Ko Te Rongopai ki te Ritenga a
MATIU
Kupu Whakataki
Te Rongopai ki te ritenga a Matiu e whakaatu ana i te rongopai ko Īhu te Kaiwhakaora i oatingia e te Atua ka tukuna mai, ko te mea i tutuku ai i te Atua ngā oati ki āna tāngata o te Karaipiture tawhito. Ehara mō ngā tāngata Hūrai anake tēnei rongopai, te iwi i whānau mai nei a Īhu me te noho tahi, engari, mō te ao katoa.
I āta whakatakototia te Rongopai a Matiu. Ka tīmata i te whānautanga o Īhu, ka whakaatu i tōna iriiritanga me te whakamātautau i a ia, kātahi ka hari i tōna minitatanga kauhau, akoranga, me te whakaoranga i roto o Kariri. I muri mai i tēnei ka whakaaturia e te rongopai ngā haerenga o Īhu mai i Kariri ki Hiruhārama mō ngā mahi o ngā rā whakamutunga o Īhu, oti ake ki tōna rīpekatanga me tōna aranga ake.
Tēnei Rongopai e whakaatu ana ko Īhu te tino Kaiako, kei a ia te mana mō te whakamāori i te ture a te Atua me te ako hoki i te rangatiratanga o te Atua. Ko te nuinga o āna whakaako e whakaemitia ana i roto i ngā kohinga e rima: (1) Te kauhau i runga i te Maunga, e pā ana ki te āhuatanga, ngā mahi, ngā hōnore, me te whakaritenga o ia tangata whenua o te rangatiratanga o te rangi (ūpoko 5–7); (2) ngā tohutohu ki ngā ākonga tekau mā rua mō ā rātou mahi (ūpoko 10); (3) ngā kōrero whakarite mo te rangatiratanga o te rangi (ūpoko 13); (4) ngā whakaakoranga mō te āhua o te ākonga (ūpoko 18); me (5) ngā whakaakoranga mō te mutunga o ēnei rā me te haerenga mai o te Rangatiratanga o te Atua (ūpoko 24–25).
Rāpopoto o Ngā Take
Te whakapapa me te whānautanga o Īhu Karaiti 1.1–2.23
Te minitatanga o Hoani te Kaiiriiri 3.1-12
Te iriiri me te whakamātautau o Īhu 3.13–4.11
Mihinga minitatanga o Īhu i Kariri 4.12–18.35
Mai i Kariri ki Hiruhārama 19.1–20.34
Te wiki whakamutunga tata atu i roto hoki o Hiruhārama 21.1–27.66
Te aranga me ngā whakaputanga ake o te Ariki 28.1-20
1
Te Whakapapa o Īhu Karaiti
(Ruka 3.23-38)
1 Ko te pukapuka o te whakapapa o Īhu Karaiti, tama a Rāwiri, tama a Āperahama.
2 Nā, ko tā Āperahama ko Īhaka; tā Īhaka ko Hākopa; tā Hākopa ko Hūrā rātou ko ōna tuākana, ko ōna tēina;
3 tā Hūrā rāua ko Tāmara ko Parete rāua ko Hara; tā Parete ko Heteromo; tā Heteromo ko Arame;
4 tā Arame ko Aminarapa; tā Aminarapa ko Nāhona; tā Nāhona ko Haramono;
5 tā Haramono rāua ko Rahapa ko Poaha; tā Poaha rāua ko Rutu ko Ōpere; tā Ōpere ko Hehe;
6 tā Hehe ko Rāwiri, ko te kīngi.
Tā Rāwiri kīngi rāua ko te wahine a Uria ko Horomona;
7 tā Horomona ko Rehopoama; tā Rehopoama ko Apia; tā Apia ko Aha.
8 Tā Aha ko Iehohāpata; tā Iehohāpata; ko Iorama; tā Iorama ko Ohiaha;
9 tā Ohiaha ko Iotama; tā Iotama ko Āhata; tā Āhata ko Hetekia;
10 tā Hetekia ko Mānahi; tā Mānahi ko Amono; tā Amono ko Hōhia;
11 tā Hōhia ko Hekonia rātou ko ōna tēina; i te wā o te whakahekenga ki Papurōna.
12 Ā, i muri i te whakahekenga atu ki Papurōna, ka whānau tā Hekonia ko Haratiera; tā Haratiera ko Herupapera;
13 tā Herupapera ko Apiuru; tā Apiuru ko Eriakimi; tā Eriakimi ko Ātoro;
14 tā Ātoro ko Hāroko; tā Hāroko ko Ākimi; tā Ākimi ko Eriuru;
15 tā Eriuru ko Ereātara; tā Ereātara ko Matana; tā Matana ko Hākopa;
16 tā Hākopa ko Hōhepa, ko te tahu a Meri; whānau ake tā Meri ko Īhu, e kīa nei ko te Karaiti.
17 Heoi, ko ngā whakatupuranga katoa o Āperahama tae noa ki a Rāwiri, tekau mā whā ngā whakatupuranga; o Rāwiri tae noa ki te whakahekenga ki Papurōna tekau mā whā ngā whakatupuranga; ā, nō te whakahekenga ki Papurōna tae noa ki a te Karaiti tekau mā whā ngā whakatupuranga.
Te Whānautanga o Īhu
(Ruka 2.1-7)
18 Nā, ko te whānautanga tēnei o Īhu Karaiti; he mea taumau a Meri, tōna whaea, mā Hōhepa, ā, i te mea kīanō rāua i tata noa ki a rāua, ka kitea kua hapū ia i te Wairua Tapu.
19 Otirā, he tangata tika tāna tahu, a Hōhepa, ā, kāhore ōna ngākau kia whakakitea nuitia ia, ka mea kia whakarērea pukutia.
20 Otiia, i a ia e hurihuri ana i ēnei mea, nā, ka puta moemoeā mai tētahi anahera a te Ariki ki a ia, ka mea, “E Hōhepa, e te tama a Rāwiri, kaua e hopohopo ki te tango i a Meri, i tāu wahine; nā te Wairua Tapu hoki tōna hapū.
21 Ā, e whānau ia he tama, me hua e koe tōna ingoa ko Īhu; nō te mea māna e whakaora tōna iwi i ō rātou hara.”
22 Nā, ka oti tēnei katoa, kātahi ka rite tā te Ariki, i kōrerotia e te poropiti, i mea ai ia,
23 “Nā, ka hapū te wāhina, ka whānau hoki he tama, ā, ka huaina e rātou tōna ingoa ko Emānuera,” ko tōna whakamāoritanga tēnei, “Kei a tātou te Atua.”
24 Ā, ka ara ake a Hōhepa i te moe, ka meatia e ia tā te anahera a te Ariki i whakahau ai ki a ia, ā, tango ana ia i tāna wahine.
25 Ā, kīhai i mōhio ki a ia, whānau noa tāna tama mātāmua; ā, huaina ana e ia tōna ingoa ko Īhu.