2
येसु किर्स्तु मावा तोळ मन्ह्तोग़
1 ए पेकोरिर! मीट पापम केमाटु इनजोर, इव पोल्लोन नना मियेनाह्क रासलाह आतन. मति मयग्डाह बोग़ाय पापम कीतेके, माकु देवुळबाबाना संगे गूनम केवाल ओर्वोग़ तोळतोग़ मन्ह्तोग़. ओग़े सेतेमतोग़ येसु किर्स्तु आंदोग़.
2 मावा पापमता मापि आयना इन्जि, मावा सिक्सातुन तना पोग़ोन एचि, डोलिस मतोग़. सिरप मावाय आयो, मति पूरा दुनियामेटोरा पापमतेनाह्क डोलिस मतोग़.
3 माट देवुळता उकुमतुन केंजिस अद्रम ताकतेकेने, तान माट बेस पुह्नल इन्जि, मावा जीवातगा एर्का आस्ता.
4 बोग़ु नना देवुळतुन पुतन इनजोर इन्ह्तोग़, मति तानाङ अडोन माळोग़ इतेके, ओग़ जोल मन्कल आंदोग़. ओनगा सेतेम इले.
5 मति बोग़ु देवुळता पोल्लोतुन केंजिसि अद्रम ताकिह्तोग़, ओनगा निटमे देवुळता गूनम मन्ह्ता. इदिन ऊळिसि, माट देवुळता संगे जोळेम आस मह्नल इनजोर, माक तेळियिह्ता.
6 बोग़ु देवुळता संगे जोळेम आस मह्नन इन्ह्तोग़, ओना ताकमुळि येसुना ताकमुळता लेह्काने मनदना गावले.
ओर्विह्क-ओर्वोग़ जीवा कीयनद पोल्लो
7 मावोरिर! नना मीकु पूना अडो रासोन, मति मुनेताहि मीट पुतदु, पाळ्ना अडोतुने रासलाह आतन. मीट विस्वसते वातग्डाहि केंजतद पोल्लोये, इद पाळ्ना अडो आंदु.
8 मति इद अडोता उंद पूना अर्तम इंजेक माक दिसिह्ता. ईकळ-गंगा मायलाह आता, सेतेमता वेह्च इंजेके दींचलाह आता. अदिनेनाह्क अद अडोता पूना अर्तम, येसुना पिसमुळतगा ओसो मीवा पिसमुळतगा वने निटम आता.
9 बोग़ु देवुळता वेह्चते मह्नन इन्ह्तोग़, मति तना तोळतोग़ विस्वसिन कोटुल कीस्तोग़ इतेके, ओग़ इंका वने ईकळ-गंगातेन मन्ह्तोग़.
10 बोग़ु तना तोळतोग़ विस्वसिन जीवा कीस्तोग़, ओग़ वेह्चते मनवाल आंदोग़. ओनगा पापमते अर्हतनद बेदे पोल्लो इले.
11 मति बोग़ तना तोळतोग़ विस्वसिन कोटुल कीस्तोग़, ओग़ ईकळते मन्ह्तोग़, अहे ईकळते ताकिह्तोग़. ईकळ ओनु तोववाह कीता, अदिनेनाह्क ओग़ बेके दास्तोग़, अदिन वने पुनोग़.
12 ए पेकोरिर, येसु किर्स्तुना मेटे, मीवा पापमता मापि आता इन्जि,
मीक इव पोल्लोङ रासलाह आतन.
13 ए पाळ्नोर विस्वसिरिर, बूम पुटवग्डाह मनवाल येसु किर्स्तुनु,
मीट पुतिर इन्जि, मीक रासलाह आतन.
ए पूनोर विस्वसिरिर, मीट देयह्कना मुक्यान आरे कीतिर इन्जि,
मीक रासलाह आतन.
14 ए पेकोरिर, मीट देवुळबाबान पुतिर इन्जि,
मीक इव पोल्लोङ रासलाह आतन.
ए पाळ्नोर विस्वसिरिर, बूम पुटवग्डाह मनवाल येसु किर्स्तुनु,
मीट पुतिर इन्जि, मीक रासलाह आतन.
ए पूनोर विस्वसिरिर, मीवा विस्वस मेग़्कता; देवुळता पोल्लो मीवा जीवातगा मन्ह्ता.
मीट देयह्कना मुक्यान आरे कीतिर इन्जि, मीक रासलाह आतन.
15-16 (इंजेके जमा आतोरिन वेहतलाह आतन:) इद दुनिया ईयनद गिर्दातुन पर्ह्कना, आपुनाङ कोंडाह्क दिसतदिन लालुस कीयना, इद दुनियाता मालसोमते पोमाडेङ कीयना, इव सबे पोल्लोङ देवुळबाबानाङ आयोङ, मति ओन पुनवोराङ आंदुङ. अदिनेनाह्क इद दुनियातुन, ओसो इद दुनिया मीक ईयनद बेदिने, मीट जीवा केमाटु. बोग़ इदिन जीवा कीस्तोग़, ओग़ देवुळतुन जीवा केवोग़.
17 इद दुनिया ओसो, देवुळतुन पुनवोराङ लालुस्क मायसोर दास्ताङ, मति बोग़ देवुळता विचर मतप ताकिह्तोग़, ओग़ ताना संगे अमेसा जीवात मनदनोग़.
किर्स्तुना विरुदतोर
18 पेकोरिर! आक्रिता वेला एवता. किर्स्तुना मोदुल विरुदतोग़ वायनोग़ इनजोर मीट केंजतिर. अद्रमलेह्काने इंजेक वने, किर्स्तुना विरुदतोर वेल्लाटोर वातोर. अदिनेनाह्क आक्रिता वेला वाता इनजोर माट पुतल.
19 ओर मन्कलोर मावाय मुडग्डाहि पेसतोर, मति निटम ओर मुनेताहि मावोर आयवा मतोर. अद्रम आस मतेके, मावाय संगे मनेर. ओर माक विळ्सिस अताह्कु, ओर बोरे मावा तोळतोर आयोर इनजोर, माक एर्का आस्ता.
20 मति मीक इतेके, किर्स्तु तना पवित्र जीवा ईसि निल्पिह कीतोग़, अदिह्क इंजेके मीट सबेटोरिर सेतेमतुन पुह्निर.
21 मीट सेतेमतुन पुनविर इनजोर नना रासोन, मति मीट सेतेमतुन पुतिर, सेतेमताहि बेदे जोल पुटो इनजोर वने पुतिर. अदिनेनाह्क रासलाह आतन.
22 ओसो बोग़ु येसुन देवुळ लोहतोग़ पिसिह केवाल किर्स्तु आयोग़ इन्ह्तोग़, ओग़ जोल मन्कल आंदोग़. इद्रमतोग़ु किर्स्तुना विरुदतोग़ आंदोग़, ओग़ु देवुळबाबान ओसो ओना मग़िन जेक तासिह्तोग़.
23 बोग़ु देवुळता मग़िन जेक तासिह्तोग़, ओनगा देवुळबाबाना तोळ इले. मति बोग़ ओना मग़िन (नावा पिसिह केवाल इन्जि) कबुल कीस्तोग़, ओनगा देवुळबाबाना तोळ मन्ह्ता.
24 मति मीट बेद पोल्लो विस्वस कीतग्डाह केंजतिर, अद पोल्लो मीवा जीवातगा मनि. अद्रम मता इतेके, मीट मग़ना संगे ओसो देवुळबाबाना संगे जोळेम आस मनदकिर.
25 येसु माक अमेसाता पिसमुळ ईकन इनजोर, पोल्लो विळ्सतोग़.
26 मीक लेसिह कीयलाह ऊळवालोरु, ओरा लोप्पा नना इव पोल्लोन रासलाह आतन.
27 मति मीवा जीवातगा इतेके, येसु किर्स्तुना मेटे दोर्कतद देवुळता पवित्र जीवा मन्ह्ता. अदिनेनाह्क बोग़े दुस्रोग़ मन्कल मीक काग़्हतनद गर्ज इले. किर्स्तुना मेटे दोर्कतद पवित्र जीवा मीक सबे काग़्हतह्ता. अद जीवा सेतेमता आंदु, जोलता आयो. अदिनेनाह्क अद काग़्हतप लेह्काने, किर्स्तुना संगे जोळेम आस मन्ह्टु.
28 ए पेकोरिर, किर्स्तुना संगे जोळेम आस मन्ह्टु. अद्रम मतेके, ओग़ बेस्के इद बूमते मल्स वायनोग़, अस्के माट रेयवल आयकल. ओसो ओग़ वायह्पा, ओना मुनेह लजा आयवालेवा मनदकल.
29 ओसो किर्स्तु सेतेमतोग़ आंदोग़ इनजोर, मीट पुतिर इतेके, मियग्डाहि बोरु सेतेमताङ कबस्क कीस्तोर, ओरिह्क पुटमुळि देवुळिये ईता, इदिन वने पुन्ह्टु.