Ko te Pukapuka a
HĒMI
ki ngā Tāngata Katoa
Kupu Whakataki
Ko te Pukapuka a Hēmi ki ngā Tāngata Katoa he kohikohinga tohutohu i tuhia ki ngā tāngata a te Atua puta noa i te ao whānui. Kānapanapa ana ngā tuhinga whakarite e pā ana ki ngā tohutohu whakamātau me te ārahi mō ngā whakaaro tikanga Karaitiana hoki. Mai i te āhua o te Karaitiana i whāia e ia ngā tūāhua take katoa pēnei i ngā hunga whai rawa me te pōhara, whakawai, mahi pai, ūpoko mārō, whakapono me ngā whakamahi, te mahi a te arero, te whakaaronui, te tautohetohe, te haukoa me te hūmarie, te whakawā i ētahi, te whakanuka, te manawanui me te īnoi.
E whakahau ana te reta ki te whakanui i te mahi me te whakapono i ngā whakahaerenga a te hāhi Karaitiana.
Rāpopoto o Ngā Take
Tīmatanga 1.1
Whakapono me te whakaaro nui 1.2-8
Rawa kore me te whai rawa 1.9-11
Whakamātautau me te whakawai 1.12-18
Te rongo me te mahi 1.19-27
Whakatūpato i ngā mahi wehewehe 2.1-13
Whakapono me ngā mahi 2.14-26
Te Karaitiana me tōna arero 3.1-18
Te Karaitiana me te ao 4.1–5.6
Ētahi tohutohu 5.7-20
1
He Mihi
1 Nā Hēmi, nā te pononga a te Atua, a te Ariki hoki, a Īhu Karaiti, ki ngā hapū kotahi tekau mā rua e noho marara ana: Tēnā koutou.
Te Whakapono me te Mātauranga
2 Kīa iho, e ōku tēina, he mea hari nui ina taka koutou ki ngā whakamātautauranga maha;
3 e mātau ana hoki koutou, ko te whakamātautauranga o tō koutou whakapono hei mahi i te manawanui.
4 Nā, kia puta rawa te mahi a te manawanui, kia tino tika ai koutou, kia toitū ai, tē hapa i tētahi mea.
5 Ki te hapa tētahi o koutou i te mātauranga, me īnoi ia ki te Atua, e hōmai nui nei ki te katoa, kāhore hoki āna tāwai mai; ā, ka hōmai ki a ia.
6 Otirā, me īnoi whakapono ia, kaua e ruarua. Ko te tangata ruarua hoki, tōna rite kei te ngaru o te moana, e pūhia ana e te hau, e ākina ana.
7 Kaua hoki taua tangata e mea, e whiwhi ia ki tētahi mea i te Ariki.
8 E kore te tangata ngākau rua e ū i āna hanga katoa.
Te Rawakore me te Whai Taonga
9 Ko te teina iti, kia whakamanamana ia i te mea ka whakanekehia ake ia,
10 me te tangata taonga anō, i te mea ka whakaititia. Ka memeha atu hoki ia, ānō he puāwai tarutaru.
11 Ko te putanga mai hoki o te rā me te hau wera anō, nā, kua maroke te tarutaru, kua ngahoro tōna puāwai, ā, ngaro iho te ātanga o tōna āhua. Ka pērā anō te tangata taonga, ka memeha atu i ōna hāereerenga.
Whakamātautau me Whakawai
12 Ka hari te tangata e ū ake ana ki te whakamātautauranga. Nō te mea hoki ka oti ia te whakamātautau, ka whiwhi ia ki te karauna o te ora, kua whakaaria mai nei e te Ariki mō te hunga e aroha ana ki a ia.
13 Kaua tētahi e mea ina whakamātautauria, “E whakamātautauria ana ahau e te Atua.” E kore hoki te Atua e taea te whakamātautau e te kino, e kore anō hoki ia e whakamātautau i tētahi.
14 Engari he mea whakamātautau te tangata, i a ia e kūmea ana, e poaina ana e tōna hiahia ake anō.
15 Nā, i te hapūtanga o te hiahia, ka whānau ko te hara; ā, i te otinga o te hara, ka whānau ko te mate.
16 Kei whakapōhēhētia koutou, e ōku tēina aroha.
17 Nō runga ngā hōmaitanga papai katoa, ngā mea katoa e tino tika ana, he mea heke iho nō te Matua o ngā whakamārama, kāhore nei ōna putanga kētanga, kāhore hoki he ātārangi o te tahuri.
18 Nā tōna hiahia ake anō tātou whānau ai, he meatanga nā te kupu o te pono, kia meinga ai tātou me he mātāmua mō āna mea i hanga ai.
Whakarongo ka Mahi ai
19 Kei te mōhio koutou ki tēnei, e ōku hoa aroha, kia hohoro ngā tāngata katoa ki te whakarongo, kia pūhoi ki te kōrero, kia pūhoi ki te riri.
20 E kore hoki tā te Atua tika e mahia e tō te tangata riri.
21 Heoi, me whakarere katoa atu ngā tikanga poke, me te hara e hua tonu nei, me tahuri mārire ki te kupu kua oti te whakatō iho; e taea hoki e tēnei te whakaora ō koutou wairua.
22 Hei kaimahi anō koutou i te kupu, kaua hei kaiwhakarongo anake, kei tinihangatia koutou e koutou anō.
23 Ki te mea hoki he kaiwhakarongo tētahi i te kupu, ehara nei i te kaimahi, he rite ia ki te tangata e mātakitaki ana ki tōna kanohi māori i roto i te whakaata,
24 i tōna mātakitakinga hoki i a ia anō, haere ana, wareware tonu ake he āhua pēhea rānei tōna.
25 Tēnā ko te tangata e āta titiro iho ana ki te ture tino tika, ki te mea herekore, ā, ka ū tonu, he kaiwhakarongo anō ia e kore e wareware, engari, e mahi ana i te mahi, e hari anō tēnei i tāna mahi.
26 Ki te mea he āhua karakia tō tētahi i roto i a koutou, ki te kore e parairetia e ia tōna arero, he tinihanga hoki tāna ki tōna ngākau, he maumau karakia tāna.
27 Ko te karakia pono, ko te mea pokekore ki te aroaro o te Atua Matua, ko ia tēnei: Ko te tirotiro i ngā pani i ngā pouaru i ō rātou mate, ko te tiaki i a ia ake kei poke i te ao.