rāpopoto o Ngā Take
Tīmatanga 1.1-2
Te Karaiti me te hāhi 1.3–3.21
Te oranga hou i roto i a te Karaiti 4.1–6.20
Whakamutunga 6.21-24
1
He Mihi
1 Nāku, nā Paora, i paingia e te Atua hei āpōtoro mā Īhu Karaiti –
Ki te hunga tapu e noho ana i Epeha, arā ki te hunga whakapono i roto i a Karaiti Īhu:
2 Kia tau ki a koutou te aroha noa me te rangimārie, he mea nā te Atua, nā tō tātou Matua, nā te Ariki hoki, nā Īhu Karaiti.
Ngā Manaakitanga Wairua i roto i te Karaiti
3 Kia whakapaingia te Atua, te Matua o tō tātou Ariki, o Īhu Karaiti, nāna nei tātou i manaaki ki ngā manaaki katoa o te wairua ki ngā wāhi o te rangi, i roto i a te Karaiti;
4 i runga i te tikanga i whiriwhiria ai tātou e ia i roto i a ia i mua i te orokohanganga o te ao, hei hunga tapu, kohakore i tōna aroaro.
I runga i te aroha
5 he mea whakarite hoki tātou nāna i mua, hei tama māna, i roto i a Īhu Karaiti, ko tā tōna whakaaro hoki i pai ai,
6 hei whakamoemiti mō te korōria o tōna aroha noa, i atawhaitia ai tātou i roto i tāna i aroha ai.
7 Kei roto nei i a ia tō tātou whakaoranga i runga i ōna toto, arā te murunga o ngā hē; he hua hoki nō tōna aroha noa,
8 i hira rawa nei ki a tātou i runga i ngā whakaaro nui.
I ngā whakaaro mōhio katoa;
9 whakakitea mai ana hoki e ia ki a tātou tāna whakaaro ngaro, tāna hoki i āhuareka ai, tāna i whakatakoto ai i mua i roto i a ia,
10 mō te tikanga ina rite ngā wā, kia huihuia ngā mea katoa i roto i a te Karaiti, ngā mea i te rangi, me ngā mea i te whenua; i roto anō i a ia.
11 I whakawhiwhia nei mātou i roto i a ia, he mea whakarite i mua i runga i tāna i whakatakoto ai, e mahia ana hoki e ia ngā mea katoa i runga i tā tōna whakaaro i pai ai;
12 kia ai mātou hei whakamoemiti mō tōna korōria, arā mātou, te hunga kua tūmanako wawe ki a te Karaiti.
13 Me koutou hoki tūmanako ana anō koutou ki a ia, i tō koutou rongonga ki te kupu o te pono, ki te rongopai o tō koutou ora; ā, i tō koutou whakaponotanga ki a ia, nā, hīritia ana koutou e te Wairua Tapu i kōrerotia mai i mua;
14 hei taumau i ngā taonga mō tātou, kia whakaorangia rā anō tā te Atua mea i hokona, hei whakamoemiti mō tōna korōria!
Te Īnoi a Paora
15 Nā konei ahau, i tōku rongonga ki tō koutou whakapono ki te Ariki, ki a Īhu, ki te aroha anō hoki ki te hunga tapu katoa,
16 kāhore e mutu tāku whakawhetai mō koutou, me te whakahua anō i a koutou i āku īnoinga;
17 kia hōmai ki a koutou e te Atua o tō tātou Ariki, o Īhu Karaiti, e te Matua o te korōria, te wairua o te whakaaro nui, o te whakakitenga i runga i te mōhio ki a ia.
18 Kia whakamāramatia ngā kanohi o tō koutou hinengaro; kia mātau ai koutou ki te mea o tāna karanga e tūmanakohia atu nei, ki te korōria nui hoki o tōna taonga i roto i te hunga tapu,
19 ki te nui whakaharahara hoki o tōna kaha ki a tātou ki te hunga e whakapono nei, i runga i te mahinga a te mana o tōna kaha,
20 i mahi ai ia i roto i a te Karaiti i tāna whakaarahanga i a ia i te hunga mate, ā, whakanohoia ana ia ki tōna matau, ki ngā wāhi i te rangi,
21 ki runga ake i ngā kāwanatanga katoa, i te mana, i te kaha, i te rangatiratanga, i ngā ingoa katoa hoki e whakahuatia ana, ehara i te mea ko o tēnei ao anake, ko o tērā ao anō hoki.
22 Ā, tukua ana e ia ngā mea katoa ki raro i ōna waewae, meinga ana hoki ia hei ūpoko i runga i ngā mea katoa mō te hāhi,
23 arā, mō tōna tinana, e kī tonu nei i a ia, i te kaiwhakakī o ngā mea katoa i roto i te katoa.