14
पोलु, बार्नबस, वेर इर्वुरा इकुनियुम सहरतगा कीतद सेवा
1 इकुनियुम सहरतगा इद्रम आता इतेके, पोलु, बार्नबस मुनेता लेह्का यहुदिरापार्तनाता लोन अतोर. अगा वेल्लाटोरा जीवातगा ओरा पोल्लो गडनाह येसुना बेसता कबुरतुन वेहतोर. अदिह्क यहुदिर ओसो दुस्रा जाततोर वेल्लाटोरे लोकुर येसुन विस्वस कीतोर.
2 मति येसुन विस्वस केवोर यहुदिर बाताल कीतोर इतेके, विस्वसिरिन जग्ळम कीयलाहि, यहुदि आयवोरगा अनजि ओरिन ओङ तेग़्हचीतोर.
3 अस्के पोलु, बार्नबस, वेर इर्वुर बळयिर वेल्लाङे दियाङ अगान मतोर. येसुसामिना पोग़ोन विस्वस कीसि रेयवालेवा ओना दयाता पोल्लोतुन पोकुर कीसोर मतोर. पोकुर कीनेके येसु ओरा कयदे तना लावताङ वेल्लाङे बामिह कीयनाङ सीनाङ तोहचि, ओर वेहतनाङ पोल्लोङ सेतेमे इनजोर तोहतोग़.
4 मति सहरतोर लोकुर रेंड तुंगाङ आसि, उय्तुर बार बळयिरके आतोर, उय्तुर बार यहुदिरके आतोर.
5 पया यहुदि आयवोर ओसो उय्तुर यहुदिर तमा मुक्यालोरा संगे कलियिसि पोलुन, बार्नबसिन कदर रेहचि बंडाङ उकिस हव्कलाह तयर आतोर.
6-7 इद पोल्लो पोलु, बार्नबस वेरिह्क एर्का आता. अदिनेनाह्क ओर इकुनियुमताहि पेसिस गलत्या पटटा लुकावनिया जिलाते विततोर. अद जिलाता लुस्त्रा सहरते, दिरबे सहरते ओसो एरे-एरेताङ नाह्कनगा अनजि बेसता कबुरतुन पोकुर कींदुर.
पोलु, बार्नबस, वेरु लुस्त्रा सहरतगा कीतद सेवा
8 अद्रमे लुस्त्रा सहरतगा ओर्वोग़ काल्क वावोग़ पुट कूटाल मतोग़, ओग़ पुटटग्डाहि बेस्केन ताकवाय मतोग़.
9 उंद दिया पोलु वेहतनाङ पोल्लोङ ओग़ कूटाल उदिसि बेस केंजलाह आस मतोग़. अस्के वेग़ पोलु ओन कोंडा मिळ्हवा ऊळतोग़, ऊळिसि वेग़ कूटाल सव्रेम आयलाह येसुन विस्वस कीस्तोग़, इनजि पुतोग़.
10 अदिनेनाह्क जोरते इतोग़, “अले कूटा तेदिस दिग निल्म!” इतोग़. इतस्के ओग़ कूटाल डेह्किस ताक बोटटोग़.
11 लोकुर पोलु कीतदिन ऊळिसि, तमा लुकावनिया पोल्लोते, “पेन्ह्के मन्कल मारियिस मावा नडुम वाताङ रा!” इनजोर जोरते केयतोर.
12 पया बार्नबसिन तमा मोदुल पेन जेयुस आंदोग़ इनजोर इंदुर, पोलु पका वळ्ह्किंदोग़, अदिह्क ओग़ तमा पेन्ह्कना कबुर वेहवाल इरमेस आंदोग़ इनजोर इंदुर.
13 जेयुस पेनता मंदिर सहरता पलते मता. अद मंदिरतगा मोळ्कवाल पेर्माल बाताल कीतोग़ इतेके, सहरतगा नेङनद अग़दगा कोंदाङ ओसो नूदे काचताङ पुंगेह्किन तचि सहरता लोकुरा संगे कलियिसि, बळयिरिह्क मोक ईयलाह तयर कीसोर मतोर.
14 ओर इद्रम कीस्तोर इनजोर बार्नबस, पोलु केंतोर, केंतस्के पकाय नारज आसि तमाङ जगान अग़्हचि लोकुरा नडुम वितिसि इद्रम इतोर,
15 “ए लुस्त्रा सहरतोरिर, मीट इद्रम बह कीय्ह्निर? अद्रम केमाटु, माटु बेवे पेन्ह्कनोम आयोम, माट वने मीवाय लेह्कान मन्कलोरोमे. मीट इव अङ्ळमताङ पोल्लोन विळ्सिसि, जीवात मनदनद देवुळतके मल्म्ह्टु. अदे देवुळि पोग़ोटा बूमतुन, इळ्ता बूमतुन, सम्दुरतुन, ओसो अविस्कनगा मंदनव सबेटविन पुटिह कीता.
16 मुने देवुळि, मीट यहुदि आयवोर दुस्राङ जातिनोरिह्क विचर वाताङ मोळ्कलाह ईस मता.
17 ईसाय मति ‘नना सेतेम देवुळतन आंदन’ इनजोर देवुळि अमेसा तनाङ बेसताङ कबस्कने लोकुरिह्क तोहचीता. मीकु पोग़ोटाहि पेग़ु अर्हचीता, अद्रमे बराबर कगोते अनम पुटिह कीसि तिंदलाह गाटो ईसि मीकु गिर्दाते तासता,” इनजोर वेहतोर.
18 अचोन वेहतोर तेला मति लोकुर ओरेनाह्क मोकिङ ईयलाह वातोरे. मति पोलु, बार्नबस पकाय मुस्किलते ओरिन रोमिह कीतोर.
19 उचुक दियाना पया पिसिदियाता अंताकिया सहरताहि उय्तुर यहुदिर, इकुनियुम सहरताहि उय्तुर यहुदिर लुस्त्रा सहरते वातोर. वासि लुस्त्रातोर मन्कलोरगा कलियिसि ओरिन तमा बाजेतेके कीतोर. कीसि पोलुना विरुद आसि ओन बंडाङ उकतोर. उकतस्के वेग़ इंजेके डोलतोग़ इनजि ओन सहरता पलते ईळ्सिस ओतोर.
20 पया लुस्त्रातोर पूना विस्वसिर ओनगा वासि सर्ने नितोर. अस्के पोलु तेदिसि ओरा संगे सहरतगा अतोग़. पया इमा दिया बार्नबस बार दिरबे सहरते अतोर.
पोलु, बार्नबस, सुरिया पटटा अंताकिया सहरते मलयह्तोर
21 पया पोलु, बार्नबस, वेर दिरबे सहरतोर लोकुरिह्क येसुना पोल्लोतुन वेहतोर. वेरा पोल्लोतुन केंजिस वेल्लाटोर येसुन विस्वस कीतोर. ताना पया वेर दिरबे सहरताहि लुस्त्रा सहरते मलतोर, अग्डाहि पया इकुनियुम सहरते वातोर, इकुनियुमताहि पिसिदिया एरियाता अंताकिया सहरते अतोर.
22 ओर बेद-बेद सहरते मलतोर, अग्डोर विस्वसिरिन “बेचोन तिपल वातेक तेला येसुन विळ्सवा विस्वसते मन्ह्टु. देवुळदीपता राजेमते दायनामुने माकु विरुदतुन आप पोयग़ाये,” इनजोर पका विस्वस कीयलाह वेहचि ओरिह्क दीरा ईतोर.
23 ओसो अव मूंड सहर्कनगा, अग्डा विस्वसिरा मुलु ताकिह कीयलाहि मुक्यालोरिन निल्पिह कीतोर. उपस-पार्तना कीसि, बोग़ येसुना पोग़ोन विस्वस कीस मतोर, ओग़े येसुसामिना कयदे सबे विस्वसिरिन विळ्सिस ईतोर.
24 पया पिसिदिया एरियाताहि पंपूलिया पटटे अतोर.
25 अनजि अग्डा पिरगा सहरतगा येसुना पोल्लोतुन वेहचि, सम्दुर कचुल मतद अतलिया सहरते अतोर.
26 अग्डाहि ओडातगा उदिसि, सुरिया पटटा अंताकिया सहरते मल्स वातोर. अद सहरता विस्वसि लोकुर, पोलुन, बार्नबसिन, देवुळता कबुरतुन पोकुर कीयलाह “देवुळता दया ओरगा मनि,” इनजोर पार्तना कीसि लोहच मतोर. अदे कबळतुन मारिह कीस ओर इर्वुर मल्स वास मतोर.
27 वातस्के विस्वसिरा मुडुन जमा कीतोर. जमा कीसि देवुळि ओरा कयदे कीतव बेराङ-बेराङ कबस्किन वेहतोर, ओसो यहुदि आयवोरेनाह्क वने येसुन विस्वस कीयलाहि देवुळि बेद्रम अग़दुन तेग़यिस ईता, इनजि वने वेहतोर.
28 अद्रमे पया पोलु, बार्नबस, विस्वसिरा संगे वेल्लाङे दियाङ अगान मतोर.