Ko te Pukapuka
Tuarua
a Paora Āpōtoro ki te
Hunga o Teharonika
Kupu Whakataki
Ngā pōhēhē i manakohia ki te hokinga mai o te Karaiti ka noho tonu hei pūtake whakararu i te hāhi ki Teharonika. Te Pukapuka Tuarua a Paora Āpōtoro ki te hunga o Teharonika he whaihanga i te whakapono kua tae noa mai te rā hokinga mai o te Ariki. Ka whakatika a Paora i tēnei whakaaro e mea ana i mua i te hokinga mai o te Karaiti ka rewa ake te tino kino ki tōna ikeike i raro i tētahi kaiārahi hanganga porehu e kīa nei ko “Te Tangata o te Hara” (2.3) koia e ātete ana i a te Karaiti.
E whakataukī ana te Āpōtoro ko te mea nui mō ngā kaipānui kia noho pūmau i roto i tā rātou whakapono ahakoa ngā whakararu me ngā mamae, kia whai mahi hei oranga tinana pērā i a Paora me āna hoa mahi, me te tohe i te mahi pai.
Rāpopoto o Ngā Take
Tīmatanga 1.1-2
Te whakamoemiti me te whakamihi 1.3-12
Ngā tohutohu mō te haerenga mai o te Karaiti 2.1-17
Whakahau ki te whanonga Karaitiana 3.1-15
Whakamutunga 3.16-18
1
He Mihi
1 Nā Paora, nā rātou ko Hirawanu, ko Tīmoti –
Ki te hāhi o te hunga o Teharonika i roto i te Atua, i tō tātou Matua, i te Ariki hoki, i a Īhu Karaiti:
2 Kia tau ki a koutou te aroha noa me te rangimārie, he mea nā te Atua, nā tō tātou Matua, nā te Ariki hoki, nā Īhu Karaiti.
Te Whakawātanga i te Hokinga Mai o te Karaiti
3 He tika rawa kia whakawhetai mātou ki te Atua i ngā wā katoa mō koutou, e ōku tēina, he mea pai rā hoki ia, nō te mea e neke ake ana tō koutou whakapono, he nui rawa hoki te aroha o koutou katoa, o tētahi ki tētahi.
4 I whakamanamana ai mātou ki a koutou i roto i ngā hāhi a te Atua, ki tō koutou ū, ki tō koutou whakapono i ngā whakatoinga katoa i a koutou, i ngā tūkinotanga hoki e whakaririka kau nā koutou.
5 He tohu tēnei mō te tika o tā te Atua whakawā, kia kīa ai koutou he tau mō te kīngitanga o te Atua, e mate nei koutou he whakaaro ki tērā.
6 Mehemea ia he tika ki te Atua kia utua ki te kino te hunga e tūkino ana i a koutou;
7 ā, ki a koutou hoki e tūkinotia nā, kia okioki tahi me mātou, i te whakakitenga mai o te Ariki, o Īhu, i runga i te rangi me ngā anahera o tōna kaha,
8 i roto i te mura ahi e rapu utu ana i te hunga kāhore e mātau ki te Atua, kāhore nei hoki e ngohengohe ki te rongopai o tō tātou Ariki, o Īhu Karaiti.
9 Ko te utu hoki e whakapāngia ki a rātou he whakangaromanga, he mea mutungakore i te aroaro anō o te Ariki, i te korōria anō hoki o tōna kaha.
10 Ina haere mai ia kia whakakorōriatia i roto i tāna hunga tapu, kia whakamoemititia i roto i te hunga whakapono katoa i taua rā; i whakapono nā hoki koutou ki tā mātou whakaatu i roto i a koutou.
11 Koia nei mātou ka īnoi tonu nei mō koutou, kia meinga koutou e tō tātou Atua he tau mō tēnei karangatanga, kia whakaotia anō hoki e ia i runga i te kaha ngā mea katoa i āhuareka ai tōna pai, me te mahi anō hoki o te whakapono,
12 kia whakakorōriatia ai te ingoa o tō tātou Ariki, o Īhu Karaiti, i roto i a koutou, me koutou hoki i roto i a ia, kia rite ai ki tā te aroha noa o tō tātou Atua, o te Ariki hoki, o Īhu Karaiti.