Ko te Pukapuka
Tuatahi
a Paora Āpōtoro ki a
TĪMOTI
Kupu Whakataki
Tīmoti, he Karaitiana taitama nō Āhia Maina, he tama ia nā tētahi whaea he Hūrai, ko te pāpā he Kariki. I noho ia hei hoa haere me te āwhina hoki i a Paora i roto i āna mahi mīhana. E toru ngā take nui kei roto i Te Pukapuka Tuatahi a Paora Āpōtoro ki a Tīmoti.
Te wāhi tuatahi o te reta nei he whakatūpato mō ngā tohutohu teka i roto i te hāhi. Ko tēnei tohutohu, he whakaaro i kīnakihia nā ngā Hūrai me ngā Tauiwi hoki, e kī ana ko tēnei ao kikokiko he kino, engari, ka taea e te tangata tōna whakaoranga mā te mōhio ki ētahi taro, me te kore e mārena. Kei roto hoki i te reta ētahi tohutohu mō te whakahaere i te hāhi me ōna karakia, me ōna whakarite e pai ana mō ngā kaiārahi me ngā kaiāwhina o te hāhi. Hei whakamutu, ka tohua a Tīmoti me pēhea ia e pononga pai ai mā Īhu Karaiti me ōna kawenga ki tēnā ki tēnā o ia rōpū whakapono.
Rāpopoto o Ngā Take
Tīmatanga 1.1-2
Ngā tohutohu mō te hāhi me ōna āpiha 1.3–3.16
Ngā tohutohu ki a Tīmoti mō āna mahi 4.1–6.21
1
He Mihi
1 Nā Paora, nā te āpōtoro a Īhu Karaiti, he mea whakarite e te Atua, e tō tātou Kaiwhakaora, e Īhu Karaiti hoki, ko ia tā tātou e tūmanako atu nei –
2 Ki a Tīmoti, ki tāku tamaiti pono i roto i te whakapono:
Kia tau atu te aroha noa, te mahi tohu, te rangimārie, he mea nā te Atua, nā tō tātou Matua, nā Karaiti Īhu hoki, nā tō tātou Ariki.
He Whakatūpato ki te Whakaakoranga Teka
3 I whakahau atu rā ahau ki a koe, i ahau e haere ana ki Makeronia, kia noho koe i Epeha, ako ai i ētahi kia kaua e rere kē te whakaako,
4 kia kaua e whakarongo ki ngā kōrero tito noa, ki ngā whakapapa tūpuna kāhore nei e whai mutunga; ko ngā putanga ake o ēnā, he tautohetohe, kāhore he whakatupu mō te tikanga a te Atua i runga i te whakapono; ka pērā anō ahau ināianei.
5 Ko te tukunga iho ia mō te ako, ko te aroha, nō roto i te ngākau mā, i te hinengaro pai, i te whakapono tinihangakore.
6 Kapea ake ēnei e ētahi, kotiti kē ana ki ngā kōrero teka noa;
7 ki tā rātou hei kaiwhakaako rātou i te ture, heoi, kāhore e mātau ki tā rātou e kōrero nei, ki ngā mea rānei e kauwhautia nei e rātou.
8 Otirā, e mātau ana tātou he mea pai te ture, ki te rite te meatanga e te tangata ki tā te ture tikanga.
9 E mātau ana hoki ki tēnei, kīhai te ture i whakatakotoria mō te tangata tika, engari mō te hunga turekore, tutū, karakiakore, hara, tapukore, whakarihariha, mō ngā kaipatu i ngā pāpā, mō ngā kaipatu i ngā whaea, mō ngā kaikōhuru tangata,
10 mō te hunga moepuku, moe kino i te tāne, tāhae tangata, kōrero teka, oati teka, ā, ki te mea tērā atu tētahi mea kāhore nei e rite ki te whakaako tika;
11 rite tonu tēnei ki te rongopai o te korōria o te Atua hari, ki te mea kua tukua mai nei ki ahau.
Te Whakawhetai mō te Mahi Tohu a te Atua
12 E whakawhetai atu nei ahau ki a Karaiti Īhu, ki tō tātou Ariki, nāna nei ahau i whakakaha; i whakaaro hoki ia he tangata pono ahau, ā, meinga ana ahau hei minita.
13 Ahau nei, te tangata kohukohu i mua, te kaiwhakatoi, whakatupu kino. Heoi, i tohungia ahau, nō te me i meinga kūwaretia e ahau i runga i te whakapono kore;
14 tino nui rawa hoki te aroha noa o tō tātou Ariki, hui tahi ki te whakapono, ki te aroha i roto i a Karaiti Īhu.
15 He pono te kōrero, he pai hoki kia tangohia rawatia, i haere mai a Karaiti Īhu ki te ao ki te whakaora i te hunga hara; ko te tino tangata hara o rātou ko ahau.
16 Heoi, nā konei ahau i tohungia ai, kia ai ko ahau ki mua hei whakaaturanga mā Īhu Karaiti i ngā manawanui maha, hei tohu ki te hunga e whakapono ki a ia ā muri ake nei, kia ora tonu ai rātou.
17 Nā, ki te Kīngi ora tonu, e kore nei e pirau, e kore nei e kitea, ko ia nei anake te Atua mātau, waiho atu i a ia te hōnore me te korōria ake ake. Āmine.
18 Ka tukua atu nei e ahau tēnei kupu ako ki a koe, e tāku tamaiti, e Tīmoti, ko te poropititanga anō tēnei i puta mai i mua mōu, hei mea i a koe kia whawhai i te whawhai pai;
19 kia mau ki te whakapono me te hinengaro pai; he mea nei ēnā kua ākiritia atu e ētahi, ka meinga tō rātou whakapono he kaipuke pakaru;
20 nō rātou a Himeniu rāua ko Arēhanera, kua tukua nei e ahau ki a Hātana, kia whakaakona ai kia kaua e kohukohu.