इपिसुस सहरतोर विस्वसिरेनाह्कु, किर्स्तुना बळयि पोलु लोहतद सीटि
इद सीटटुन रासवाल येसुना बळयि पोलु आंदोग़. पोलु इद सीटटुन रोम सहरता जेलतगा मतस्के, इपिसुस सहरतोर विस्वसिरेनाह्क रासतोग़. इपिसुस सहर आसिया पटटा मोदुल सहर मता. अद पका बेरा सहर मता. अद सहरतगा पोलु कीतद सेवाताङ पोल्लोङ बळयिराङ कबस्क इद पुस्तकता 19 अद्ययतगा मन्ह्ताङ.
पोलु इद सीटटुन बाराह्क रासतोग़ इतेके, पोग़ोटा बूमतगा मनदनव ओसो इळ्ता बूमतगा मनदनव सबेटविन येसु किर्स्तुना कयदे ईयलाहि, देवुळि मुनेन विचर कीस तासता. इद पोल्लोतुन पोकुर कीयलाहि, पोलु इद सीटि रासतोग़. ओसो यहुदिर, यहुदि आयवोर उंदिय आया पग़वोर इनजोर, इपिसुसतोर विस्वसिर इंदुर. मति किर्स्तुन विस्वस कीतोर उंदिय मुल आतोर. ओर उंदिय मेंदुल आतोर. किर्स्तुना मेंदुलता लेह्काडोर आतोर. देवुळता जीवा मनदनद जागा आतोर. ओसो विस्वसिर देवुळताङ पिलाङ-पेकोर आताह्कु, ओर्विह्क-ओर्वोग़ जीवा कीम्ह्टु इनजोर, पोलु इद सीटटगा रासलाह आतोग़.
1
मुनेताङ पोल्लोङ
1 नना पोलुनन, देवुळता विचर मतपु, येसु किर्स्तुना बळयिनन आतन. मीट इपिसुस सहरते मनवालोर देवुळता मन्कलोरिह्क इद सीटि रासलाह आतन. मीट किर्स्तु येसुन विस्वस कीसोर दायलाह आतिर.
2 मावा देवुळबाबानाहि ओसो किर्स्तु येसुसामिनाहि मीक सुकमि, देय्वा दोर्कि.
किर्स्तुना मेटे माक दोर्कतद बर्कत
3 देवुळतुह्क जोहर आयि! अद तना मग़ि किर्स्तुना मेटे, पोग़ोन देवुळदीपतगा मनदनव सबे देय्वान माक ईता.
4 इतेके ताना मुनेह माट पवित्र मनदना, बाताले कसुरलेवा मनदना इनजोर, इद बूमतुन पुटिह कीयनामुनेन, माक किर्स्तुना मेटे आचता.
5 माक जीवा कीसि, येसु किर्स्तुना मेटे तनाङ पिलाङ-पेकोर कीयलाहि, माक मुनेन आचता. इद्रम कीयलाहि मुनेन विचर कीस मता, अहे ताना गिर्दा मता.
6 ताना जीवा कीतोग़ मग़ि किर्स्तुना लोकुरल माट आताह्कु, अद मावा पोग़ोन लेकालेवा दया कीता. माट तान मान ईसि जोहर कीयना इनजोर, माक अद्रम दया कीता.
7 मावा पोग़ोन पका दया कीता, अदिनेनाह्क तना मग़ि नेतुर पोहच डोलताह्कु, मावा पापमतुन मापि कीसि, ओना मेटे माक पापमताहि विळ्सिह कीता.
8 माक आलिस पिसनाह दया कीता, अदिनेनाह्क सबे रीतिना बुदि ओसो तेल्व ईता.
9 देवुळि मुने मकिह कीस तासिस मतद पोल्लोतुन, इंजेके माक पुनाह कीता. इद्रम कीयलाहि ताना गिर्दा मता. मुनेन तना विचर कीस मतपु, किर्स्तुना मेटे इंजेके अद पोल्लोतुन पेसिह कीता.
10 अद पोल्लो इद्रम मन्ह्ता: देवुळि तना विचर कीतद कगो एवतस्के, पोग़ोटा बूमतगा मनदनव, ओसो इळ्ता बूमतगा मनदनव, सबेटविन जमा आनाह कीसि, येसु किर्स्तुना कयदे ईयनदु.
11 ओना संगे माक जोळे कीसि, तना मन्कलोर कीयलाहि माक आचता. तना विचर कीस मतपु, माक मुनेन आचता. अद तना बेद्रम विचर कीता, अद इसबते सबे कीता.
12 इतेके मुनेन किर्स्तुना पोग़ोन आसा तासतोरल माटु, देवुळतुह्क मान ईसि जोहर कीयना इनजोर, अद्रम कीता.
13 मीक पिसिह कीयनद बेसता कबुरता सेतेमतुन, मीट केंजिसि किर्स्तुन विस्वस कीतिर. विस्वस कीताह्कु, देवुळि पोल्लो विळ्सिस मतपु, तना पवित्र जीवातुन मीवा पोग़ोन वने उदिह कीता. कीसि मीवा पोग़ोन किर्स्तुना मन्कलोर इनजोर, सीना तासतप लेह्का कीता.
14 अद मयेनाह्क तासतव बेसताङ पोल्लोनु, पेग़्के माट दोर्किह कीकल इनजोर, तना जीवातुन इंजेकेन इसर ईतप लेह्का माक ईता. देवुळि माक पूरा विळ्सिह कीयनद दिया एवनाह, अद इसर मन्ह्ता. माट तान्क मान ईसि जोहर कीयना इनजोर, देवुळि अद्रम कीता.
पोलु विस्वसिरेनाह्क पार्तना कीस्तोग़
15 अदिनेनाह्क देवुळि माक इचोन कीसीताह्कु, मीट येसुसामिन विस्वस कीतदिन, ओसो देवुळता सबेटोर लोकुरिन मीट जीवा कीयनदिन, नना केंजताह्कु,
16 नना पार्तना कीयह्पा, मियेनाह्क ऊक-ऊके पार्तना कीसोर मह्नन. ओसो देवुळतुन जोहर कीसोर मह्नन.
17 नना इद्रम पार्तना कीय्ह्नन: मावा येसुसामि किर्स्तुना देवुळतुन, डीसातोग़ बाबान मीट पूरा पुनदना इन्जि, ओग़ मीक तना बुदि ईयेग़, तनाङ विचर्किन मीक पुन्पिह कीयेग़.
18 बेचोक बेसताङ पोल्लोन आसा कीयलाहि तना माक केयता, अचोकिन पुनदलाहि; ओसो मीट नावा पका मोलातोर मन्कलोरिर इन्जि, देवुळ मीक इन्ह्ता. इदिन पुनदलाहि, देवुळि मीवा बुदतगा पुन्पिह कीयि.
19-20 ओसो हामुरतग्डाहि किर्स्तुन जीवा अर्हचि, देवुळदीपतगा तना तिनळ बाजे राजेम ताकिह कीयलाहि उदिह कीयह्पा, अद बेरा लाव तोहता. माट विस्वस कीतोरा तोळ आयलाह, तानगा अदे बेरा लाव मन्ह्ता, ताना लाव बेस्केन मारो, इदिन मीक पुन्पिह कीयि इनजोर, पार्तना कीय्ह्नन.
21 अदिकर ताकिह कीयनव देवतुल्कु, देयह्कु, इव सबेटविह्काय किर्स्तुय बेरोग़ आंदोग़. इंजेके वने, वायनद कालमते वने, अदिकरताङ पेदिर्क बेचोक मन्ह्ताङ, अव सबेटविह्काय ओनाय पेदिर बेरा आंदु.
22 सबेटविन ओग़ ताकिह कीयेग़ इनजोर, देवुळि ओना कयदे ईता. ओने सबेटविन ताकिह केवाल कीसि, विस्वसिरा मुडुन ताकिह कीयलाह वने, ओने निल्पिह कीता.
23 किर्स्तु विस्वसिरा मुडा तलाता लेह्काडोग़ु, विस्वसिर बार ओना मेंदुलता लेह्काडोरु. विस्वसिरा मुलु ओसो किर्स्तु, उंदिय मेंदुल आतोर. ओसो सबे पोल्लोन पूरा कीसेवाल किर्स्तुये.