28
पोलुर माल्टा तोग़दे एवयह्तोर
1 माट दडटगा एवतस्के अग्डोरिन कलियिसि, इद माल्टा इनदनद तोग़ि इनजोर पुतोम.
2 अद नाटेनोर मन्कलोर माक बेस गूनम तोहतोर. ओर बेद्रम कीतोर, पेग़ वाया बोटिस मता, इर्ङम पोस मता अस्के किस आग़लाह, मयेनाह्क किस पोतिह कीसि माक बेस उपिह कीतोर.
3 पया पोलु एर्कमेंड वग़्किङ गुम कीसि किसतगा तचि तोरियसोर मतोग़. अस्के किस तेग़ताह्कु वग़्क तोलातग्डाहि उंद वीसमता तरस पेसता. पेसिस पोलुना कयदुन कस्किस उर्सता.
4 नाटेनोर पोलुना कयदगा तरसि उर्सतदिन ऊळतोर, ऊळिसि ओर तमतमा इद्रम इतोर, “वेग़ बोनो निटम हव्कतोग़, अदिह्क सम्दुरताहि पिसिस वातेकाय नेयम कीयनद पेनु, वेन जीवात मनदलाह एवो,” इतोर.
5 मति पोलु अद तरसतुन किसतगा सायिस ईतोग़. तरस कस्किसाय मति ओन्क वीसम तग़्ङो.
6 वेर बार ओना मेंदुल तोयिस डोलनोग़ इलवेके उंदिदेबा नेल अरसि डोलनोग़, इनजोर नाटेनोर ऊळसोर मतोर. अद्रम वेल्लाय जोम ऊळतोर, मति पोलुह्क बाताले आयो. अदिह्क पया अद्रमता तमा विचरतुन बद्ले कीसि, वेग़ कोन पेन आंदोग़ इनजोर इनदा बोटटोर.
7 पया अद तोग़दा गाय्ताल पुबलियुस पेदिरतोना बूमि अगा एरेन मता. ओग़ु माक तना लोन ओतोग़. ओसि मूंड दियाङ गाटो ईसि बेस-नेह्ना ऊळतोग़.
8 ओना तपेह्क दंड पोस विळ्सवाये मता ओसो नेतुर पोटा वने दल्गिस मता. अस्के पोलु ओन ऊळलाह लोप्पा अनजि तना कयदुन ओना तला पोग़ोन तासतोग़. तासिस देवुळतुन पार्तना कीसि ओन सव्रे कीतोग़.
9 इद्रम आता अस्के अद तोग़दोर बोर-बोर बेमरतोर मतोर, ओर वने पोलुनगा वातोर, पया पोलु पार्तना कीतस्के ओर वने सव्रेम आतोर.
10-11 नाटेनोर माक पका कदर ईसि इनम वने ईतोर.
पोलुर माल्टा तोग़दाहि रोम सहरते दास्तोर
माट अद तोग़दगा मूंड नेलाङ मतोम. पया सिकंदरिया सहरताहि वास मतद ओडाते अग्डाहि पेसतोम. इर्ङमताङ दियाङ मारनाहि अद ओडा माल्टा तोग़दगान रोमिस मता. (ताना मुनेहता तलातगा एमोह पेन्ह्कना सीना मता.) पया माट अग्डाहि ओडाते पेसतस्के अग़दे माक बाताल-बाताल गावले आस्ताङ अविस्किन नाटेनोर ओडातगा तचि वाटटोर.
12 अद ओडाते सुरकुस सहरते एवसि अगा मूंड दियाङ मतोम.
13 पया मावा ओडा अग्डाह पेसता, पेसतस्के दडटुन तिरियिसि इतालिया पटटा रेगियुम सहरते एवतोम. ओसो इमा दिया पोळ्द पेसनद अंगुमता तिनळ बाजेतेनाह वळ्य वाता. अस्के ओडा अग्डाहि पेसिस दुस्रा दिया माट पुतियुलि सहरते एवतोम.
14 एवतस्के माट कतमतोरोम ओडाताहि रेगतोम. रेगिसि माट विस्वसिरोम अद सहरता विस्वसिरिन कलियतोम. ओर मावा संगे वारममेंड मन्ह्टु इनजोर इतोर, अदिह्क ओरा संगे वारममेंड बार मनजि अग्डाहि ओसो रोम सहरता अग़दुन पोयतोम.
15 रोम सहरतोर विस्वसिर, “माकु वायलाह आतोर” इनजोर केंतोर. अदिनेनाह्क उय्तुर मन्कलोर माक कलियलाह अपियुस बजर एवनाह वास मतोर, उय्तुर मूंड-गोटुस्क इनदनद नाग़ एवनाह वास मतोर. ओरिन ऊळिसि पोलु गिर्दा आतोग़, देवुळतुन जोहर कीतोग़.
16 पया माट रोम सहरते एवतोम, एवतस्के दरोगाल पोलुन जेलते तासवा, उंद लोते तासतोग़. अद लोतगा ओग़ वग़ोगे मंदोग़, ओसो ओना पहरातुह्क ओर्वोग़ सीपय वने मतोग़.
पोलु रोमते यहुदिरिह्क येसुना पोल्लो वेहतह्तोग़
17 मूंड दियाना पया बाताल आता इतेके, पोलु अग्डोर यहुदि मोदुल मन्कलोरिन तनगा केयतोग़, केयिसि इद्रम इतोग़, “मावोरिर, नना मावा यहुदि मन्कलोरिन बाताले केवोन. ओसो मावा तादोर-बाबोर वेहताङ अडोन वने देहोन. तेला मति येरुसलेमतगा वेल्लाटोर यहुदिर नाक पोसि, रोमि सीपय्कना कयदगा ईतोर.
18 पया रोमि साय्बालोर नावा नेयम कीतोर, अस्के नाक हव्कना लेह्काडा बातय कसुर इले इनजोर पुतोर. अदिह्क नाक विळ्सिस ईयलाह आस मतोर.
19 मति यहुदिर ‘वेन विळ्सना आयो’ इनजोर गुमसिन कयर कींदुर, अदिह्क ‘कय्सर राजाना मुनेह नावा नेयम आयि’ इनजोर नाकु अर्जि कीयाय पोयता. मति नना नावा जाततोरिन कसुर तोहतना इनजोर इद्रमता अर्जि केवोन.
20 मावा इस्रयेल मन्कलोर बोन आसा कीसोर मतोर, ओनाये सेवा कीयनेनाह्क नाक इव गोल्स्कने दोहतोर. इदिनेनाह्के इव पोल्लोन मीवा संगे कलियिस वेहतलाह मीक कबुर लोहच मतन,” इनजोर पोलु इतोग़.
21 अस्के ओर मोदुल मन्कलोर इतोर, “मति माक यहुदा पटटोरग्डाहि नीवा लोप्पा बेदे सीटि दोर्को. अग्डाहि वावालोर यहुदिर वने नीवा लोप्पा बातय कबुर तवोर, ओसो नीवा बेदे कसुर वने वेहोर.
22 मति निमा बेद तुंगाते मह्निन, तान सबे देसेह्कना लोकुर विरुद कीस्तोर इनजोर माट पुतोमे. अदिह्क निमा माक बाताल वेहतना मन्ह्ता, तान माट केंजकोम,” इनजोर इतोर.
23 पया ओर “पलाना दिया नियगा केंजलाह माट वायकोम,” इनजोर वेहच अतोर. अद्रमे पया अद वेहच मतद दियाते वेल्लाटोर यहुदिर ओना लोन वातोर. वातस्के पोलु सकरताहि नुल्पे आनाहि ओरिन देवुळि बेद्रम मन्कलोरगा राजेम कीयलाह आता अदिन वेहतोग़. अद्रमे मोसानाङ अडोना सास्त्रमते, ओसो देवुळता कबुरतोराङ सास्त्रमते रासतपु, येसुये देवुळ लोहतोग़ किर्स्तु राजाल आंदोग़, ओने विस्वस कीयना इनजोर साक्सि वेहतोग़. इद्रमलेह्का पोलु ओरिन येसुना कबुर तेळियिह कीस वेहतोग़.
24 पया उय्तुर मन्कलोर ओग़ वेहतद पोल्लो सेतेमे बहे इनजि इंदुर, उय्तुर बारा नमोर आंदुर.
25 पया ओर ओरिनाङ-ओर्विह्क पोल्लोङ अरवाह्कु तमतमा बळबळ वळ्ह्कसोर, ओना लोताहि पेससोर मतोर. ओर पेसनामुने पोलु ओरिह्क उंद पोल्लोतुन वेहतोग़, “देवुळता कबुरतोग़ यसयाना तोडटे, देवुळता जीवा मीवा तादोर-बाबोरिन उंद सेतेमता पोल्लो वेहच मता, यसयान इद्रम वेहता.
26 ‘ए यसया, इस्रयेल मन्कलोरगा अनजि इद्रम वेहा इतेके,
“मीट निटम केंजसोर मनदकिर, मति मीक तेळियो आयग़ा.
मीट ऊळसोर मनदकिर, मति पुनविर आयकिर.
27 बाराह्क इतेके, देवुळता पोल्लो तेळियलाह वेरा बुद गळ्स आता.
तमाङ केव्कने केन-केनेन केंजिह्तोर,
ओसो ऊळवाह कोंडान पिहतलाह आतोर.
अद्रम केवेक कोनि तमाङ कोंडाने सेतेमतुन ऊळेर,
तमाङ केव्कने नावाङ केंजेर, तमा बुदते पुनेर,
पुनजि नयके मल्स वावेर, अस्के नना वेरिन बेस केवेनन,”
इनजोर वेहा’
इता.
28 इंजेके नावा पोल्लोतुन केंजाटु, देवुळि मन्कलोरिन पिसिह कीयनद कबुरतुन मीट यहुदिरिर पास्कतिर. अदिह्क अद कबुरतुन यहुदि आयवोरगा लोहता, ओर तान केंजनुर इदिन पुन्ज मन्ह्टु,” इनजोर पोलु इतोग़.
29 (ओग़ इद्रम इतापया यहुदिर तमतमा पका गिटोगटो आसोर अग्डाहि अतोर.)
30 अद्रमे पया पोलु रोम सहरते पूरा रेंड वर्साङ किरयता लोतगा मनेके, ओना लोन बोर-बोर कलियलाह वांदुर, ओरिन लोप्पा ओसि बेस गूनमते ऊळिन्दोग़.
31 ओसो बोन्के रेयवालेवा दीराते देवुळि मन्कलोरगा राजेम कीयनद पोल्लोतुन लोकुरिह्क वेहन्दोग़, ओसो किर्स्तु येसुसामिनाङ पोल्लोन बेदे एग़्कुळलेवा काग़्हन्दोग़.