Ko te Pukapuka a Paora Āpōtoro ki
NGĀ HIPERU
Kupu Whakataki
Te Pukapuka a Paora Āpōtoro ki ngā Hiperu i tuhia ki tētahi rōpū Karaitiana e whakarere ana i tō rātou whakapono Karaitiana nā te rahi haere o ngā kaitohetohe. E āki ana te kaituhi i a rātou i roto i tō rātou whakapono, arā, mā te whakaatu ko Īhu Karaiti te pono me te whakamutunga o te whakakitenga o te Atua. Nā tāna mahi pēnei ka hāngai tonu ki ngā tikanga e toru: (1) Ko Īhu te Tama kore mate a te Atua, i matatau ia ki te āta whakarongo ki tōna Matua mā roto i tōna matatū ki tōna mamaetanga. Nā te mea ko ia te Tama a te Atua, he nui ake a Īhu i ngā poropiti o te Kawenata Tawhito, ki ngā anahera me Mohi hoki. (2) Kua whakaritea a Īhu e te Atua hei pirihi mutunga kore, nui ake i ngā pirihi o te Kawenata Tawhito. (3) Mā roto i a Īhu ka ora te kaiwhakapono mai te hara, te wehi me te mate, mā Īhu hoki, te Tohunga Nui, māna e whakarato te oranga pono, i waitohua i roto i ngā tikanga pure whakahere kararehe hoki o te hāhi o ngā Hiperu.
Nā te tuhinga i te āhua o te whakapono o ētahi tāngata rongonui i te tāhuhu kōrero o Īharaira (Ūpoko 11), ka īnoi te kaituhi ki āna kaipānui kia noho pūmau tonu ki te mutunga rāno, me ngā karu kia mau ki a Īhu, me tō manawanui ki ngā mamaetanga me ngā tūkinotanga e tau ana ki a rātou. I whakamutua te pukapuka mā ētahi kupu tohutohu me te whakatūpato hoki.
Rāpopoto o Ngā Take
Tīmatanga: Te Karaiti te whakakitenga o te Atua 1.1-3
Te nui ake o te Karaiti i ngā anahera 1.4–2.18
Te nui ake o te Karaiti i a Mohi rāua ko Hohua 3.1–4.13
Te nui ake o te tohungatanga o te Karaiti 4.14–7.28
Te nui ake o te kawenata o te Karaiti 8.1–9.22
Te nui ake o te patunga tapu o te Karaiti 9.23–10.39
Ko te whakapono te tuatahi 11.1–12.29
Whakamanea ana i te Atua 13.1-19
Īnoi whakamutunga 13.20-21
Kupu whakamutunga 13.22-25
1
Te Kupu a te Atua i roto i Tāna Tama
1 He maha ngā wāhi, he maha ngā huarahi i kōrero ai te Atua i mua, arā ngā poropiti, ki ngā mātua,
2 i ēnei rā whakamutunga nā tāna Tama āna kōrero ki a tātou, ko tāna hoki tērā i mea ai māna ngā mea katoa, ko tāna kaihanga hoki tērā o ngā ao.
3 Ko ia te kānapatanga o tōna korōria, te tino āhua o tōna pūmautanga, e whakaū nei i ngā mea katoa ki te kupu o tōna kaha, ka oti i a ia ake anō te horoi ō tātou hara, nā noho ana ia i te ringa matau o te Nui i runga rawa.
Te Nui o te Tama a te Atua
4 Ā, meinga ana ia kia pai ake i ngā anahera, kia pērā me te ingoa i riro i a ia he nui atu i tō rātou.
5 Ki a wai hoki o ngā anahera tāna meatanga i mua:
“Ko koe tāku Tama,
nō nāianei koe i whakatupuria ai e ahau?”
Me tēnei anō:
“Ko ahau hei Matua ki a ia,
ko ia hei Tama ki ahau?”
6 I tāna kawenga mai anō hoki i te whānau mātāmua ki te ao, ka mea ia,
“Kia koropiko ngā anahera katoa a te Atua ki a ia.”
7 Ko tāna kupu ia mō ngā anahera,
“Meinga ana e ia āna anahera hei wairua,
āna kaimahi hei mura ahi.”
8 Mō te Tama ia, i kī ia:
“Pūmau tonu tōu torōna, e te Atua, ake, ake;
ā, ko te hēpeta o te tika te hēpeta o tōu kīngitanga.
9 I arohaina e koe te tika, i kinongia e koe te hara;
nō reira nui atu i tō ōu hoa
te whakawahinga a te Atua,
a tōu Atua, i a koe ki te hinu o te hari.”
10 Me tēnei anō:
“Nāu, e te Ariki, i te tīmatanga i whakatakoto te whenua;
he mahi anō ngā rangi nā ōu ringa.
11 Ko ērā e hemo atu, ko koe ia e mau tonu:
ka tawhitotia katoatia hoki ērā me he kākahu.
12 Ka pōkaitia e koe, ānō he koheka,
ka whakaputaia kētia.
Ko koe tonu anō ia koe,
kāhore hoki he mutunga o ōu tau.”
13 Ki tēhea hoki o ngā anahera tāna meatanga i mua:
“Hei tōku ringa matau koe noho ai,
kia meinga rā anō e ahau ōu hoariri
hei tūranga waewae mōu”?
14 He teka ianei he wairua kaimahi rātou katoa, he mea tonotono hei minita, he whakaaro ki te hunga mō rātou nei te ora?