कुरिंत सहरतोर विस्वसिरेनाह्कु, किर्स्तुना बळयि पोलु लोहतदु पयाडा सीटि
इद सीटटुन रासवाल येसु किर्स्तुना बळयि पोलु आंदोग़. पोलु इद सीटटुन मकिदुनिया पटटाहि रासतोग़. कुरिंत सहरते मतोर विस्वसिरा मुडोरिह्क, पोलु रासतद इद दुस्रा मल्काता सीटि आंदु.
पोलु इद सीटटुन बाराह्क रासतोग़ इतेके, पोलु मुनेता सीटटे रासतव पोल्लोङ, अग्डाङ सबे कट्लानु माय्पिह कीयलाह, कबळतुह्क अरवोङ. अदिनेनाह्क पोलु तना किर्स्तुना बळयि मताह्कु, तन्क दोर्कतद अदिकरतुन, इद सीटटगा तोहतलाह आतोग़. ओसो बेचोन तिपल वातेक तेला, विस्वसिर तान आपिसि बेस-नेह्ना पिसना इनजोर, इद सीटटे रासतोग़.
1
मुनेता पोल्लो
1 देवुळता विचरते किर्स्तु येसुना बळयि आयलाह, अद निल्पिह कीतोनन पोलुनन. नना कुरिंत सहरते मनवालोर देवुळता मुडोरिर मीकु, ओसो मीवा अकाया पटटोर सबेटोर देवुळता मन्कलोरिह्क, इद सीटटुन रासिह्नन. मावा तोळतोग़ विस्वसि तिमोति, नावा संगे इगा मन्ह्तोग़.
2 मावा देवुळबाबाल ओसो येसुसामि किर्स्तु, वेर इर्वुर मीक देय्वा ईयिर, सुकम ईयिर.
पोलु देवुळतुन जोहर कीस्तोग़
3 मावा सामि येसु किर्स्तुना देवुळबाबाह्कु जोहर आयि! ओग़ मावा जीवा लोपवाल बाबाल आंदोग़. ओग़ अमेसा जीवातुह्क सुकम एवाल देवुळबाबाल आंदोग़.
4 ओग़ मावाङ सबे तिपल्कना वेलाते, मावा जीवातुन सितुर कीस्तोग़. बह इतेके ओग़ बेद्रम मावा जीवातुन सितुर कीस्तोग़, अद्रम माट वने बेदाय तिपलते मनवालोरा जीवातुन, सितुर कीयना इनजोरे.
5 माट किर्स्तुनेनाह्क बेचोन एक्वा तिपल आय्ह्नोम, अचोन एक्वा किर्स्तुना मेटे, देवुळि मावा जीवातुन सितुर कीस्ता. अदिनेनाह्क माट दुस्रोर मन्कलोरा जीवातुन सितुर कीया पग़यह्नोम.
6 इंजेके वने माट तिपल आयलाह आतोम इतेके, अद मीवा जीवातुन देवुळ सितुर कीयि, मीक पिसिह कीयि इनजोरे. अद मावा जीवातुन सितुर कीस्ता इतेके, मीवा जीवातुन वने सितुर कीस्ता. अस्के मावा लेह्कान मीट वने तिपल आयह्पा, तिपल्किन आपिस मनदा पग़यह्निर.
7 मावा तिपलते मीट वने कलियिह्निर. अद्रमे देवुळि मावा जीवातुन सितुर कीयनदिनगा वने, मीट कलियकिर इनजोर पुतोम. अदिनेनाह्क मीट विस्वसते मेग़्किस मनदकिर इन्जि आसा तासतोम, अद आसा देगवाय मन्ह्ता.
8 मावोर विस्वसिरिर. आसिया पटटगा, माट बेद्रम तिपल आतोम इनजोर, मीट पुनदना: मुर्तिय आप पग़वप लेह्कान, पकाय तिपल वास माक अह्चिस मता; ओसोय मेसेह्ने आस मतोम. मावा जीवा पिसग़ा इनजोर वने, मुर्तिय आसा इलवा मता.
9 निटम इंजेक अचोने, माक हामुरता सिक्सा दोर्कता इनजोर, विचर कीस मतोम. माट मावा कुदता पोग़ोन बर्वस तासवा, डोलतोरिन जीवा अर्हतनद देवुळता पोग़ोन बर्वस तासना इनजोर, इद्रम आस मता.
10 अद्रम डोलना लेह्काडा तिपल माक वास मता. अद तिपलताहि देवुळि माक पिसिह कीता, ओसो मुनेह वने पिसिह कीसोर मनदग़ा इनजोर, मावा आसा मन्ह्ता.
11 मीट वने मावा तोळ आसि, मयेनाह्क पार्तना कीय्ह्निर. बह इतेके मावासाटि वेल्लाटोर मन्कलोर पार्तना कीयनदिन केंजिस, देवुळि तना देय्वाते माक पिसिह कीता. तानासाटि वेल्लाटोर मन्कलोर मयेनाह देवुळतुन जोहर कीयिर.
पोलुना विचर मिळ्न्दता
12 दुनियाते माट बाताल बाताल कीतोम, देवुळ ईतद सेतेम बुदते, नाळेह केवद बुदते कीतोम इन्जि, मावा जीवा वेहतह्ता, कासा इतेके मीवा संगे ताकिह्पा. इदिना लोप्पा माट पोग़यिह्नोम. मति अमेसा माट देवुळता देय्वाते कीतोम, मन्कना बुदते आयो.
13-14 मीट अर्विस पुनदनव पोल्लोने, माट पङ्ने रासलाह आतोम, बेदिने मकिह केवोम. इंजेके माक केनकेने पुतिर, आक्रि एवनाह माक पूरा पुनजोर दाकिर इनजोर, आसा कीतन. अस्के मावा येसुसामि ओसोवने वायनद दियाते, माट मीवा लोप्पा पोग़यकोम, अद्रमे मीट वने मावा लोप्पा पोग़य पग़यकिर.
15 इद्रमे बर्वस कीसि, नयग्डाहि मीक रेंड मल्काङ पाय्दा दोर्कि इनजोर, मुने मियगाने वायलाह विचर कीस मतन.
16 अद इद्रम मता: मियगाह्के मकिदुनिया पटटे दाकन, अहे अग्डाहि ओसोवने मियगा मलयकन; अस्के मीट नाक यहुदा पटटे दायनद अग़दे लोहतकिर इनजोर, विचर कीस मतन.
17 मति इंजेके मियगा वावोन! अदिनेनाह्क रेंड विचर्क केवाल इनजोर, नाक इनेरिर! नना अद्रमतोनन आयोन. मन्कना बुदते ताकवालोरा लेह्का, मीक इंगो वाय्ह्नन इनदना, मति जीवातगा आयो वावोन इनदना, इद्रमलेह्का रेंड वेंजेह्कना बुदतोनन आयोन.
18 नना रेंड विचर्कनोनन आयोन इन्जि, देवुळ नावा सेतेमता साक्सि मन्ह्ता.
19 बह इतेके देवुळता मग़ि येसु किर्स्तुना पोल्लोतुन, नना, सीलास, तिमोति, माट मुवोम आस मियगा पोकुर कीतोम. अगा येसु किर्स्तु वने इंगो, आयो इनजोर, इद्रम रेंड विचर्कने वेहोग़. ओग़ अमेसा तोडटा पोल्लो पेसतपु, अहे केवाल आंदोग़.
20 देवुळि वेल्लाङे पोल्लोङ विळ्सिस मता; अव सबे पोल्लोङ येसुनगाने करल आताङ. अदिनेनाह्क येसुनेनाह्के माट आमेन (इतेके इंगो, निटमे) इनजोरे, देवुळतुन मान ईय्ह्नल.
21 माक मीवा संगे किर्स्तुनगा जोळे कीसि, विस्वसते मेग़्किह कीयनदु, ओसो माक तनेनाह्क आचतदु, देवुळिये आंदु.
22 माट ताना मन्कलोरल इनजोर, तना जीवातुन मयगा सीना लेह्का तासता. तान मावा जीवातगा इसर ईतप लेह्का ईता.
पोलु कुरिंततोरगा अनवदिना लोप्पा
23 मीक तेर्हचि लजा वानाह केवोन इनजोर, मियगा वावोन. नावा इद पोल्लो सेतेम इलवेके, देवुळिये नाक एळ्हि.
24 मीट विस्वसते मेग़्किस नितिर इनजोर पुतोम, अदिनेनाह्क मीट बह विस्वस कीयना इनजोर वेहचि, मीवा पोग़ोन अदिकर ताकिह कीयलाह ऊळोम. मति मीट बेस गिर्दाते पिसलाह, माट वने तोळ आय्ह्नोम, अचोने!