15
येसु तोंडालेह्काडोग़, विस्वसिर इतेके कांदाङ
1 कग़यवालोर ओना संगे ताकनेके, येसु इद्रम काग़्हतलाह आतोग़: “ननान करलता अंगुर-तोंडालेह्काडोनन आंदन. नावा बाबाल इतेके, अंगुर वाळुमतुन सोय केवाना लेह्काडोग़ आंदोग़.
2 नना तोंडालेह्काडोनन, (मीट नावाङ कांदानिर आंदिर). नयगा आदवाङ कांदानु, बाबाल डायिस पोहचीस्तोग़. मति आदनाङ कांदानु, पका आदना इन्जि, ओग़ एळ्पिसि जूत कीस्तोग़.
3 नना वळ्ह्कतद पोल्लोतुन नमताह्कु, मीट मुनेन जूत आतिर.
4 मीट नयगा जोळेम आस मन्ह्टु, अस्के नना मियगा जोळेम आस मनदकन. बहलेह्का कांदा तोंडातगा जोळेम आस मनवालेवा, तनाय कुद आद पग़वो, अहलेह्का मीट वने नयगा जोळेम आस मनवालेवा, देवुळता अग़दे ताक पग़विर.
5 नना तोंडालेह्काडोनन; मीट नावाङ कांदानिर आंदिर. बोर नयगा जोळेम आस मन्ह्तोर, नना ओरगा जोळेम आस मह्नन, अस्के अव कांदाङ वलियिसि पका आदिह्ताङ. बाराह्क इतेके नयग्डाहि एग़िस मतेके, मीक देवुळतेनाह्क बातय कीया वावो.
6 बोर नयगा जोळेम आस मनोर आयनुर, ओरिन नावा बाबाल कांदान डायतप लेह्का, डायिस पोहचीयनोग़. इद्रमताङ कांदाङ वततस्के, अविस्किन गुम कीसि किसतगा वाटिह्तोर, पया अव पूरा कर्विस दास्ताङ.
7 मीटु नयगा जोळेम आस मतिर, ओसो नावाङ पोल्लोङ मीवा जीवातगा गडिस मतुङ इतेके, बाताल मीक गावले, अदिन ताल्ह्काटु, अस्के अद मीक दोर्कग़ा.
8 मीट पका आदिसि, येसुनाङ कग़यवालोरोम इन्जि तोहतकिर अस्के, इवटे नावा बाबाना मान आयग़ा.
9-10 “बेद्रम बाबाल नाक जीवा कीतोग़, अद्रमे नना वने मीक जीवा कीतन. नना बाबानाङ केंजिसि ओना पोल्लोतुन माळिह्नन, अदिह्क ओग़ नाक जीवा कीयनदिन पुनजोरेन मह्नन. अद्रमलेह्काने मीट वने नावाङ केंजिसि नावा पोल्लोतुन माळाटु; अस्के मीट वने नना मीक जीवा कीयनदिन पुनजोरेन मनदकिर.
11 नावा लेह्का मीट गिर्दाते मनदना, ओसो मीवा गिर्दा पूरा निंदना इन्जि, मीक इव गोटिङ नना वेहतन.
12 बेद्रम नना मीकु जीवा कीतन, अद्रमे मीट ओर्विह्क-ओर्वोग़ जीवा कीयना, इदे नावा उकुम आंदु.
13 बोग़ाय तनाङ गोततोरेनाह्क तना जीवा ईयनद, तेन्क वीळिस बेदे गूनम बेरा इले.
14 मीक नना बेद-बेद वेहतह्नन, अदिन मीट कीतेके, मीट नावाङ गोततोरिर आयकिर.
15 नना इंजेटाह मीकु ओर्युलतोर इनोन आयकन, बाराह्क इतेके माल्काना पोटालोप्पाडाङ गोटिङ, ओर्युलतोग़ पुनोग़ आस्तोग़. मति नना इतेक मीकु गोततोरिर इतन, बह इतेके बेव पोल्लोङ नना नावा बाबानग्डाहि केंजतन, अव कतमे मीक तेळियिह कीस वेहतन.
16 मीट नाक आचविर, मति ननाने मीक आचतन, आचिसि मीट नयगा जोळेम आस मन्जि, बेसताङ पुळ्यवाङ कायाङ कटना इन्जि, मीक तासतन. अदिह्क मीट बेदाय गोटटुनु नावा पेदिर वेहच बाबान ताल्ह्कतेके, अदिन ओग़ मीक ईयनोग़.
17 मीट ओर्विह्क-ओर्वोग़ जीवा कीम्ह्टु, इदे मीकु नावा उकुम आंदु.
दुनियातोरा कोंटे
18 “दुनियातोर बेस्के मीकु कोंटे कीयनुर, अस्के इद गोटटुन सीताते तासाटु: मीकाय मुने ओर नाक इंका कोंटे कीतोर.
19 मीटु दुनियातोरिर आस मतेके, दुनियातोर मीक मावोर इनजोरे, जीवा केवेर. मति नना मीक दुनियातोरग्डाहि आचिसि, एग़्पिह कीतन इन्जि, मीट दुनियातोरिर आयविर. अदिह्क दुनियातोर मीक कोंटे कीस्तोर.
20 ओर्युल मन्कल तना माल्काह्क बेरोग़ आयोग़ इन्जि, मीक उंद पोल्लो वेहच मतन, तान सीता कीम्ह्टु. ओर नावा पेग़्के दल्गतोर इतेके, मीवा पेग़्के वने दल्गनुर. ओर नावा पोल्लोतुन माळतोर इतेके, मीवा पोल्लोतुन वने माळनुर.
21 नाक लोहतोग़ बाबान वेर पुनवाह्कु, मीट नावाङ कग़यवालोरिर इन्जि, मीकु इद्रमताङ तिपल्क ईयनुर.
22 नना वासि ओरा संगे वळ्ह्कवेके, (ओरिह्कु नीवाङ केंजोम इनदलाह दोर्को आवालि, इतेके) ओरगा कसुर मनो आवालि. मति इंजेके नना ओरा संगे वळ्ह्कताह्कु, ओरिह्कु तमा कसुरतुनु मकिह कीयलाह जागाय इले.
23 बोर नाक कोंटे कीस्तोर, ओर नावा बाबान वने कोंटे कीतप आस्तोर.
24 बेव डीसाताङ कबस्किन दुस्रोर बोरे केवोर, अव कबस्किन नना ओरगा केवेके, ओरगा कसुर मनो आवालि. मति ओर इतेक, इंजेके नावाङ कबस्किन ऊळिस तेला, नाकु अहे नावा बाबान कोंटे कीस्तोर. अदिह्क ओर कसुरते अरयह्तोर.
25 उगसतुह्के ओर नाकु कोंटे कीतोर, इद्रम इनजोर ओराङ अडोना सास्त्रमते रासतद मन्ह्ता, अद करल आयनेनाह्कु इव गोटिङ आताङ.
26 “तोळ आयनद सेतेम तोहतनद देवुळता जीवा, तान नना बाबानग्डाहि मियके लोहतकन. अद पेसिस वातस्के, नना बोनन आंदन इन्जि वेहतग़ा.
27 ओसो मीट वने नना बोनन आंदन इन्जि वेहतकिर. बाराह्क इतेके बेस्के नना काग़्हता बोटटन, अस्केडाहि मीट नावा संगे मंदिर.