Ko te Pukapuka
Tuatahi
a
HOANI
ki ngā Tāngata Katoa
Kupu Whakataki
E rua ngā pūtake o Te Pukapuka Tuatahi a Hoani ki ngā Tāngata Katoa: ki te whakahau i āna kaipānui kia noho piripono ki a te Atua rāua ko tāna tama ki a Īhu Karaiti, ā, e whakatūpato ana kia kaua rātou e aro atu ki ngā ākonga tipatipa whakatineia i tēnei noho whanaungatanga. I pupū ake tēnei ākonga mai i te whakapono he karihika te hua o te whakapā ki te ao kikokiko, nō reira, ehara rawa a Īhu Karaiti, te Tama a te Atua, i te tangata o te whenua. E whakapae ana aua kaiako, ko te rauora ko te wete māharahara whaiora i tēnei ao; ā, i taki ako anō hoki kāore he pānga o te oranga ki ngā take karihika, aroha atu ki ētahi rānei.
Whai ātete ki tēnei ākonga, mārama ana te whakahau a te kaituhi, tūturu he tangata tūturu nō tēnei ao a Īhu Karaiti, ā, kaha tonu te whakahau katoa e whakapono ana ki a Īhu Karaiti e mau aroha ana ki te Atua me aroha anō hoki tētahi ki tētahi.
Rāpopoto o Ngā Take
Tīmatanga 1.1-4
Māramatanga me te pōuritanga 1.5–2.29
Ngā tamariki a te Atua me ngā tamariki a te Rēwera 3.1-24
Te pono me te hē 4.1-6
Te kawenga aroha 4.7-21
Whakapono momoho 5.1-21
1
Te Kupu o te Ora
1 Ko te mea o te tīmatanga, ko tā mātou i rongo ai, ko tā ō mātou kanohi i kite ai, ko tā mātou i titiro atu ai, ko tā ō mātou ringaringa i whāwhā atu ai, ko ngā mea o te Kupu o te ora.
2 I whakakitea mai hoki te ora, ā, kite ana mātou, nā, ka whakaatu nei, ka kauwhau nei ki a koutou i te ora tonu, i tērā i te Matua i mua, ā, kua whakakitea mai nei ki a mātou
3 Ko tā mātou rā i kite ai, i rongo ai, e kauwhautia atu nei e mātou ki a koutou, kia whakahoatia ai koutou ki a mātou. Nā, ko tō tātou whakahoanga kei te Matua, kei tāna Tama hoki, kei a Īhu Karaiti.
4 Nā, ka tuhituhia atu nei ēnei mea e mātou ki a koutou, kia tino nui ai tō koutou hari.
He Mārama te Atua
5 Ko te kōrero anō tēnei i rongo ai mātou ki a ia, ā, ka kōrerotia atu nei e mātou ki a koutou, nā, he mārama te Atua, kāhore rawa hoki he pōuri i a ia.
6 Ki te mea tātou e whakahoa ana tātou ki a ia, me te haere anō tātou i te pōuri, e kōrero teka ana tātou, ehara hoki i te pono tā tātou e mahi nei.
7 Ki te haere ia tātou i te mārama, me ia hoki e noho nei i te mārama, nā, ka whakahoa tātou tētahi ki tētahi, e horoia ana anō ō tātou hara katoa e ngā toto o tāna Tama, o Īhu Karaiti.
8 Ki te mea tātou kāhore ō tātou hara, e whakapōhēhē ana tātou i a tātou anō, ā, kāhore te pono i roto i a tātou.
9 Ki te whāki tātou i ō tātou hara, e pono ana ia, e tika ana, ā, ka murua e ia ō tātou hara, ka horoia atu hoki ō tātou hē katoa.
10 Ki te mea tātou kāhore tātou i hara, ka meinga ia he kaikōrero teka, kāhore hoki tāna kupu i roto i a tātou.