Ko te Pukapuka a Paora Āpōtoro ki a
Taituha
Kupu Whakataki
He tauiwi ki te whakapono Karaitiana a Taituha, ā, ka noho hei kaimahi āwhina mā Paora mō āna mahi mihinare. Ko te Pukapuka a Paora Āpōtoro ki a Taituha i tukunga ki tāna kaimahi kōhungahunga i Kiriti, i waihotia ia i reira ki te whakahaere i ngā mahi a te hāhi. E toru ngā tino āwangawanga o te reta.
Tuatahi, i whakamaumaharatia a Taituha me pēhea ake te āhua o ngā kaiwhakahaere o te hāhi, inā, i runga ake i te āhua kino o te maha o ngā Kiriti. Muri ake, i tohutohutia a Taituha me pēhea te ako i ngā momo rōpū o te hāhi, ngā kaumātua, ngā kuia, (ā muri atu mā rātou e ako ngā tama wahine) tama tāne, me ngā taurekareka. Hei whakamutunga, ka hoatuhia e te kaituhi he tohutohu ki a Taituha e pā ana ki te noho Karaitiana, inā, te hiahia ake mō te rangimārie, me te whakahoahoa, me te karo mauāhara, taupatupatu me te wehewehe i roto i te hāhi.
Rāpopoto o Ngā Take
Tīmatanga 1.1-4
Ngā āpiha o te hāhi 1.5-16
Ngā mahi a ia rōpū o te hāhi 2.1-15
Ngā whakahau me ngā whakatūpato 3.1-11
Whakamutunga 3.12-15
1
He Mihi
1 Nā Paora, he pononga nā te Atua, he āpōtoro nā Īhu Karaiti.
I runga i te whakapono o te hunga whiriwhiri a te Atua, i te mātauranga hoki ki tā te pono e rite ai te karakia;
2 i runga anō i te tūmanako atu ki te ora tonu, i whakaaria mai nei i mua atu o te ao e te Atua e kore nei e teka;
3 nāna nei i whakakite mai tāna kupu i ōna wā, rā te kupu i tukua mai ki ahau, he mea whakarite mai nā te Atua, nā tō tātou Kaiwhakaora.
4 Ki a Taituha, ki tāku tamaiti pono i runga i tō tātou whakapono tahi:
Kia tau te aroha noa me te rangimārie, he mea nā te Atua Matua, nā Karaiti Īhu, nā tō tātou Kaiwhakaora.
Te Mahi a Taituha i Kariti
5 Ko te mea tēnei i waiho atu ai koe e ahau ki Kariti, kia whakatikaia ai e koe ngā mea i mahue, kia whakaritea ai anō hoki he kaumātua ki ia pā, ki ia pā, kia pērā ai me tāku i whakatakoto atu ai ki a koe.
6 Ki te mea he tangata kāhore e ekengia e te kupu, he tahu nō te wahine kotahi, he tamariki whakapono ana, kāhore e kōrerotia tō rātou tōreretanga ki te kino, kāhore e tutū.
7 Ko te tikanga hoki mō te pīhopa, kia kaua e ekengia e te kupu, kia rite ki tā te Atua tuari; ehara i te mea tohe ki tāna ake, kāhore ōna āritarita kāhore āna kakai wāina kāhore āna papatu, kāhore e whai i te taonga hē;
8 engari e atawhai ana i te manuhiri, e aroha ana ki te pai, e whai whakaaro ana, e tika ana, e tapu ana, e pēhi ana i ōna hiahia.
9 E ū ana te pupuri i te kupu pono i whakaakona atu nā, kia taea ai e ia, i te mea ka tika nei tāna whakaako, te whakahauhau, te turaki anō i tā te hunga e totohe mai ana.
10 He tokomaha hoki te hunga tutū, kōrero teka noa, tinihanga; nui atu ia o te hunga o te kotinga,
11 me kuku ō rātou waha; riro pū hoki ētahi whare te whakaputa kē e rātou, e whakaako ana i ngā mea e kore e tika, he whakaaro hoki ki te taonga hē.
12 I mea tētahi o rātou, he poropiti nō rātou ake, “He teka tonu tā ngā Kariti, he kararehe kino, he pukukai, he māngere.”
13 Ka pono tēnei kōrero. Nā reira, kia koi tāu kupu riri ki a rātou; kia ora ai tō rātou whakapono;
14 kei tahuri hoki rātou ki ngā kupu tito a ngā Hūrai, ki ngā ture a ngā tāngata e whakaputa kē ana i te pono.
15 He mā ngā mea katoa ki te hunga mā. Tēnā, ki te hunga poke, kāhore nei ō rātou whakapono, kāhore he mea mā. Heoi, he mea poke ō rātou whakaaro, ō rātou hinengaro.
16 Ki tā rātou kī, kua mātau rātou ki te Atua; heoi, ko ā rātou mahi hei whakakāhore ki a ia, he hunga whakarihariha rātou, he hunga tutū, e kore anō e tikangatia mō tētahi mahi pai.