Ko te Pukapuka
Tuatahi
a Paora Āpōtoro ki te
HUNGA O TEHARONIKA
Kupu Whakataki
I ngā wā o mua ko Teharonika te taone mātua o te takiwā o Makeronia. I whakatūria e Paora he hāhi ki reira i muri i tāna wehenga mai i Piripai. Engari, i muri tata mai ka puta ngā whakahē a ngā Hūrai; pūhaehae ana ki tō Paora angitu ki te kauhau i te rongopai karaitiana i waenga i ngā tauiwi kua huri pai ki te hāhi o ngā Hūrai. Ka uruhina a Paora kia wehe mai i Teharonika kia tae atu ki Perea. Ā muri i tōna taenga ki Koroniti ka mau i a ia te rīpoata a tāna takahoa, tāna hoa mahi a Tīmoti e mea ana te āhua ki te hāhi ki Teharonika.
Kātahi ka tuhia e Paora tāna pānui tuatahi ki te hunga o Teharonika e whakahau ana me te whakatūturu te hunga karaitiana o reira. Ka tuku whakawhetai i te rongo mō tō rātou whakapono me te aroha noa; ka whakamaharatia rātou, pēhea te whakahaere ia, ina e noho ana i a rātou, ā, ka whakautua ngā pātai i hua ake i roto i te hāhi mō te hokinga mai o te Karaiti. Ka taea anō te hunga whakapono kua mate noa atu i mua i te hokinga mai o te Karaiti, te whiwhi oranga tonutanga rā runga i tōna hokinga mai? Ā, āhea te Karaiti anō ka hoki mai? Ka hopukia e Paora tēnei wā hei whakahau i a rātou, kia āta mahi tonutia ngā mahi, i a rātou e tatari ana i roto i te tūmanako mō te hokinga mai o te Karaiti.
Rāpopoto o Ngā Take
Tīmatanga 1.1
Whakawhetai me te whakamoemiti 1.2–3.13
Whakahau te whanonga Karaitiana 4.1-12
Ngā tohutohu mō te haerenga mai o te Karaiti 4.13–5.11
Te whakahau whakamutunga 5.12-22
Whakamutunga 5.23-28
1
He Mihi
1 Nā Paora, nā rātou ko Hirawanu, ko Tīmoti –
Ki te hāhi o te hunga o Teharonika i roto i te Atua Matua, i te Ariki hoki, i a Īhu Karaiti:
Kia tau te aroha noa ki a koutou me te rangimārie.
Te Ora me te Whakapono o te Hunga Teharonika
2 Whakawhetai tonu mātou ki te Atua i ngā wā katoa mō koutou katoa, me te whakahua i a koutou i ā mātou īnoi;
3 mau tonu tō mātou mahara ki tā koutou mahi whakapono, ki te uaua o tō koutou aroha, ki te ū o te tūmanako ki tō tātou Ariki, ki a Īhu Karaiti, i te aroaro o te Atua, arā o tō tātou Matua.
4 E mōhio ana hoki mātou, e ngā tēina e arohaina nei e te Atua, ki tō koutou whiriwhiringa.
5 Kīhai hoki tā mātou rongopai i tae atu ki a koutou i runga i te kupu anake, engari i te kaha, i te Wairua Tapu, nui atu hoki te ū o te ngākau; pērā anō me koutou e mātau nā ki tō mātou āhua i roto i a koutou, he whakaaro ki a koutou.
6 Ā, ka whai koutou i tā mātou tauira, i tā te Ariki hoki, i riro uaua atu nā i a koutou te kupu, me te whakahari anō ia a te Wairua Tapu.
7 Nō ka waiho koutou hei tauira ki te hunga whakapono katoa o Makeronia, o Akāia.
8 I pakū haere atu nā hoki i a koutou te kupu a te Ariki, ehara i te mea i Makeronia, i Akāia anake, engari i puta atu tō koutou whakapono ki te Atua ki ngā wāhi katoa; nō reira kāhore he rawa e puaki ai tētahi kupu a mātou.
9 Ko rātou nei hoki kei te kōrero mō mātou, mō tō mātou taenga atu ki a koutou, mō tō koutou tahuritanga mai hoki i ngā whakapakoko ki te Atua, ki te mahi ki te Atua ora, ki te Atua pono;
10 ki te tatari anō hoki ki tāna Tama i te rangi, i whakaarahia ake nei e ia i te hunga mate, ki a Īhu, e whakaora nei i a tātou i te riri meāke nei puta.