☰ KARATIA 1
Ko te Pukapuka a Paora Āpōtoro ki te
HUNGA O KARATIA
Kupu Whakataki
Nā, ka tīmata nei te kauhau o te rongo­pai mō Īhu, me te au­mihi a te hunga ehara i te Hūrai, ka puta te pātai, me­he­mea me mau tonu te tangata i ngā ture a Mohi kia āta kitea tōna pono ki te hāhi Karaiti­ana? I tau­tohea­tia e Paora, kāre noa iho tēnā take i whai kiko, engari, ko te tino pūtake mō te oranga i roto i a te Karaiti, ko te whaka­pono, mā reira hoki e hāngai tika ai te katoa ki te Atua. Engari, i waenga o ngā hāhi o Karaiti, takiwā o Roma i Āhia Maina, tērā ētahi tāngata i whaka­hē ki tā Paora, me te kī, kia tika tonu te whai i ngā ture a Mohi kia tika ai ki tā te Atua.
Ko te Puka­puka a Paora Āpōtoro ki te hunga o Karatia he mea tuhi kia hoki mai ki te whaka­pono tūturu me ōna tikanga, te hunga i whaka­kotiti­tia e ēnei tohu­tohu teka. I tīmata a Paora ki te whaka­ngu­ngu i tōna tikanga kia kīa nei ia he āpō­toro nā Īhu Karaiti. Tino kaha tāna whaka­hau, nā te Atua tonu ia i tohu hei āpō­toro, ehara nā te mana tangata, ā, ko tāna mahi ake, ki te hunga ehara i te Hūrai. Ka whāngai­hia e ia te tau­tohe, arā, mā te whaka­pono anake e tika ai te tangata ki te Atua. Kei ngā wāha­nga whaka­mutu­nga, ka whaka­atu mai a Paora, ngā whaka­haere­nga Karaiti­ana, horo ngā­wari noa iho mai i te aroha, mai i te whaka­pono ki a te Karaiti.
Rāpopoto o Ngā Take
Tīmatanga 1.1-10
Te whakataunga i a Paora hei āpōtoto 1.11–2.21
Te rongopai mō te manako o te Atua 3.1–4.31
Ngā wetewete Karaitiana me ōna kawenga 5.1–6.10
Whakamutunga 6.11-18
1
He Mihi
1 Nāku, nā Paora, nā te āpō­toro, kīhai nei i tonoa e te tangata, kīhai anō hoki mā roto i te tangata, engari, mā roto i a Īhu Karaiti, i te Atua Matua anō hoki, nāna nei ia i whaka­ara i te hunga mate; 2 nā ngā tēina katoa hoki i ahau nei, ki ngā hāhi o Karatia:
3 Kia tau ki a koutou te aroha noa me te rangi­mārie, he mea nā te Atua Matua, nā tō tātou Ariki hoki, nā Īhu Karaiti.
4 I tuku nei i a ia anō mō ō tātou hara, kia whaka­ora­ngia ai tātou e ia i tēnei ao kino, i runga i tā te Atua, i tā tō tātou Matua i pai ai. 5 Waiho atu i a ia te korōria ake ake! Āmine.
Te Rongopai Kotahi
6 Mīharo tonu ahau ki te hohoro o tō koutou neke­hanga atu i te kai­karanga o koutou i runga i te aroha noa o te Karaiti ki tētahi rongo­pai kē. 7 Ehara nei ia i te mea kē atu; engari, tēnā tētahi hunga e whaka­raru­raru ana i a koutou, e mea ana kia whaka­putaia kētia te rongo­pai o te Karaiti. 8 Otirā, ahakoa ko mātou, ko tētahi ana­hera rānei o te rangi, ki te kauwhau i te rongo­pai ki a koutou, i te mea rere kē i tā mātou i kauwhau ai ki a koutou, kia kangā ia. 9 Kia rite ki tā mātou i kī ai i mua, ka kī anō ahau ināia­nei, ki te puta kē te kauwhau a tētahi ki a koutou i tērā kua riro i a koutou, kia kangā ia.
10 He tangata rānei, ko te Atua rānei, tāku e kukume nei? He tangata rānei āku e whai nei kia whaka­mānawa­reka­tia? Me­he­mea kei runga tonu ahau i te whaka­mānawa­reka tāngata, ehara ahau i te pono­nga nā te Karaiti.
Te Karangatanga i a Paora hei Āpōtoro
11 Nā, kia mōhio mai koutou, e ōku tēina, ko te rongo­pai i kauwhau­tia e ahau, ehara i te tangata. 12 Ehara hoki nā te tangata i riro mai ai i ahau, nāna rānei i whaka­ako ki ahau, engari i haere mai ki ahau rā te whaka­kite­nga mai a Īhu Karaiti.
13 Kua rongo nā hoki koutou ki tāku whaka­haere i mua i runga i tā ngā Hūrai tikanga, nui atu hoki tāku tūkino i te hāhi a te Atua, monga­monga ana i ahau. 14 I hipa noa atu ahau ki mua i ētahi toko­maha tonu o mātou, rite ngā tau ki ōku, i waenga­nui i tōku iwi ki te tikanga a ngā Hūrai, hira noa atu hoki tōku ngākau ki ngā whaka­rere­nga iho a ōku mātua.
15 Otirā, i te mea ka pai te Atua, nāna nei ahau i momotu mai i roto tonu i te kōpū o tōku whaea, i karanga hoki, he mea­tanga nā tōna aroha noa, 16 ki te whaka­kite i tāna Tama i roto i ahau, kia kauwhau­tia ai ia e ahau ki ngā tauiwi; i reira tonu iho kīhai ahau i kōrero­rero ki te kiko­kiko, ki te toto; 17 kīhai anō ahau i haere atu ki Hiruhārama, ki te hunga i āpō­toro i mua i ahau; heoi haere ana ahau ki Arāpia, ā, hoki ana mai ki Ramahiku. 18 Ā muri iho i te taka­nga o ngā tau e toru ka haere ake ahau ki Hiruhārama kia kite i a Kipa, ā, tekau mā rima ngā rā i noho ai ahau ki a ia. 19 Engari, kīhai ahau i kite i tētahi atu o ngā āpō­toro, ko Hēmi anake, ko te teina o te Ariki.
20 Nā, ko ngā mea e tuhi­tuhia atu nei e ahau ki a koutou, nana, kei te aro­aro tēnei o te Atua, kāhore āku teka.
21 Muri iho ka haere ahau ki ngā wāhi o Hīria, o Kiri­kia; 22 kīhai anō tōku mata i mōhio­tia e ngā hāhi o Hūria i roto i a te Karaiti; 23 i rongo kau rātou, “Ko te tangata tūkino i a mātou i mua, e kauwhau­tia ana e ia ināia­nei te whaka­pono i whaka­ngaro­mia rā e ia.” 24 Ā, whaka­korōria ana rātou i te Atua mō tāna ki ahau.
☰