Ko te Pukapuka
Tuarua
a Paora Āpōtoro ki a
TĪMOTI
Kupu Whakataki
Ko te Pukapuka Tuarua a Paora Āpōtoro ki a Tīmoti te nuinga he tohutohu ki a Tīmoti, ko ia hoki tāna tauira hoamahi me tāna kaiāwhina. Ko te tino kaupapa kia māia. Ka tohutohuhia ka ākina a Tīmoti kia mau tonu tōna whakapono ki a Īhu Karaiti, kia pupurihia ngā whakaakoranga pono o te Rongopai me te Kawenata Tawhito, me te mahi i tāna mahi whakaako, kauhau hoki, i roto i te mata o te mamaetanga me te hoa whawhai.
Ka whakatūpatohia a Tīmoti mō ngā whakawhara i roto i ngā “tautohetohe wairangi kūare hoki.” Kāre he painga, engari, ka turaki i te tangata kē e whakarongo ana ki aua tautohetohe.
I roto katoa i ēnei, ka whakamaumaharatia a Tīmoti ki ngā mahi me ngā pūtake a te kaituhi, tōna whakapono, manawanui, aroha, whakaririka, me te mamae i roto i te whakatoinga.
Rāpopoto o Ngā Take
Tīmatanga (1.1-2)
Whakamoemiti me te Akiaki (1.3–2.13)
Tohutohu me te whakatūpato (2.14–4.5)
Te āhuatanga o Paora (4.6-18)
Rāpopoto o Ngā Take
Tīmatanga 1.1-2
Ngā tohutohu mō te hāhi me ōna āpiha 1.3–3.16
Ngā tohutohu ki a Tīmoti mō āna mahi 4.1–6.21
1
He Mihi
1 Nā Paora, i paingia e te Atua hei āpōtoro mā Īhu Karaiti, mō te ora i whakaaria mai i roto i a Karaiti Īhu –
2 Ki a Tīmoti, ki tāku tamaiti aroha:
Kia tau te aroha noa, te mahi tohu, te rangimārie, he mea nā te Atua Matua, nā Karaiti Īhu hoki, nā tō tātou Ariki.
Whakamoemiti me te Manawa
3 E whakawhetai ana ahau ki te Atua, e mahi atu nei ahau ki a ia, he mea nō ōku tūpuna iho i runga i te hinengaro mā, nō te mea kāhore e mutu tōku mahara ki a koe i āku inoinga i te pō, i te ao.
4 Nui atu tōku hiahia kia kite i a koe, i ahau e mahara ana ki ōu roimata, kia kī ai ahau i te hari.
5 Ka hoki ake nei tōku mahara ki te whakapono tinihangakore i roto i a koe; i noho tuatahi rā i roto i tōu tupuna wahine, i a Roihi, i tōu whaea hoki, i a Ūnihi; ā, e tino mōhio ana ahau kei roto anō i a koe.
6 Koia ahau ka whakamahara nei i a koe, kia whakaūngia anō te ahi, te mea i hoatu nā e te Atua, tēnā kei roto i a koe, he mea nā te whakapānga atu o ōku ringaringa.
7 Kāhore hoki i hōmai e te Atua ki a tātou te wairua o te wehi; engari tō te kaha, tō te aroha, tō te ngākau mahara.
8 Nā, kei whakamā koe ki te whakaatu i tō tātou Ariki, ki ahau rānei, ki tōna herehere; engari uru atu koe ki ngā mate o te rongopai, kia rite ki tā te Atua whakakahanga.
9 Nāna nei tātou i whakaora, nāna hoki tātou i karanga ki te karangatanga tapu; kīhai i rite ki ā tātou mahi, engari ki tāna ake tikanga i whakatakoto ai i mua, ki te aroha noa hoki i hōmai nei ki a tātou i roto i a Karaiti Īhu, i mua atu o te tīmatanga o te ao;
10 ā, kua whakakitea mai nei ināianei i te putanga nui mai o tō tātou Kaiwhakaora, o Īhu Karaiti, i whakakāhore nei i te mate, ā, whakakitea mai ana e ia te ora me te matengakore, he mea nā te rongopai.
11 Meinga iho nei ahau hei kaikauwhau mō tēnei, hei āpōtoro, hei kaiwhakaako.
12 Ko te mea hoki tēnei i pāngia ai ahau e ēnei mate. He ahakoa rā kāhore ahau e whakamā; e mātau ana hoki ahau ki tāku i whakapono ai, e ū ana tōku whakaaro e taea e ia te tiaki tāku i tuku atu ai ki a ia, ā taea noatia taua rā.
13 Kia mau ki te tauira mō ngā kupu tika i rongo rā koe ki ahau, puritia i runga i te whakapono, i te aroha i roto i a Karaiti Īhu.
14 Ko te mea pai i tukua rā ki a koe, me tiaki e koe, arā e te Wairua Tapu e noho ana i roto i a tātou.
15 E mātau ana koe ki tēnei, i tahuri kē i ahau te hunga katoa i Āhia; nō rātou a Paikeru rāua ko Heremokeni.
16 Kia tohungia e te Ariki ngā tāngata o te whare o Onehipora; he maha hoki ōku oranga ngākau i a ia, kīhai hoki ia i whakamā ki tōku mekameka.
17 Ā, i a ia i Roma, i rapua mārietia ahau e ia, ā, kitea ana.
18 Mā te Ariki e tuku ki a ia kia kite i te mahi tohu a te Ariki ā taua rā. Ko āna mahinga mea hoki māku i Epeha, erangi koe e mōhio ana.