2
माक पिसिह कीतद पोल्लोतुन पास्कनद आयो
1 देवुळता मग़ि इचोन बेरोग़ आताह्कु, माट केंजतव ओना लोप्पाडाङ सेतेम पोल्लोन पका मेग़्किस विस्वस कीसोर दायना. अस्के माट विस्वसताहि लेसवल.
2 पोग़ोटाङ देवतुल्कना मेटे, देवुळि मावा तादोर-बाबोरिह्क पका करलता पोल्लो काग़्हता. अद अचोन करलता मता इतेके बोग़ाय अद पोल्लोता बेदाय अडोतुन देहतेक अचोन, कसुरतोन्क ओप्पनद सिक्सा दोर्किंदु.
3-4 देवतुल्क ततद कबुरतुन केंजवोर सिक्साताहि पिस पग़वा मतोर; इतेके मन्कलोर पिसना लोप्पाडा बेरा कबुरतुन माट पास्कतेक अचोन, बेद्रम पिस पग़यकल? मुने तान वेहतोग़ु मावा सामिये. पया सामिनाङ केंजतोरु अद पोल्लो निटमे इनजोर माक तोहचीतोर. ओरा साक्सि सेतेम मन्ह्ता इनजि तोहतलाहि, देवुळि ओरा कयदे बामिह कीयनाङ सीनाङ, बेरा लावताङ कबस्क कीस तोहता. ओसो तना जीवाता मेटे, तना विचर मतपु, विस्वसिरिह्क अलग-अलग बुदिङ तूसिसीता; इद्रमता बेरा कबुरतुन मुर्तिय पास्कनद आयो.
मन्कलोरिन पिसिह कीयलाहि येसु मन्कल मारियिस वातोग़
5 इंजेके पूना दुनिया आयग़ा इनजोर माट इह्नल. अद दुनियातुन ताकिह कीयलाहि, देवतुल्किन देवुळि निल्पिह केवो.
6 मति देवुळता सास्त्रमतगा, अद दुनियातुन ताकिह कीयलाहि मन्कने निल्पिह कीता इनजोर रासतद मन्ह्ता. अद इह मन्ह्ता:
मन्कलोर नीवा मुनेह बेद्रमतोरु, निमा ओरा सीता कीय्ह्निन?
माने-मन्कल बेचोटोग़ु, ओन निमा पर्वा कीय्ह्निन?
7 मन्कलोरु नीवा मुनेह बातय इलेर,
तेला मति, निमा मान्वनु मान-डीसाते निल्पिह कीतिन,
ओनु देवतुल्किह्क इचुने कमि कीतिन.
8 निमा पुटिह कीतव सबेटविना अदिकर ओना कयदे ईतिन.
इनजोर रासतद मन्ह्ता. सबेटविन इनजोर इतेके देवुळि बेदिने विळ्सो; मति इंजेके सबेटविना अदिकर मन्कना कयदे दिसो.
9 मति ओर्विन माट पुतल. देवुळि गळ्किह्क, ओन पोग़ोटाङ देवतुल्किह्काय उचुने उड्लोग़ कीस मता. ओग़ आंदोग़ येसु. मावा पोग़ोन देवुळि दया कीताह्कु, सबेटोर मन्कलोरेनाह्क येसु डोलिस मतोग़. ओग़ पकाय तिपल आस डोलताह्कु, देवुळि ओन मान-डीसाते निल्पिह कीता.
10 सबेटव देवुळतेनाह्क मन्ह्ताङ; ताना मेटे सबे तयर आताङ. वेल्लाटोर मन्कलोरिन तनाङ मग़्क-मयस्क कीसि, पोग़ोन तना मान-डीसाते काल्ह्पलाहि अद विचर कीस मता. मन्कलोरिन तनाङ मग़्क-मयस्क कीयलाहि देवुळि तना मग़ि येसुन निल्पिह कीता. माक पिसिह कीयनद सेवातेनाह्क येसुन पूरा ओप्पे कीयना इनजि, देवुळि ओन पका तिपल अरनाह कीता. इद्रम कीयनद देवुळतुह्क बेस ओप्पता.
11 येसु, माट पापि मन्कलोरिन पूरा पवित्र कीतोग़. कीताह्कु ओना बाबाल, मावा वने देवुळबाबाल आतोग़. अदिनेनाह्क माकु, “नावाङ तमोर-एलास्क” इनजोर इनदलाह येसुह्क लजा वावो.
12 अदिह्क देवुळतुन येसु इतद पोल्लो ताना सास्त्रमतगा इद्रम रासिस मन्ह्ता:
नना नावाङ तमोर-एलास्किह्क नीवा डीसाता लोप्पा वेहतकन,
लोकुर जमा आस मोळ्कना जागातगा अनजि, नना पाटाङ ओसि नीक जोहर कीकन.
इनजोर रासिस मन्ह्ता.
13 ओसो रासिस मन्ह्ता:
नना देवुळता पोग़ोन बर्वस कीकन;
इदु! नना वातन! देवुळि नाक ईतोर पिलाङ-पेकोरा संगे नना वातन.
इनजोर रासिस मन्ह्ता.
14-15 वेर पिलाङ-पेकोर इतेके माटे, माट कय-काल मनवालोरल मताह्कु, येसु वने मावा लेह्का कय-कादोग़ आसि वातोग़. जीवात मनाह्जोम मयगा हामुरता रेय मताह्कु, देयह्कना मुक्याना अदिकर मावा पोग़ोन मता. मति येसु तना हामुरता मेटे ताना अदिकरतुन बूळे कीतोग़. कीसि माकु हामुरता रेयताहि विळ्सिह कीतोग़.
16 निटमे येसु पोग़ोटाङ देवतुल्किन साय्ता कीयलाह वावोग़; मति अब्रहम मुय्तोना जालपिलतोरिह्के साय्ता कीयलाह वातोग़.
17 अदिनेनाह्क ओग़ सबे पोल्लोनगा तनाङ तमोर-एलास्क लेह्कान आयनद गर्ज मता. इद्रमलेह्का ओग़ देवुळता सेवाते, दया केवाल बर्वस लायकतोग़ पेर्माल आसि, मन्कलोरा पापमतेनाह्कु तनाय जीवाता मोक ईतोग़.
18 बेरा तिपलते ओन्क वने आरेम आयनद विचर वाता. अदिनेनाह्क बेस्के तिपलते माक अद्रमता विचर वास्ता, अस्के ओग़ माकु साय्ता कीया पग़यह्तोग़.