11
येसु पार्तना कीयनद काग़्हतह्तोग़
(मत्याल 6:9-13; 7:7-11)
1 उंद दिया येसु पार्तना कीसोर मतोग़, ओग़ पार्तना कीयनद मारतापया ओनाङ कग़यवाल ओर्वोग़ इद्रम इतोग़, “सामि! देवुळता पेदिरते एग़ मीहवाल योहन तनाङ कग़यवालोरिन काग़्हतप लेह्का, माक वने पार्तना बेद्रम कीयना इनजोर काग़्हच ईम,” इतोग़.
2 अस्के येसु ओरिन इतोग़, “मीट पार्तना कीयह्पा इद्रम वळ्ह्काटु:
‘जोहर सामि, देवुळबाबानिन, सबेटोर नीवा पेदिरतुन मान ईयिर.
इद बूमते नीवा राजेम निल्पिह कीमु.
3 मावा दिनमता तिंडि दिनम ईसोर मनु.
4 ओसो बेद्रम माटु मावा अडम मतोर कसुरतोरिन मापि कीतोम,
अद्रम मावा कसुरतुन वने मापि कीमु.
ओसो माकु बेरा कंदाता वेलाते पापमते अरयलाह एमा.’
इद्रम पार्तना कीम्ह्टु.
5-6 “इंजेके मियग्डाहि ओर्वोग़ मन्कल, नग़्का तना तोळतोनगा अनजि, ‘ए गोतया उंजतिरा? नावा ओर्वोग़ गोतयाल इंजेकेन वातोग़ रा, ओन्क अटिस ईयलाहि नयगा बाताले इले. नियगा रेंड आरिङ मतेक नाक ईकिन रा!’ इनजोर ताल्ह्केग़.
7 मति ओग़ लोप्पाडाहि ‘अग़दुन केहच नना टेटेम अरतन रा, इंजेक नाक कयर केमा! नावा संगे नावा मग़ि वने उंजतोग़. अदिनेनाह्क इंजेक तेदिस बाताले नीक ईया पग़वोन,’ इनजोर इनेग़.
8 “नना मीक वेहतह्नन, नावा गोततोग़ ताल्ह्किह्तोग़ इनजोर तेदवेकाय, ओग़ गोंड-गोंड आस्तोग़ इनजोर निटम तेदिस ओन्क ईयनोग़.
9 अदिनेनाह्क नना वेहतह्नन, ताल्ह्कसोर मन्ह्टु, देवुळ मीक ईयग़ा. पर्ह्कसोर मन्ह्टु, दोर्कग़ा. कोह्कसोर मन्ह्टु, तेल्पतुन तेग़यग़ा.
10 बाराह्क इतेके बोग़ ताल्ह्किह्तोग़, ओन्क ईयग़ा. बोग़ पर्ह्किह्तोग़, ओन्क दोर्कग़ा. बोग़ कोह्किह्तोग़, ओन्क तेग़यिस ईयग़ा.
11-12 तपेनु तना मग़ि आरि ताल्ह्कतेके ओन्क बंडातुन ईयनोग़ा? मीन ताल्ह्कतेके ओन्क तरसतुन ईयनोग़ा? इलवेक इसि मेन्ज ताल्ह्कतेके ओन्क मिचोतुन एवाल, इद्रमतोग़ बोग़ाय तपे मियगा मन्ह्तोग़ा?
13 मीट पापमतोरिर मनजि तेला मीवाङ पिलाङ-पेकोरिह्क बेसता मादुन ईयलाह पुह्निर, इतेके देवुळदीपतोग़ बाबाल तन्क ताल्ह्कवालोरिह्क तना पवित्र जीवा बह एवोग़?” इनजोर वेहतोग़.
येसुनगा देवुळता लाव मन्ह्ता
(मत्याल 12:22-30; मार्कल 3:22-27)
14 पया ओर्वोग़ मन्कन देयम पोस मता, अदिनेनाह्क ओग़ मन्कल वळ्ह्क पुनवा मूकाल आस मतोग़. पया येसु अद देयमतुन ओनग्डाहि पेसिह कीतोग़. अस्के ओग़ मूकाल वळ्ह्क बोटटोग़. इदिन ऊळिसि अगा मता मुलु पका बामतोर.
15 मति ओरग्डाहि उय्तुर बारा, “वेग़ देयह्कना मुक्याना साय्ताते देयह्किन मन्कलोरग्डाहि पेसिह कीस्तोग़ रा!” इनजोर इतोर.
16 ओसो उय्तुर बार येसु निटम देवुळतग्डाह वातोग़ुया बहु, इनजोर सेतेम ऊळलाह ओन इतोर, “अले! माक देवुळता लावता बेदाय सीना तोहचीम,” इतोर.
17 मति येसु ओरा बुदतुन पुनजि इद्रम इतोग़, “बेदाय राजेमते तमाय नडुमि कोंटेङ पुटटेके अद राजेम लेङिह्ता, अहे बेदाय लोतगा वने कोंटेङ पुटटेके अद लोन निलो.
18 नाक देयह्कना मुक्याना साय्ताते देयह्किन पेसिह कीस्तोग़ इनजोर इह्निर. देयह्कना मुक्याल तनाय तोळताङ देयह्किन बाराह्क पेसिह केवालि? अद्रम देयह्कना मुक्याल ओसो ताना तोळताङ देयह्क तमा तमा विरुद आतेके अविस्कना राजेम बेद्रम नितग़ा?
19 अले नना देयह्कना मुक्याना साय्ताते देयह्किन पेसिह कीतेके, मीवोर पया बेदिना साय्ताते देयह्किन पेसिह कीस्तोर? इद्रम मीवाङ विचर्क चुकताङ इनजि ओर तमाय तोहतनुर!
20 मति नना देवुळता जीवाता लावते देयह्किन पेसिह कीय्ह्नन. इतेके मियगा देवुळता राजेम वाता, इदिन पुन्ह्टु.
21 “इदिन पुन्पिह कीयलाह नना मीक उंद पोल्लो वेहतह्नन: ओर्वोग़ पळयोग़ कसेह्क-मग़्स्क पोसि, तना लोतुन राका कीसोर मतेक अचोन, ओना मालसोम बेस मन्ह्ता.
22 मति ओन्काय एक्वा लावतोग़ पळयोग़ वासि, ओन उकिस आरे कीस्तोग़. कीसि लोतुन राका केवाल मन्कल बर्वस तासतव कसेह्क-मग़्स्किन ओनग्डाहि ऊंदिह्तोग़, ओसो तना लूटे कीतद मालसोमतुन वने तना गोततोरा संगे तूसिह्तोग़. अद्रमलेह्का देयह्कना मुक्यान आरे कीताह्के नना देयह्किन पूंड पग़यह्नन.
23 “बोग़ नावा संगे गोतते मनोग़, ओग़ नावा विरुद मन्ह्तोग़, ओसो बोग़ नावा संगे लोकुरिन गुम कीयलाह तोळ आयोग़, ओग़ ओरिन बिरोबटो कीस्तोग़.
देवुळताह जेक आतोना तिपलि
(मत्याल 12:43-45)
24 “उंद देयमि बोग़ाय मन्कनग्डाहि पेसिस अतस्के, अद तन्क मनदलाह इके-अके मेटाङ-मेटाङ वेलियिस जागाङ पर्ह्किस ऊळिह्ता, मति अद्रमता जागा बेगान दोर्को. अस्के अद आलिह कीस्ता, ‘नना पेसिस वातन अद नावा पाळ्ना लोतगान मल्स दाकन,’ इद्रम इन्ह्ता.
25 पया अन्ज ऊळिह्ता अस्के अद मुनेता लोनु रिकम आतदु, सिर-सिर नेहतदु, ऊसतदु, इद्रम तान्कु बेस दिसिह्ता.
26 अस्के पया अद मल्स अनजि तन्काय लाग्वव एळुङ देयह्किन तना संगे गोत कीस ततह्ता. अस्के अवु ओग़ मन्कना लोप्पा नेङिस जागा आस्ताङ. पया ओना इंजेटा गोसा मुनेतदिह्काय वेल्ला करबता आस्ता,” इनजोर येसु वेहतोग़.
देय्वातोर बोर आंदुर
27 येसु इव पोल्लोङ वेहतस्के, मुडग्डाहि उंद आंचाळ जोरते केयिस इद्रम इता इतेके, “नीक पुटिह कीसि, पाल ऊहतद आंचाळ बेरा देय्वाता आंदु,” इता.
28 इतस्के येसु इतोग़, “आयो, देवुळता पोल्लोतुन केंजिसि, अद्रम ताकवालोरे बेरा देय्वातोर आंदुर,” इतोग़.
लोकुर सीना तोहता वेहतह्तोर
(मत्याल 12:38-42; मार्कल 8:12)
29 पया मुडा मन्कलोर उचुन जमा आनेके, येसु इद्रम वेहता बोटटोग़: “इद पीळतोर लाग्वोर मन्कलोरु, नावा कयदे सीना ऊळकोम इन्ह्तोर. मति देवुळता कबुरतोग़ योना इनवाह्क बह-बह आता, अदे सीनातुन ओरिह्क तोहतकन. तान विळ्सिसि बेदे सीना नना तोहवानन आयोन.
30 बेद्रम निनवे सहरतोर लोकुरिह्क योनाल सीना आतोग़, अद्रमे इद पीळतोरेनाह्क वने माने-मन्कना नडुम पुटटोनन सीना आयकन.
31 साल्मोन राजाना बुदताङ पोल्लोङ केंजलाहि सीबा देसेमता रानि वेल्ला जेकताहि वाता, मति इंजेके इगा साल्मोनिह्काय बेरोग़ ओर्वोग़ मीवा मुनेह निच मन्ह्तोग़. मन्कलोर नावा पोल्लोतुन केंजोर. अदिनेनाह्क आक्रि नेयमता दियाते अद रानि निचि इद पीळतोरा पोग़ोन तप तासग़ा.
32 अद्रमलेह्काने योनाना कबुरतुन निनवे सहरतोर केंजिसि, तमा पापमताहि मिळ्न्दतोर. इंजेके इगा योनाह्काय बेरोग़ ओर्वोग़ मीवा मुनेह निच मन्ह्तोग़. मति मीट इतेके मीवा पापमताहि मलविर. अदिनेनाह्क आक्रि नेयमता दियाते निनवे सहरतोर निचि इद पीळतोरिन तप तासनुर,” इतोग़.
येसुना काग़्हमुळि कंदिललेह्काडा
(मत्याल 5:15; 6:22-23)
33 येसु ओरिन ओसो इद्रम वेहतोग़, “बोग़े कंदिल निर्विह कीसि, तान वेह्च एवा जागाते तासनोग़ा? इलवेके डूटलोप्पा मुचिस तासनोग़ा? आयो, लोप्पा ओळियवालोरिह्क वेह्च दिसि इनजोर बोव्लापोग़ोन तासनोग़.
34 नीवा कोंडा नीवा मेंदुदा कंदिल आंदु. नीवाङ कोंडाङ बेस मतेक अचोन, नीवा पूरा मेंदुदगा वेह्चलेह्का मंदग़ा. मति नीवाङ कोंडाङ करब मतेक अचोन, नीवा पूरा मेंदुल ईकळ आतप लेह्का आस्ता.
35 अदिनेनाह्क मियग्डा वेह्चि ईकळ आयमाकि, इदिन सीताते तासाटु.
36 मीवा पूरा मेंदुदगा इचुन वने ईकळलेवा, पूरा वेह्च निंदिस मता इतेके, कंदिल वेह्च ईयना लेह्का नीवा पूरा मेंदुल वेह्च ईयग़ा. अद्रमे देवुळि तना पोल्लोतुन नीक पूरा तोहतग़ा,” इनजोर वेहतोग़.
सास्त्रमगूरुरा ओसो परुसिरा कबळ ओप्पो
(मत्याल 23:1-36; मार्कल 12:38-40)
37 येसु इद्रम वेहच मारिह कीतस्के, ओर्वोग़ परुसि मन्कल येसुन जावा उनडलाह तना लोन केयतोग़. अदिनेनाह्क येसु ओना लोन अतोग़. अनजि लोप्पा ओळियिसि ओना संगे जावा उनडलाह उदतोग़.
38 अस्के परुसिरा अडो माळवा, येसु कय नोग़वाये जावा उनडलाह उदतोग़. तान ऊळिस ओग़ परुसि पका बामतोग़.
39 अदिन पुनजि येसुसामि ओन इद्रम इतोग़, “इके केंजा, मीट परुसिरिर गिनेङ-बट्किन सिरप पलतेनाह तोमिह्निर. मति मीवा लोप्पाडेके इतेके उळ्बेते लोकुरिन जाळ्पनद निंदिस मन्ह्ता.
40 बुद लेवोरिर! बह पलता मेंदुदुन पंडटद देवुळि, लोप्पाडा मेंदुदुन वने पंडोया?
41 अदिनेनाह्क मियगा मनदनदिन लेवोरिह्क ईम्ह्टु. अस्के मियेनाह्क सबे पोलनुङ.
42 “ओ परुसिरिर, मीक पका सिक्सा आयग़ा. बाराह्क इतेके मीट पुलातगा वाटनव आकिना ओसो दुस्रा पंटाता दहा तूस्कनग्डाहि उंद तूस देवुळतुह्क कोड ईय्ह्निर. इचोन उड्लाङ पोल्लोन सीता कीय्ह्निर, मति सेतेमते नेयम कीयना ओसो देवुळतुन जीवा कीयना, इद्रमताङ पोल्लोन सीता केविर. इविस्किन वने माळनाय मता, अविस्किन वने माळनाय मता.
43 “ओ परुसिरिर! मीक पका सिक्सा आयग़ा. बाराह्क इतेके पार्तनाताङ लोह्कनगा बेरोर उदवालोराङ जागाङ पर्ह्किह्निर. ओसो बजरतगा लोकुर मीक जोहर कीयना, इद्रमताङ बेसु.
44 मीक पका सिक्सा आयग़ा, बाराह्क इतेके मीटु, सेत्तातुन गुमया केवाय मिसतद जागाता लेह्का मह्निर. अगा गुमया दिसवाह्कु, अगाह्क अनवालोर पोग़ोट्क दास्तोर, मति इगा इळ्न सेत्ता मिसिस मन्ह्ता इनजोर पुनोर,” इनजोर वेहतोग़.
45 अस्के ओर्वोग़ सास्त्रमगूरु येसुन इद्रम इतोग़, “गूरु, निमा इद्रमताङ पोल्लोङ वळ्ह्किस माक वने लजा अरनाह कीय्ह्निन गोतो.”
46 इनजोर इतस्के येसु ओन इतोग़, “ओ सास्त्रमगूरुरिर! मीक पका सिक्सा आयग़ा, बाराह्क इतेके मीवाङ तेहता पुनवप मनदनाङ अडोङ-उतुर्कना मोतातुन मीटु लोकुरा पोग़ोन वाटिह्निर, मति मीट इतेके अद मोतातुन कयतेला बोयिस ऊळविर.
47 मीक पका सिक्सा आयग़ा, बाराह्क इतेके मीवा तादोर-बाबोर मुनेतोर देवुळता कबुरतोरिन हव्कतोर. इंजेके इसि मीट ओराङ पेदिर्कने कल-बंडाङ ओग़्सिह्निर.
48 अह कीसि मीट वने मीवा तादोर-बाबोराङ कबस्किह्क तोळ आतिर. बाराह्क इतेके ओर बार कबुरतोरिन हव्कतोर, मीट बार ओराङ कल-बंडाङ ओग़्सिह्निर.
49 “अदिनेनाह्क देवुळि तना बुदते इद्रम इता, ‘नना कबुरतोरिनु ओसो बळयिरिन वने ओरगा लोहतकन. अस्के उय्तुरिन बार हव्कनुर ओसो उय्तुरिन बार पका तिपल कीयनुर,’ इता.
50 अदिह्क बूम पुटटग्डाहि देवुळता कबुरतोरिन बेच्वुरिन हव्कतोर! ताना इसब इद पीळतोरिह्क ईया पोयग़ा.
51 मुने आबेलिन हव्कतग्डाह इतेके, वेल्लाय पेग़्के मंदिरता पवित्र जागा ओसो गर्या इव रेंडिस्कना नडुम जकरिया बूमयान हव्कतोर.अगा एवनाह बेच्वुरिन हव्कतोर, ओर सबेटोरा इसब इद पीळतोरिह्क ईया पोयग़ा.
52 सास्त्रमगूरुरिर, देवुळि मीक पका सिक्सा ईयग़ा. बाराह्क इतेके बुदता अग़दुन केहचीतिर; मीट वने ओळियविर, ओसो ओळियवालोरिन वने ओळियलाह एविर. इद्रम मीट मन्कलोरिन सेतेम पोल्लोतुन पुनदलाह एविर,” इतोग़.
53-54 पया येसु अग्डाहि अतस्के परुसिर ओसो सास्त्रमगूरुर ओना पोग़ोन पका ओङ आतोर. आसि बेदाय पोल्लोते येसुन एग़्किह कीयना इनजोर विचर कीसि, ओन वेल्लाङे पोल्लोङ ताल्ह्क बोटटोर.